Read Aghem Edêe Fughu 7 Bible Online

Edêe Fughu 7 - Aghem bible

Edêe Fughu 7

¹[3] A m bùghò ghəa ghən tsəghà tsughu, mùgho ŋ kòʼ tsətəndə̄ghā tə Kəzə̀ tə̀n tə̀ chìakò tə ti am buw ghən à chìakò am mbī, mo ghe ŋ kə̀ŋ nàŋa tsughu kʉ̀ɛɛ wən ù chùakò am mbī enyəa to kʉ̀ɛɛ kə kâ mò tsò tsə̀ghà am mbī ŋkāa an dzùghùntsòʼ ŋkāa aŋ kàʼ fə̀ li fo.

²Mùgho n daŋso kòʼ tsə̀ndə̄ghā è Kə̀zə̀ è lì è səā kɔʼɔ̄ wo an tsə kə̀ səa ko, zə̀ ŋ ki lɔʼɔ kəla Zə̀ kəla kə lô â tuw ko tsə̂so naāŋ ghî ghò a te, nàʼn wò an dzə̂ è tughu â tsə̀təndə̄ghā tì tə̀ chìakò ghe lo mo ghe maā ghe â daʼa kə fughu alenomsô ghueekətsə̄ ko àsùghò dzùghùntsòʼ,

³enyəa, “Kà ghueekətsə̄ kə nomso, ŋkāa dzùghùntsòʼ, ŋkāa ŋkâʼ à gɔ̀ʼɔ̀ ko mo a ŋ kɔ̀ɔ n Zə̀ kə sɛ̀ m tsə̂sò nàŋa tsughu alo kəlɔʼɔ aŋ kàʼ mə̀ esʉ ŋ ghee.”

⁴Mùgho n zuw tsughu kɔ̂n kə aghì kəla ghe mò tsə̂sò tsughu alo kəlɔʼɔ, à n lo kam tə aghì fəbɔm à ghì ghò ŋghəm n chìakò, à ghì ghò a chìakò, ghe nî kaāŋ wo aŋ kèndughu u wɛ ghə Ezə̀lɛ̂ ghə̀n à dzə̀m.

⁵Ghe n tsə̀sò tsughu kam tə aghì eghə̄m à ghe tò təbə̀ghà aŋ kèndughu kə Dzudà, kam tə aghì eghə̄m à ghè tò tə bə̀ghà aŋ kèndughu kə Lubɛ̀n, kam tə aghì eghə̄m à ghè tò tə bə̀ghà aŋ kèndughu kə Gâd.

⁶Ghe ne tsə̀so tsughu kam tə aghì eghə̄m à ghè tò tə bə̀ghà aŋ kèndughu kə Ashà, kam tə aghì eghə̄m à ghè tò tə bə̀ghà aŋ kèndughu kə Naftālì, kam tə aghì eghə̄m à ghè tò tə bə̀ghà aŋ kèndughu kə Mànassɛ̀h

⁷Ghe n tsə̀sò tsughù sugho kam tə aghì eghə̄m à ghè tò tə bə̀ghà aŋ kèndughu kə Simìon, kam tə aghì eghə̄m à ghè tò tə bə̀ghà aŋ kèndughu kə Lɛvì, kam tə aghì eghə̄m à ghè tò tə bə̀ghà aŋ kèndughu kə Essākà.

⁸Ghe n tsə̀sò tsughu sugho kam tə aghì eghə̄m à ghè tò tə bə̀ghà aŋ kèndughu kə Zɛbūlùn, kam tə aghì eghə̄m à ghè tò tə bə̀ghà aŋ kèndughu kə Dzùghùsî, ghe n tsə̀sò tsùghù sùghò kam tə aghì eghə̄m à ghè tò tə bə̀ghà aŋ kèndughu kə Bɛndzàmɛ̂n.

⁹A m bùgho ghəa ghən tsəghà tsughu, mùgho ŋ kòʼ nɔ̂e kə aghì mò ghùw lì yo aletaŋ, aghî ghe sə kaāŋ wo an naʼà tə̀n tə̀ dzə̀m, an tùu tə̀n tə̀ dzə̀m, sə kaaŋ wò sùghò ndughu tən tə̀ dzə̀m, ghe n saʼâ sàʼà tə nàʼà tə̀n tə̀ dzə̀m; ghe n ti an sə kə ndàŋ è kə̀də̀ŋ è te àsùghò a sə̀a Tsʉa u Ndzì u te wo. Ghe a dzə̀m n lo mo ghe n tə̄m dàla tə̀ famā to a zəŋo e eghùe, chìa ŋ ki kətsəghā aŋ ghu.

¹⁰Ghe n dzâa sə̌a kɔʼɔ an dzə̀ tə̀ tughu to enyəa, “À lǒ Zə̀ kə sɛ̀ kəla kə doʼ an ndàŋ è kə̀də̀ŋ ghèe Tsʉa u Ndzì u te wo ghe bəghaasəa sɛ̀!”

¹¹Tsə̀təndə̄ghā tə Kəzə̀ tì tə̀ dzə̀m n lo mo ghe n tee dzə̀əŋ ŋgəa kɔʼ ndàŋ è kə̀də̀ŋ e te, tee dzə̀əŋ ŋgə̀a kɔ̀ʼ sùghò tsoʼ tì, àsùghò fʉgha vʉ̀ u chùakò ù mò lo â tuw ko, ghe n nùghù bvʉ̀ pfʉ̌ʉn ndùw èsʉ a ghueetsə̄ a sə̀a ndàŋ è kə̀də̀ŋ e te, fughuu ndùw ŋ kɔʼso â Zə̀ kò.

¹²Ghe n zoo àghəa dzàa tsùghuu a te enyəa, “Zə e lo ko ezə̀! Ebughuso, nsəghanyəgha, etɔ àsùghò zɔ̀ɔŋ kə̀ fughu ko, ŋkɔʼso, kədaʼa àsùghò ghaʼ zo, e doʼò təla ndûw â Zə̀ kə sɛ̀ kò to mbī kê bughò mîaa. Zə e lo ko êzə̀.”

¹³Tsòʼ è lì n nùghù bvʉ̀ sə̀ wò â mùghò enyəa, “Ghən lò ghê ndūghō ghe dzəlà kele ndzʉ tə̀ fəma to a, ghe sə ghɛ?”

¹⁴Mùghò m bɛ̀lɛ̀ kɔ̀ʼ enyəa, “Ŋ̀ kwo yo a Mughùbè, à lǎam kwo ghû.” Ù n daŋso dzɛ̀ â mùghò enyəa, “Ghən fɛ lo ghî ghəla ghe lo mo ghe m fala an ndə̀mà tə aghəa fəgha lə ŋ kè kuūwn nomso ghee, ghe yia sûw maʼà tsughu dàlà tə ghee to aŋ kàŋ tə Tsʉ u Ndzì u te wo, tia tə fə̂m tsughu fùuŋ.

¹⁵Zən lò e ghee ghe lo a vʉ̀a ndàŋ è kə̀də̀ŋ è Kə̀zə̀, fwàʼà bwǐi ndǔw ndùw â wə̄n bùghò fwàʼà zěe wò an tsughu e wə̄n. Ghùw wəla ù dòʼ an ndàŋ è te lo e lɛnlo â ghee aŋghəa ù lò dzə̂ ghèe ghee.

¹⁶Dzə̀ŋ kè ghee kôom zà kòʼ yò, fə̀ŋ è m̀mùghu kê ghee kôom zùʼso kòʼ sùghò yò. Tsə̀ kè zùʼ kòʼ yǒ ghee, zuʼ tə nu tə kê ghee mɔ̂m kòʼ sùghò yò;

¹⁷tɔŋlo enyəa Tsʉ u Ndzì u te wəla u lo an ndàŋ è kə̀də̀ŋ è te kê lǒ bàʼàtə̀ndzì ù ghee. Ù lo nìi ndùw ghee an sə e dzughù zəla e ki mùghù mə̀là ŋ ghəŋlo enyəa ghùw è lo â tuw ko. Zə̀ kə̀ lo zêe maʼà tsughu sə̀ mə̀ èdì n dzə̀m aŋ tuw kə ghee.”