Read Aghem Edêe Fughu 8 Bible Online

Edêe Fughu 8 - Aghem bible

Edêe Fughu 8

¹A m bùghò Tsʉa u Ndzì u te u zʉ̂mè tsughu mə̀ŋ è sə̀ghàkəmbəgha zən, luʼū tə n nùghù zùw dòʼò tsùghù ènyə alo kəwālā mɔɔŋ tò alekɔʼɔ̄sə̄ aŋ kə̀m kə tàm è èzǔuw.

²Mùghò n daŋso kòʼ ndùw tsə̀təndə̄ghā tə Kəzə̀ tì to sə̀ghàmbəgha tə ti tsəgha a vʉ̀a Zə̀ kò, ghe m fùghù ndùw ghee â mbuwlì tǒ sə̀ghàmbəgha.

³Tsə̀ndə̄ghā è li ŋ kòom ndùw è bugho, tee ndùw a vʉ̀a tsaʼ ko à pfʉ kə etsɛ̀ kò aŋ ghu, ghe m fùghù ndùw wə̄n â ndə̀m è ènyěe enyəa ù təmādzəə̄ŋ tsughu aŋ gɔ̀ŋlò e ghì à Kəzə̀ ghən à dzə̀m, an tsaʼ kəla ghe bɔm alo etsɛ̀, kə ti a vʉ̀a ndàŋ è kə̀də̀ŋ è te.

⁴Gɔ̂ŋlò e ghì à Kəzə̀ àsùghò nyoʼ kə enyěe kəla kə mò səā kɔʼɔ̄ aŋ ghu kə tsə̀ndə̄ghā zə̀ e mò ti a vʉ̀a tsaʼ ke etsɛ̀ ko n dzeŋe kɔʼɔ ndùw â Zə̀ kò.

⁵Tsəndə̀gha è Kə̀zə̀ zə n sàn sə̀ wò chia tə ŋwə̀n a fughu alo kətsāʼ dzə̀n lùeʼso wò pfʉ chì a te, kwə̀n màʼà tsùghù a ghueetsə̄. Ghuuw zə ŋ kə̀m è kɔʼ, kàʼ ndùw alemwɛ̀nlò, luʼū tə n noʼò bɛ̀lɛ̀ wò, bɔ̀n mə ŋ kûu.

⁶Tsə̀təndə̄ghā ti to sə̀ghàmbəgha tə mò ki mbuwlì tì to sə̀ghàmbəgha n daŋso fəghaan tsughu eghue, tee tən tsughu aletɔ̄ŋ mbuwlì tə te to.

⁷Tsə̀ndə̄ghā è sʉesʉ n tɔŋ tsughu mbuwlì e wə̄n, tiatia mə̀ ŋ kāʼ tsughu alekwəə̄n tsughuu wo aŋ ghueekətsə̄ à wə̀n mò a te, mo kâŋ tə̀ n nyɔ̀ɔm kɔ̀ʼ a te. Ghe n kpàa màʼà kɔʼ bâ kə ghueekətsə̄ kə mɔ̀ʼ, abugho a dzughùun tsughu ghueekətsə̄ alo udwə̀ŋò utʉgha, ŋkâʼ n dzə̀m àsùghò ghè ù zʉ̂ wò u dzəm fughu aŋ ghueekətsə̄ kə te ko m pfʉ̀ e kɔʼ.

⁸Tsə̀ndə̄ghā è kə̀ bə̀ghà n tɔŋ tsughu mbuwlì e wə̄n, ghe m màʼà nyə̀ tsùghù ndùw fəgha kə̀ li ko an dzùghùntsòʼ tò kwâʼ ù ne wo mo u lo aŋ wə̀n. Dəŋò kə dzughùu kə mɔ̀ʼ; abugho a dzughùun tsughu alo udwə̀ŋò u tʉgha, m bàŋ dòʼò tsùghu tò təkâŋ.

⁹Dəŋò kə nyòm tə dzùghùntsòʼ ko kə mɔ̀ʼ abugho a dzughùun tsughu nyôm tə dzùghùntsòʼ təla u lô â tuw ko alo udwə̀ŋò u tʉgha, mo è kpuwnlo, dəŋò kə kwə̀n wə edzə̀ŋ kə mɔ̀ʼ abugho a dzughùun tsughu kwə̀n wə edzə̀ŋ wò alo udwə̀ŋò utʉgha, mo è saʼa.

¹⁰Tsə̀ndə̄ghā è kə̀təgha n tɔŋ tsughu mbuwlì e wə̄n, sə̀ghàbəlà fə̀ ne fə̀ lì fə nùghù sə̀ tsùghù wò alo kəwālā mò fə bàŋà tò kəkɛ̀ʼɛ̀, bvʉ̀ sə̀ tsùghù wò an də̀ŋò kə tədzùghùu tə̀ kuŋu to kə mɔ̀ʼ abugho a dzughùun tsughu dzughùu tə̀ kuŋu to alo udwə̀ŋò u tʉgha, àsùghò an dəŋo kə nndzînlò kə mɔ̀ʼ abugho a dzughùu tsughu dwəŋò wə nndzînlò n te mò alo u dwə̀ŋò u tʉgha.

¹¹Zən e sə̀ghàbəlà fə te fə lo Tɔ̀ɔ èdzughu. Bâ kə tədzùghùu kə mɔ̀ʼ abugho a dzughùu tsughu dzughù tò alo u gbà u tʉgha ŋ kàʼ ndùw aletɔ alo edzughu, ndə̀mà tə aghì tə mô e kpuwnlo aŋghəa ghe mʉ kɔʼ mùghù n te mò.

¹²Tsə̀ndə̄ghā è kə̀chìakò n tɔŋ tsughu e wə̄n mbuwlì, zə̀ n zàʼ tsùghù bâ kə ezūuw kə mɔ̀ʼ, abugho a dzughùu tsughu zuuw zo alo ugbà u tʉgha, àsùghò bà kə dzɔ̄ŋ ko kə mɔ̀ʼ abugho a dzughùu tsughu dzɔŋ alo u gbà u tʉgha, àsùghò də̀ŋò kə nsə̀ghàbəlà kò kə mɔʼ abugho a dzughùu tsughu sə̀ghàbəlà mò alo udwə̀ŋò u tʉgha. Zə̀ ŋ ghəəŋ tsughu dəŋò kə tsə̂ kə ghee kə ŋ gùŋù kɔ̀ʼ kəbâ kə mɔ̀ʼ, abugho a dzughùu tsughu bâŋ e ghee zo alo u gbà u tʉgha; tsə̀ m baŋà yò â tsə̀ tò aŋ kə̀m kə fətsūʼ kə mɔ̀ʼ abugho a dzughùu tsughu tsuʼ fo fə mɔ̀ʼ alo ukwə̀m u tʉgha, ndzɔŋ àsùghò sə̀ghàbəlà mə̀ m baŋà sùghò yò aŋ kə̀m kə utsūʼ abugho a dzughùu tsughu tsuʼ fo alo ukwə̀m u tʉgha â tsuʼ wo.

¹³Mùghò mo e lɛɛ̄n kɔʼ, zùw ndùw mbuʼ dîi səā kɔʼɔ̄ an dzə̂ è tughu ghəa è zəghāa kaŋlō edzuŋ èdzùŋ enyəa, “Ŋgoʼ, ŋgoʼ, ŋgoʼ è fɛ̀nlo kê lò a zəŋò ghì ghəla ghe lô aŋ ghueekətsə̄ abugho ghe zuw aŋghəa dzə̀ tə mbuwlì tə li təla tsə̀təndə̄ghā tə li tə̀n tə̀ təgha lo ki aletɔŋ!”