Read Aghem Edêe Fughu 9 Bible Online

Edêe Fughu 9 - Aghem bible

Edêe Fughu 9

¹Tsə̀ndə̄ghā è kətɛ̀ n daŋso tɔ̄ŋ tsughu è wə̄n zo mbuwlì, mùghò n daŋso kòʼ fə̀sə̀ghàbəlà mo fə maā nughù sə̀ tsùghù wò alo kəwālā bvʉ̀ sə tsùghù wò à ghueetsə̄. Ghe m fùghù ndùw wən â tsʉ kə bùʼ kəla kə doʼŋkè kuʼù.

²Ù n tsʉ kɔʼ dzughu e bùʼ kəla kə kuʼù yo, nyoʼ wə n səa kɔʼɔ an dzughu e bùʼ chì tò nyoʼ wəla u səa kɔʼɔ alo kənàm, nyoʼ u te wə n dzʉ̀a kə̀ŋ nàŋa kɔʼ tʉ̀ghà u tsə̂ àsùghò zuʼ to edzuŋ.

³Be tə n sə̀ wò an nyoʼ kə te ko, tsùghù wò a ghuu, ghe m fughu tsughu ghee â daʼa ko tò daʼa kə tənàŋ.

⁴Ghe n dzɛ̀ â ghee enyəa e kwo ghe lô wii maʼn ghê kò am mbī ŋkāa tam kə̀ li ko ŋkāa kâʼ fə̀ lo fo. Ghe n lo ko alenomsô ghì ghəla ghe ki yô lɔʼɔ kə Kəzə̀ kò aŋ kàʼ mə̀ esʉ ŋ ghee.

⁵Ghe n dzɛ̀ tsùghù enyəa be tə te tə fɔesō tsughu ghî a te gho alo təndzɔŋɔ tə tɛ̀, ghe ka ghee kuuwn wī. Fɔɔn zəla ghe mò zuw, mò lo tò zəla ghùw zuūw abugho nàŋ təgha tsughu wə̄n.

⁶An tì kə te ko ghî ghə̀ è ke diī keē nduw vʉ zo an tùʼ è diī zo, zə e ke bughōo yo; ghe e ke e buŋlō alekpūw, vʉ zə e ke tii ghee.

⁷Koʼ e be tə te tə n lo tò ukwʉ̀anyòm ghe fəghaan naŋā an tsām. Ghe ŋ ki fʉgha ù li wo an tuw u ghee u fweēn tǒ mgbɛ wə etsɛ̀; sʉ e ghee zə n lo tò sʉ e aghì.

⁸Nyûŋ tə ghee tə n dâa tò tə ayìzən to, sɔŋ a ghee ghə n lo tò sɔŋ a ubʉgha.

⁹Ghe ŋ ki ubʉghaa a zəŋo e eghùe tǒ kə̀ŋ kə fə̂ŋ kə kəbvūʼ, ghôo tə ghee tə ŋ kwûu wò ènyə to nwaŋ u ukʉ̀anyòm ù lô nyəŋō soʼō tsàm ghèe ghê kʉ̀anyòm wò.

¹⁰Kue e ghee lo sugho tǒ kue u nàŋ, ghe yia təghaa ghî gho a te, ghe ŋ ki daʼa kə te ko aŋ kue e ghee aletəghəŋlo aghì a te alo təndzɔŋɔ tə tɛ̀.

¹¹Ghe ki tsə̀ndə̄ghā zala è lɛɛnlo a bùʼ kəla kə kuʼù yo tǒ də̀ŋ kə ghee; zən e wə̄n an shwaʼ u Hebə̀lù e lo enyəa Abadɔ̀n, aŋ shwaʼ u Gə̀lêk ghe n tɔɔŋ wə̄n enyəa à lò Àpolìon.

¹²Tsû u sûesʉ u ne wə n tsə̀ghà; tsû è naam ki alebùghò è bə̀ghà.

¹³Tsə̀ndə̄ghā è kə̀tǔu n daŋso tɔŋ tsughu è wə̄n zo mbuwlì, mùghò n zùw nyə̀ ndùw dzə̀ è li an ndɔŋ tì tə̀chìakò tə̀ mò teē tsəghà wo am bùghu tə tsaʼ kə etsɛ̀ chia kə ti a vʉ̀a Zə̀ kò.

¹⁴Dzə̀ e te dzâa ndùw â tsə̀ndə̄ghā è kə̀tǔu zə̀a è mò ki mbuwlì zə enyəa, “Zěe zə̀ghà tsughu tsə̀təndə̄ghā tì tə̀ chìakò ghe kɔlɔ̄ naŋā aŋ dzughù è Yùfə̀lɛ̀tes è ghàʼa.”

¹⁵Ghe fi zê zə̀ghà tsùghù nu tsə̀təndə̄ghā tì tə̀ chìakò, tiā ghe mò kwu naŋā tsughu aleləma tsughu nəgha e te zo, tsuʼ u te wo, dzɔ̀ŋ è tè, à nùm kə te ko, alewiī maʼà də̀ŋò kə aghì kə mɔ̀ʼ am mbī e dzə̀m abugho a dzughùu tsughu mbī alo udwə̀ŋò u tʉgha.

¹⁶Ghe mafə dzɛ̀ mugho â kɔ̀n kə sùghugòʼ təla fə̀ nəŋo alo ukʉ̀anyòm: kɔ̂n kə te kə n lo kwən mə̀ m bɔ̀m m bə̀ghà.

¹⁷Zən lǒ dzì zəla mùgho fə̀ koʼ kʉ̀anyòm u te wo a te an dzǒo waŋā; ghî à nyəŋo a te ghə ŋ ki kwə̀ŋ u kəchīchī mo u ki ŋgwò è bàŋà tò uwən, ŋgwò è ləŋo lìi tò kəwālā àsùghò ŋgwò è lòʼ è bàŋa tò unumlo. Tuw u kʉ̀anyòm u te wə n lo tò tuw u ubʉ̄gha, wən wə n səa wò an dzughu a ghee àsùghò nyoʼ wo mo u lo tò sulfò.

¹⁸Dəŋò kə aghì kə m kə mɔ̀ʼ mo è kpuw alo tə zə̂ŋ an wən àsùghò nyoʼ wo àsùghò zuʼ kə biigh kə̀ uwə̀n mo alo zuʼ kə biigh kə̀ uwə̀n kala kə səa wo an dzughu a ghee abugho a dzughùu tsughu mbī alo udwə̀ŋò u tʉgha.

¹⁹Daʼa kə kʉ̀anyòm u te kə lo an dzughu a ghee asùghò an swaŋ u ghee. Swaŋ u ghee wə̀ n lo tò təzughu, à tuw wo ghe nomsō ghî ghò a te

²⁰Ghî à li ghəla ghe fə nɔsə tsughu an zəŋ ten, ghe ŋ kè zəghàa maʼà ghəa à kɔʼso à mmùʼù ghee mən, ŋkāa ghəa à kɔʼso a zʉ̀ ù biigh gho, àsùghò mə̀ ètsɛ mò àsùghò n Silvà mò, m bəlôns mò, mə̀ n tia mo, mə̀ ŋkàʼ mò, mò ŋ kòʼò yò luʼū to, zuuw yo ghəa gho, bwìi sùghò yò.

²¹Ghe kafə̄ tso bùʼ tì màʼà sùghò ghəa a ghee à wiīn ghə aghì ghò ŋkāa a kəvùŋ ghò, ŋkāa ghəa à nuūŋ kaaŋ gho ŋkāa à tsɔŋɔ gho.