Read Aimol MATHIU 17 Bible Online

MATHIU 17 - Aimol bible

MATHIU 17

¹Ni ka ruk suale Jisun Pitar, Jems le ama a naipang Johon ha a man tangbung sangna khat hin a tuang jui.

²Hale anmani ma don a man a mel a kan thul la, ama maisuo anga a var jui, hale ama puan le diar ha var anga a hong varjui.

³Hale enru, Mousi le Elia in an madonna an hong kando ama le an kanbiakjui.

⁴Hava han Pitar in Jisu jiang a hong ti, “Puma nang in na najot pe inko kein in hiva mun hin kan om hi asat, kein in hivahin tham inn an thum sinrei, nang rang khat, Mousi rang khat, Elia rang khat.”

⁵A man arilai pha han, enru acheklok sumphai ning anmani ha a khu de jui, jet lui thai lui a sum phai chung han rasa an khat in a hong ti, “Hivahi ka lungsiat tak ka pasalnai ke ani, kein amna chunga ka lungdo a tung, ama chong ri ha ngairu!”

⁶Hale a thiamruoingain an jet pha han, anmanin an khup a an bok, an khat om a tam an lui chit.

⁷Tak-ha Jisun a honga anmani ha a sit a ti, “Thuiru,” chit maru.

⁸Hale anmanin an mit an menga an hong en pha han Jisu ni lui a adang tu khat om lui mu lai ma u.

⁹Anmanin a tun tangbung tenna an hong chum han, Jisun chong abea a ti, “Nan lung mit nan mu hi Mi Pasalnai in a thi tenna a thui khir mak kar je, tu khat jiang om ri maru.”

¹⁰Hale a thiamruoingain ama jiang an dingkel la anti, “Ha aninko dantheingain Elija ning man a hong rang ke tia i ruia mo anti?”

¹¹Hava han Jisun anmani jiang a shanga a ti, “Adik tak Elija ning man a honga phur rakip man om khir nati,”

¹²tak-ha kein nang ni jiang kati, hava ha ko Elija ha alui hong jui hale anmanin omchan lui jet ma u tak-ha anmanin an dei an lungdo ha ama jiang an lui tho jui, ha ang han Mi Pasalnai ham anmani kut chunga pong nati.

¹³Hava han a thiamruoingain jet na ranga, a man Johon Baptis ruia a ri ke ani.

¹⁴Hale anmanin mitamngai jiang an hong han, mi an khat in ama jiang a honga, a khup a bilinga ama jiang a ti,

¹⁵Puma, ka pasalnai hi na lungsiat pero, ajarko ama hi a keia a tam a pong jui, ama hi mei le tui karra a chul chachak.

¹⁶Hiva jarra kein ama hi na thiamruoingai jiang ka lui hong tuang, tak-ha anmanin ama ha lui mandam tor ma u.

¹⁷Hale Jisun a shanga a ti, “O, takngai lui le misatlui miruolngai kein nang ni le i duk mo a sot kan om suam rang? Kein nang ni ha i duk mo a sot kinala duirang? A ma ha kei jiang hong tuongru.

¹⁸Hale Jisun seitan ha aranna, seitan ha ama tenna ha a suak jui, hale hava phalai tak han nai ha a dam jui.

¹⁹Hava suale thiamruoingain an thei jak Jisu jiang an honga anti, “Keini ning ama hi kan notchei torlui ijarra mo ani?”

²⁰Han Jisun anmani jiang a ti, ajarko tak nanngai torlui jarra ani, hava jarra adik tak kein nang ni jiang kati, nang nin ancham ru khat tiatjak takngai na nan nei inko, nang nin hiva tangbung jiang tinanti, hiten nan phut sotenna kan thitro nantile kan thit nati, hale nang ni jiang anitor luirang ite om noning.

²¹Irakip hi nang nin nan tho torlui rang om mak.

²²Anmani ning Galili an om pha han Jisun anmani jiang a ti, Mi Pasalnai ha mingai kut chunga pek nanti u.

²³Hale anmani ning ama ha that nanti u, hale ni thum chang na han ama thui khir nati, hava han anmanin a tam tak an lui pong,

²⁴Hale anmanin Kapernam ma an hong pha, biakinn khasana chomngain Pitar jiang an honga anti, nan oja hi biakinn khasana pek mak mo?

²⁵A man a ti, a pek, hale a man inn sunga a hong lut han, Jisun ama jiang a hong ti, “Simon imo na ngaidon? Simleia rengngai ning tu jiang mo rampar animakle khasana an pek?” Anmani an naingai jiang mo animakle khuol mi jiang mo?

²⁶Pitar in ama jiang a ti, “Khuolmingai jiang,” Jisun ama jiang a ti, “Ha aninko an naingai ko pe rang suakma.”

²⁷Ha animakle, kein in anmani hi kei chi kei ok man om mak na rang, tuionglian na che nang koi va keiro, hale mantak a hong nga ha vachoiro hale nang in a bai na phong han, ruphai khat na mu rang ke; hava han lui nang kei rang le nang rang anmani jiang pero.