Read Aimol MATHIU 18 Bible Online

MATHIU 18 - Aimol bible

MATHIU 18

¹Hava pha han thiamruoingain Jisu jiang an lui honga anti, “Pathian rengram han tutak mo a lian?”

²Hale Jisun naipangte khat ama jiang akuia, anmani karra a man ong.

³Hale a ti, “A thianga kein nang ni jiang kati ani, nang nin nai pang anga nan ni a, nan hong chang mak aninko; vanrengram ha lut tor noni che u.”

⁴Hiva jarra tu aninom hiva naipangte anga, a tak amankanshin ama ha vanrengram ma a lian tak ni nati,

⁵hale tu aninom kei ka minga hiva naipangte khat alui inko, kei ana lui ke ani.

⁶“Tak-ha tu aninom kei jiang tak ana ngai ashin khat hi, siatna amannei inko; lungchakri khat a ringa an khaia tuionglian thuk khat a an deng juan ha ning ama rang asat det,

⁷Kutsui kesui a om jarra, ramuol hi pong khodengthei na ani; ajarko hiva rakip hi hong nati; tak-ha kutsui kesui amanshuak ama ha pong nati!

⁸“Hale na kut animakle na ke ning, kutsui kesui na ana man nei inko; tanro hale nang jiang tenna peiro, ajarko kut le ke kipdirra athitibui mei khurra an na deng juan rang nek inko, ke bui, animakle kut buia ring na mun na lut ha ning nang ranga a khel la asat ani.

⁹Hale na mit in siatna ana masul rang nek inko, kel innang nang tenna peiro; mit anni omchunga mei khurra an na deng juan rang nek inko na mit khat buia ring na mun na lut ha ning nang ranga a khel la asat det.

¹⁰“Kan ning theiru, ashinngai khat nang nin tak tel lui ha tho maru ajarko, kein nang ni jiang, vanram ma anmani thaneithiangain vanram ma om ka pa mai an muchak.

¹¹Ajarko Mi Pasalnai ha ning a mangshangai san ring ranga a hong.

¹²“Nang nin ija mo nan ngaidon? Miring khat in belram riakhat a nei, hale an khat hi amangpe inko somkuo leikuo ha amakbak a tangbunga che nata a mang ha hongtok noning mo?

¹³Hale a man a mu inko; a thianga kein nang ni jiang kati ani, a manglui somkuo leikuo nek a hava an khat lam han a ning asat puidet.

¹⁴Hi ang hin ashinngai khat hi a mang rang ha, vanram ma om nan pa lungdo nimak.

¹⁵“Hiva khel la nan u, nan nai ning nang jiang siatna a tho inko; che innang ama ama sial na ha nang le ama nan thei jak nan om lai han hong ri pero.

¹⁶Tak-ha a man na chong ri ha ana ngaipemak inko, nang le kan ruaia midangkhat animakle anni khel la tuangdero; haninko mi anni animakle an thum an bai sua shakhi chongir na a om,

¹⁷hale a man anmani chong ri a a ngaijotmak inko, biakinn jiang man jetro, tak-ha a man biakinn chongtenna a ngaijotmak inko, nang le ko ama ha a dangjat khat mi le khasana chom khat anga ni rase.

¹⁸“A thianga kein nang ni jiang ka na ri ani, nang nin ramuol la nan khit rakip ha; vanram han nom khit nanti, hale nang nin ramuol la nan ma sua rakip ha, vanram ha nom ma sua nati.

¹⁹“Veikhatret kein nang ni jiang kati, ha ko; ramuol la nang ni karra mi annin imo khat lam ranga an kan jot inko; vanram ma om ka Pa ning om anmani jiang hong man tung nati.

²⁰Ajarko kei ka minga anni animakle anthumin an kan chun na han anmani karra kei om ka om.”

²¹Hava suale Pitar in ama jiang a honga a ti, “Puma ka u ka naingain kei jiang siatna an tho karra vei ijetmo ka ngaidam rang? Veisari khan mo?”

²²Jisun ama jiang a ti, kein nang ni jiang “Veisari jak kati nimak; tak-ha sari a veisom sari khan na ka ti ke.”

²³Hiva jarra vanrengram ha ko, rengkhat in a suakngai le alutna le achena rakip asat en man dik na a nei jot khat anga ani.

²⁴Hale a man en mandik atel a hong phut han, talent lishing som tual mi khat ama jiang an hong tuang.

²⁵Tak-ha a man ashak tor mak jarra, a itual lim shakna rang “A ma le a lomnu, a naingai hale a nei rakip ha juarru,” tihi a neipupa ning chong a bejui.

²⁶Hiva jarra suak ha ning a mai kung a akuna a hong ti, ka Puma a pha a lek na ngakdiro; hale kein nang jiang ka na sak ver rang ke.

²⁷Hava suale suak a neipu ha ning lungsiat a mu a masua na anei jui; hale atual lim ha a bangpejui.

²⁸Tak-ha a suak len jiang a chea, ama le suak chang suam dinar riakhat amata tual ha a mu jui; hale a kut a khit a ol amet a ti; keita natual ha na petaro.

²⁹Hava han asappa suak ha ning ama ke kung a akuna a hong ti; a pha a lek nangak diro, hale kein nang jiang ka na sak ver rang ke.

³⁰Hale a man luijotmak, tak-ha a chea a man atual lim a shakkhir maje ren inna a thunjui.

³¹Hava han a suak changpui suamngain a i suak ha an mu pha han a tam tak an lui pong, hale anmani an neipu jiang an honga a i suak rakip ruia an lui ri.

³²Hava suale a neipupa ning ama ha a hongkuia, ama jiang a ti, a salui suak, nang in kei jiang na na lam jarra natual rakip ha kein ka na luingaidam,

³³Kein nang jiang ka na lungsiat anga, nang innom na sap suak nan chang suam jiang lungsiat tor noni che mo?

³⁴Hale a neipu a lung a thak, a man atual lim ha a sakhir maje; khodengthei pektorngai jiang a pelutjui.

³⁵Hiva jarra nang ni rakip in, nan u nan nai ma sial na ha nan lung sung tenna ngaidam nan nei mak inko; “Vanram ma om kei ka Pa ha ning nang ni jiang hingahin tho nati.”