Read Aimol MATHIU 2 Bible Online

MATHIU 2 - Aimol bible

MATHIU 2

¹Herod ning reng a chang lai Judia ram sunga Bethlehem khopui han Jisu nai alui chang. Han ni sua tianga arshi rabutheingai Jerusalem ma an lui hong,

²“Jiwngai reng an nei thar naite ha hon mo a om anti? Ajarko, kein ni sua tianga ama arshi a suak ha kan mu, ama chubeibuk ranga kan hong ani.”

³Hiva chong hi reng Herod ning a jet pha a ning a dong jui, hale Jerusalem ma a om mirakip in om an ning alui dong.

⁴Herod ning thiampulianngai le dan ojangai ha a kuikhomma, “Khrista ha hon mo nai a chang rang tia alui dingkel.”

⁵A ma jiang anti, “Judia ram sunga Bethlehem ma ani,” ajarko, “Judia ram sunga Bethlehem, nang ko Judia vai hom karra a sin tak nima che, ajarko, ka mi Israelngai vai hom rang le lam kai rangpa nang jiang an phut hong suak nati.’ Tia Pathian tashantheingai ning hingahin anti.”

⁷Herod ning arshi ha i tik lai mo nan mu tia arshi rabutheingai jiang rukchian na alui dingkel.

⁸han, ama ning anmani ha Bethlehem ma a tirra, nang nin che nang, naite ruia asat a vatokru, hale kei ning om chubeibuk na rang, ama nan mu le chong na hongmanjetru a ti pe.

⁹Rengpa chong ri ha anmanin an jet a an che jui, han, ni sua tianga an lui mu arshi ha naite om na tak a ngir maje an ma don an shonga an che jui.

¹⁰Arshi ha an mu pha han ningsat na khel la an lui nei.

¹¹Hale, inn sunga an lut a anmanin naite le a nu Mari an mu jui, an khup an bilinga chubei an buk, an kutchoiphur ha an longa rang ka chak, sariakrimhui hale bero an lui pek.

¹²Herod jiang kirmak na ranga an manga Pathian ning a manjet jarra, lam dang khattiang an loija an ramtiang an che jui.

¹³Anmanin an che suapha, Puma thaneithiang ha ning Josep a manga a mankanmua a ti, “Naite ha a nu le tuang in lang Ijip ram ma tantaru, han kein chong ka na pek mak kar je son hong om ru, ajarko, naite hi Herod ning that ranga hong rang ani.”

¹⁴Josep ning a thuia nai le a nu ha a tuanga Ijip tiang jan na an tan jui.

¹⁵Herod a thi mak kar je Ijip ram ma an om jui, hiva hi Puman tashantheingai bai sua a alui ri, “Kein ka nai pasalnai ha Ijip an phut ka kuirangke ti ha tung na ranga ani.”

¹⁶Nisua tianga arshi rabutheingain an na huang jui tihi, Herod ning a jet pha, a lung tam tak a thakjui, ama ning arshi rabutheingai tenna arshi leisuak ha a jet nuk juia Bethlehem khosung le khosir khopang a om pasalnai kum ni thuoilim that ranga chong a pek a atirjui.

¹⁷Pathian tashanthei Jeremia in alui ri ha tung na ranga ani.

¹⁸“Rama rasa an khat an jet, chayangsiarra a chap ha ani, Rachel in a naingai rang a chap; a chap ha mathem tor timak, a naingai an thi suaver jarra.”

¹⁹Herod ning a thi suapha, Ijip ram ma Josep a manga Puma thaneithiang khat in a mankanmu a ti.

²⁰“Thui in lang nai le a nu hi tuang in lang Israel, ram ma che taru; ajarko, naite that rang tipa ha a thi jui.”

²¹A man a thuija an nucha ha a tuanga Israel ram ma an hong jui.

²²Tak-ha Judia ram ma Arkhelos ning, a pa Herod rahut reng achangti chong a jet pha, Judia ram ma che rang hi alui chit, han, a manga Pathian in a manjet jarra Galili ram khat tiang lam alui loijui,

²³Nazaret anti khuo han an hong om jui, “A ma Nazaret mi anti rang ke” tia Pathian tashantheingain an lui ri ha tung na rang ani.