Read Aimol MATHIU 20 Bible Online

MATHIU 20 - Aimol bible

MATHIU 20

¹Ajarko vanrengram ha, darkha rahuan na chuan sin mi a tok jingtiang man a suak inneipu khat anga ani.

²A man chuan sin mingai le ni khat lo man, dinar an khat an kan jot; a man anmani ha darkha rahuan na atirjui.

³Hale a man dar thum ten han an honga, kaithialla chuan sin lui a an ngirra an om adangai ha a mu jui,

⁴Hale a man anmani jiang a ti, nang ni om darkha rahuan na cheru; hale kei ning pe rang suak ha nang ni jiang na pek kati ati, hale anmanin an che jui

⁵Veikhatret a man dar karuk le dar kua pha han a chea, hangan chuan a hongthojui.

⁶Hale dar somleikhat pha han om a man a chea, adangngain an ngirra sin rang buia an om ha a mu a, hale anmani jiang a ti, ita mo nang nin sun sot i om sinluia nan ngirra nan om?

⁷Anmanin ama jiang anti, ajarko tu ning om keini hi chuan sin na manlo ma u; a man anmani jiang a ti, nang ni om darkha rahuan na cheru; mu rang suak ha nang nin mu nanti.

⁸Nitaktiang a hongni pha han inneipun, ama chuan rakip a man varra mi jiang a hong ti; “Chuansinngai ha kui nang aphut ten le a torna khan na an lo man ha pero.”

⁹Hale dar somleikhat pha han chuan sin a hongngai ham lo man dinar an khat an mu.

¹⁰Tak-ha a phut na tena alui hong anmanin, kheldet kan mu rang ke tia an lui ngaidon; tak-ha anmani om ha ang han akan angrip a mi khat dinar an khat jak an lui mu,

¹¹hale anmanin hava ha an tum kar han, inneipu jiang an jek nunuoijui.

¹²An hong ti, a torna dar khat jak chuan sin hiva mingai le; sun sot a lum kanduia kan sin keini le lo man hi na man kan angver.

¹³Tak-ha a man anmani karra khat jiang a sanga a ti, “Ka sap kein nang jiang ani lui tho making, kei le nang hi dinar an khat hin kan kan jot mo nimak?

¹⁴Nangta lui nang chetaro, nang jiang ka na pek ang hin nuktah a ahong mi jiang om ka pe rang hi ka lungdo ke.

¹⁵Kei kata ka lungdo ka tho han, imo ani lui a om; animakle kein ka sat jarra nang in om kei hi na na en lal mo?”

¹⁶Hiva jarra nukkei ha ning ma sat ni nati, “Hale masat ha ning nukkei ni nati; ajarko a tam lam an kui tak-ha aviar jak an thang.”

¹⁷Hava suale Jisun Jerusalem ma a chea, a thiamruoi somleini ha a dang khat tiang a tuanga lam ma anmani jiang a hong ti.

¹⁸“Enru, kein in Jerusalem tiang kan kal la kan che; hale Mi Pasalnai ha thiampulianngai le dan thei ojangai jiang pe nanti u, hale anmanin ama ha thina rang khan na siatna man nei nanti.”

¹⁹Hale ama ha, a dangjatngai jiang nuiso na rang, adik khana vena rang le khros that na rang pe nanti hale ni thum chang na han ama thui khir nati.

²⁰Hava han Zebedi a lomnu ning a pasalnai anni le ama jiang a honga, akuna ama jiang chubei a buk a chonglungsiat alui lam.

²¹Hale a man numeinu jiang a ti, “Nang imo na dei?” A man ama jiang a hong ti, “Nang na rengram han ka pasalnai anni hi; an khat lam na chang tiang hale an khat hi na veitiang ong na ranga na jot pero.”

²²Tak-ha Jisun a hong shanga a ti, “Nang in nilam ha nang in jet ma che;” kein ka in rang kok lai ha nang nin nan in tor rang mo? Hale kei ka baptais tho ha nang nin tho tor niche u mo? Anmanin ama jiang “Keinin kan tor,” anti.

²³Hiva jarra a man anmani jiang a ti, “Nangning kei kok lai ha inko intor nanti; hale kei ka baptais tho ha ang han tho ko tho tor nanti; tak-ha kei chang tiang le veitiang ong ha ko kein ka na pe rang nimak, tak-ha hivahi ko kei ka Pa ning anmani rang avarpengai ranga ani.”

²⁴Hale somngai ha ning hivahi an jet karra, anmanin uchangai anni chunga an lui rang.

²⁵Tak-ha Jisun anmani ha akola a kui a a ti, “A dangjatngai a lutir anmani an neipu an chang hale anmani a lian changngai ha ning anmani chunga a neipu khat changa chuan an tho tihi nang nin nan jet jui.”

²⁶Aninnom nang ni kara ko hi anghin nimak tak-ha, tu aninom nang ni karra a lian chang jot ha ning, nang ni chuan tho ha ni nati.

²⁷Hale tu aninom nang ni karra a phut na tak a chang jot ama ning, nang ni suak chang nati.

²⁸Hi anga Mi Pasalnai ha ning a tak sepa man kan tho ranga i hong nima tak-ha a man misepa tho ranga ahong ani, hale mirakip masua na man ranga a ringkhuo akanpek ani.

²⁹Anmanin Jerikho tenna an hong suak han mitam in ama ha an lui hong jui,

³⁰hale enru, mitdel pasal anni lam sirra an lui ong, anmanin Jisun a honglon tihi an jet, an hong khek anti, David a pasalnai, O puma, keini na lungsiatro.

³¹Hale mitamngain anmani ha om chianru tia anlui kheksan, tak-ha anmanin khel la an lui hong khek anti, “David a pasalnai, O puma, keini na lungsiatro.”

³²Hava han Jisun a ngirra anmani ha akuia a ti, “Nang nin kei imo ka tho rang nan dei?”

³³Anmanin ama jiang puma, “Kan mit na man varpero” anti.

³⁴Hava han Jisun lungsiat a mu a anmani mit a sit pe jui, hale hava phatak han an mit a varjui, hale anmanin ama ha an mu jui.