Read Aimol MATHIU 21 Bible Online

MATHIU 21 - Aimol bible

MATHIU 21

¹Anmanin Jesusalem an hongnaija, Olib tangbunga a om Bethphage an honga, Jisun a thiamruoi anni alui tir.

²Anmani jiang a ti, “Nan madonna a om khuo son cheru; hale nang nin sakuarkap khat a te le ankhitchun nan mu rang ke han anmani ha shudnang kei jiang hong tuangru.

³Hale tu ang khat in nang ni jiang imo khat a tinko, ‘Puman anmani hi anemnarang a om tia nang nin nanti rang ani’ hale havaphat tak han a man anmani hong tir len nati.”

⁴Hiva rakip hi tashanthei ning alui ri chong ha tungtheina rang ani.

⁵Zion charjuarngai jiang tiru, “Enru nan rengpa nang ni jiang a hong; alungnem, hale sakuarkap a chuanga a hong.”

⁶Han a thiamruoingai amanche, Jisun chong a be anga an hong tho jui.

⁷Amanin sakuarkap nucha an hong choia, hale a chunga an puan anpha; hale puma ha an man a chuang jui.

⁸Hale mitam tak in lamlaia anphuansi anpha, a dang mingain thingchang anthak lamlaia an lui chai.

⁹Hava suale a nuk jui le amadontiang che, mitamngain an hong khek “Hosana David a pasalnai jiang Puma minga a hong a maha ravansat ani; chungnungtak Hosana” anti

¹⁰Hale a man Jerusalem ma a hong lut han, kholian rakip sunga a hong kan nok anti, “Hivahi tu mo?”

¹¹Han mitamngain anti, “Hivahi Jisu ke; Galili ram ma Nazaret khuo a tashanthei ani.”

¹²Hava suale Jisun Pathian biakinn sunga a lut jui, biakinn sunga achokngai le ajuarngai rakip ha a notchei; hale peisachuoi kaina, tebole khunu juarngai ong na ha amalet peverjui.

¹³A man hava mingai jiang a ti, “Hivahin alui kan jiak sake ani; kei ka inn ha lam na ranga inn anti rang ani, tak-ha nang nin arukngai om na lam nan manchang jui.”

¹⁴Hava suale mitdel le kekiakngain, biakinn sunga ama jiang an lui hong; hale a man anmani ha alui mandam.

¹⁵Tak-ha thiampulian le dan thei ojangain ama ning a tho a ngak pa chuan ngai ha naipangain biakinn sunga an hong khek anti, “Hosana David a pasalnai jiang, tihi an mu karra anmanin an lui rang.”

¹⁶Hale ama jiang anti, anmanin an ri hi nang in na jet mo? Hale Jisun anmani jiang a hong ti, “O ka jet, naipangte le ranu in ngai bai sua tenna nang nin an man pakna ha lungdo nan man tung pe jui, ti ha nang nin pa chil ma che u mo?”

¹⁷Hava suale a man a mun ha a mak, khopui tenna a suak Bethani alui che, hale hava han avariak jui.

¹⁸Khuo a var le a man khopui han, alui hong kan le khir pha han a von alui cham.

¹⁹Hale lam sirra om theichang kung ha a mu, a man hava mun han alui hong, tak-ha ana nilui a dang lui mu demak, hale a man a hong ti, “Nang jiang a phat rakip a ra nei lui ha nita rase,” hale hava phat lai tak han thei chang kung ha alui char jui.

²⁰Thiamruoingain hivahi an mu karra, an ngak chian na an hong ti; “Ija mo thei chang kung hi ning hingahin a rak a achar hi?”

²¹Han Jisun a hong shanga anmani jiang a ti, “A thianga kein nang ni jiang kari ani; nang nin takngai nan neia kei chi keiok nan nei mak inko, theichang kung a an tho jak ha nan tho rang nimak; tak-ha nang nin tangbung hi jiang kan thon in lang tuionglian na vakan peiro, nanti innom, hongni nati.”

²²Hale i aninom nan lam karra, nan lam phur rakip ha kan mu rang ke tia takngairu.

²³A man biakinn sunga a honga, amanchu lai tak han thiampulian le mi ulianngain; ama jiang an hong ti, “Nang in iranak mo na nei hingai hi na tho? Hale hiva tho torna ranak hi tu ning mo ana pek?”

²⁴Tak-ha Jisun anmani jiang a hong sanga a ti, “Kein nom nang ni jiang imo khat na dingkel rong; nang nin kei jiang nan na ripe inko, kein nom hiva ngai hi iranak a mo ka tho tiha nang ni jiang na ri pek ati.

²⁵Johon ning baptais alui tho ha hotenna mo? Vanram tenna mo animakle mingai tenna mo?” Hale anmanin, mashia an kanshiama anti, kein in vanram tenna ke kan ti le a man keini jiang na hong ti nati iruija mo ama ha tak nan luingai lui?

²⁶Tak-ha kein in miring tenna ke kan ti le, mitamngai hi kanchit; ajarko miringngain Johon hi tashanthei khat ke tia an lui.

²⁷Han anmanin Jisu jiang an hong shanga anti, “keinin jet mashing;” hale a man anmani jiang a ti, “Kein iranak amo hiva ngai hi tho torna ka nei tiha nang ni jiang kein nom ri noni king.”

²⁸“Tak-ha nang nin imo nan ngaidon? Pasal khat in a pasalnai anni alui nei, a man a nai ulian jiang a honga a ti, ka nai ve enni che nang darkha rahuan na chuan vasinro.”

²⁹A man a hong shanga a ti, chenoning tak-ha nuk a alim akansirra a che jui.

³⁰Hava suale a man a nai anni chang na jiang a honga a rapa anga a ti, hale a man a hong shanga a ti; kein che kati a pa, tak-ha a man chemak.

³¹Anni shung hin tu lam ning mo a pa lungdo a tho? Anmanin ama jiang anti, “Arapa ha ke;” Jisun anmani jiang a ti, “A thianga kein nang ni jiang ka ri ke khasana chomngai le mihurngain nan madonna Pathian rengram han an lut.”

³²Ajarko Johon ning dik na lama alui hong, hale nang nin ama ha tak luingai ma che u; tak-ha khasana chomngai le mihurngain ama ha tak an luingai; hale nang nin nan mu pha han, nang nin ama ha takngai na rang, nang ni nan lung thul ma che u.

³³Adang tetanna khat ngairu; inneipu khat alui om, darkha rahuan atho a, areitang pal a khar verra darkha ri somna rang mun khat a sin na hale inn khat om a sin darkha en ranga mi khat jiang a man shalla a dang ram lak khat a a che jui.

³⁴Ara khomna rang a hong nai pha han, a man ashal mingai jiang itum rang a ra hong lui ranga a suakngai ha alui tir.

³⁵Hale ashal mingai ning a suakngai an khat ha an vea; a dang khat ha an that, hale a dang khat lam lunga an deng.

³⁶Veikhatret a man a rapa nek a tam det suakngai alui tirret, hale anmanin a dangngai anga an lui tho ret jui.

³⁷Hava suale ama ning kanai hi ko chitlejak an nei rang ke tia a man a pasalnai ha vei khat a tirret.

³⁸Tak-ha rahuan en mingain a pasalnai nai ha an mu kar han anmani masia an kan ti, hivahi inn le ruo tum rangpa ke, hongru, keini ning ama hi that innang a man itum rang rakip ha tumrei.

³⁹Hale anmanin ama ha an churra darkha rahuan va ralla an dengjuanna an that jui.

⁴⁰Hava jarra darkha rahuan aneipun a hong pha han, “A man ashal mingai jiang imo a tho rang?”

⁴¹Anmanin ama jiang anti, “A man mi saluingai ha man mangver na ta, hale, a ra a pha phava ama jiang an pek rang a dang khat mi jiang darkha rahuan ha manshal nati.”

⁴²Jisun ama jiang a ti, “Innsinngain an dei luitak lung ha ning inn ki duirang lung a hong chang hivahi puman i tho ke ani, hale hivahi keini mitda kan mu hi, pathian ning a tho alui ni. Nang nin chong thiang sunga i om ha luipa chil ma che u mo?”

⁴³Hiva jarra kein nang ni jiang kati ani, “Pathian rengram ha nang ni jiang tenna lui khir nati, hale a ra man nei rang jatdangngai jiang pe nati.”

⁴⁴Hale hiva lung chunga a chul ama ha a her ahak kui nati, tak-ha hivahi ning a chunga a chul ama ha vut ang noi nati.

⁴⁵Thiampulianngai le pharisingai ama tetanna an ngai karra anmani ha an nati na ke tia an lui ngaidon.

⁴⁶Tak-ha anmanin ama ha churna ranga an lui tok innom, anmanin ama ha tashanthei khat ke tia an lui ngaidon jarra, mitamngai han an lui chit.