Read Aimol MATHIU 22 Bible Online

MATHIU 22 - Aimol bible

MATHIU 22

¹Hale Jisun anmani jiang vei khat tetanna ari a a hong ti.

²Van rengram ha ko, a pasalnai mui ruoi ranga sin var reng khat anga ani.

³Hale mui ruoi na han kui na an mungai ha vakuitaru tia a suakngai ha alui tir, tak-ha anmanin lui hong ma u,

⁴Veikhatret, a man a suak dangngai ha hingahin atia a luitiret, an tinsha mingai jiang han vatiru enru bukheng don rang ha ka kan ning jui, siratchal anoltakngai ha an that i rakip an tor jui mui ruoi na han hongtaru.

⁵Tak-ha anmanin tak telluia an lungdo an lui che, an khat ning ama phailuia, a dang ha ning laloul a che jui.

⁶Hale adangngain ama a suakngai ha an churra, esella an tho pea, anmani ha an that jui.

⁷Tak-ha rengpan havarui a jet karra, a rangjui; hale ama aralmingai a tirra, mi thatngai ha a manmang a hale an khuo ham mei an vahaljui.

⁸Hava suale a man a suakngai jiang a hong ti, mui ruoi na rang i rakip kan tor jui, tak-ha kui na an mungai ha lui suak lai ma u.

⁹Hiva jarra nang nin lamlianna che in nang nan mu rakipngai ha mui ruoi na hin vakuiru.

¹⁰Han suakngai ning lamlianna an chea, mi sat le misatlui an mu rakip an hong kui manchunna; hale a hong lut rakip in muiruoina mun ha an sipjui.

¹¹Tak-ha rengpan khuolmingai ha en ranga a hong lut pha han, mui ruoi puan tho lui mi an khat a man a mu jui.

¹²han amam ama jiang a ti, ka sap, nang ko mui ruoi puan tho lui hivahin ija mo na hong lut? Hale ama ha chong ri torlaima.

¹³Hava suale rengpan a suakngai jiang a hong ti, “A ma hi a kut a ke khit in nang, tualla a jing karra dengjuanru; hava mun han chap le harialna nei nati.”

¹⁴Ajarko mitam ha an kui, tak-ha aviar jak an thang.

¹⁵Hava suale pharisingain an chea, ama hi a chong ri a ija mo kan chur rang tia chong kansiamna an lui nei.

¹⁶Hale anmanin Herod chong le kan ruaia an suakngai ama jiang an tirra an hong manti, “Oja,” nang ko na dik, “Pathian lam ha adik na man chu, animakle tu khat om chit ma che, ajarko nang ko miring mitmai en ma che tihi kein in kan jet.

¹⁷Hiva jarra keini jiang na ri pero, nang in imo na ngaidon, Keisar jiang khasana pek hi dan chong jui lui mo ani?”

¹⁸Tak-ha Jisun an satlui ha a jet a hong ti, “A sat kan rol ngai, iruija mo nang nin kei hi nan na en sin?”

¹⁹Khasana peisa ha kei jiang na doperu, han annanin Dinar khat ama jiang an hong choi.

²⁰Hale a man anmani jiang a ti, a ra mil le a mel hi tuta mo?

²¹Anmanin ama jiang anti, “Keisar ta ke han a man anmani jiang a ti; hava jarra Keisar ta ha Keisar jiang; hale Pathian ta ha Pathian jiang peru.”

²²Anmanin hiva chongngai hi an jet pha angakjui hale ama ha an mak a an che jui.

²³Hiva nikhuo len hin ringkhir omak anti sadusingain ama jiang an honga an lui dingkel.

²⁴An hong ti, “Oja” Mousi ning alui ti, a nai om lui a pasal khat in a thi inko, ama ulenai khat in ama a numei ha nei ret rashe, hale a u a nai ranga achi kei sua rashe.

²⁵keini karra pasal sari ulenai an lui om, ulianpa ha ning numei anei suale a thi jui, hale nai a nei mak jarra, a nai pangpa jiang amak pe jui.

²⁶Anni chang na, an thum chang nale sari chang na khan na ha ang han anni ver jui.

²⁷Hale an renga a torna han numeinu om a thi jui.

²⁸Hiva jarra ringkhir ni han numeinu ha anmani sari karra tu lomnu mo a chang rang? Ajarko an renga ama ha an lui nei.

²⁹Jisun anmani jiang a hong shanga “Nang ni diklai ma che u, chong thiang rabu le Pathian ranak jet lai mak che u” a ti.

³⁰Ajarko ringkhir nikhuo han anmanin mui ruoi ma u hale anmani ha mui an kanruoi kan pek ma u, tak-ha Pathian vantir thaneithiang anga vanram ma an om.

³¹Tak-ha a thingai ringkhirna ruia, nang ni jiang Pathian nin a tihi nang nin pa ma che u mo?

³²“Kei ko Abraham, Isak, Jakob Pathian ha ka ni, pathian ko athingai Pathian nimak tak-ha a ring ngai rang ka ni alui ti.”

³³Hale mitamngain hava ha an ngai karra a man a man chu na ha an lui ngak jui.

³⁴Tak-ha a man sadusingai ha man kan shang torlaima ti ha pharisingain an jet karra, anmani an kan chun jui.

³⁵Hava suale anmani karra dan thei an khat in ama ha en sin na chong dingkel nakhat anei a a ti,

³⁶“Oja dan chong pek sunga hotak ning mo chong be a lian tak ani?”

³⁷Jisun ama jiang a ti, “Nang in puma na Pathian ha na lung renga na thavang pumpuia hale na lung ril pumpui le kan ruai a lungsiatro.

³⁸Hivahi a phut nale a lian tak chong be ke ani.

³⁹Hale anni chang na ha hi ani, nang in na inn ri inn tang ha na tak khet anga na lungsiat rang ani.

⁴⁰Chong be anni hi ning dan chong le tashantheingai chong a bo ver jui ani.”

⁴¹Pharisingain an kan chun verlai, Jisun anmanin jiang a hong dingkel,

⁴²“Khrista ruia nang nin imo nan ngaidon? Amai tunai pasal mo ani? Anmanin ama jiang, David a pasalnai ke, anti.”

⁴³A man anmani jiang a ti, “Ija mo” David in thavang tianga ama ha puma tia a kui?

⁴⁴“Puman ka puma jiang a ti; kein nang ana en dangai ha nang na ke thuoija ka siak maje, ka chang tiang ongro.”

⁴⁵David ning ama ha puma tia a kui inko, ama a pasalnai ija mo ani?

⁴⁶Hale tu khat innom ama jiang chong khat om lui shang torlai ma u, animakle hava nikhuo tenna tu khat innom ama jiang ngamtak chong dingkel torlai ma u.