Read Aimol MATHIU 4 Bible Online

MATHIU 4 - Aimol bible

MATHIU 4

¹Hale, Thavang ning Jisu ha ramtong lian na seitan ning mathemna rang a tuang jui.

²Sun sommanli le jan sommanli a man bu a ngei pha han, ama a von a chamjui.

³Seitan in a honga a ti, “Nang Pathian Pasalnai ha naninko, hiva lungngai hi bu chang na rang chong pero,”

⁴Jisun a hong sanga a ti, hingahin a kan jiak sake, mi ning bujak han ring na nimak, tak-ha Pathian baija an phut a hong suak chong han ring na ani.

⁵Hava suale seitan in Jisu ha a thiang khopui han a tuanga, hale biakinn chungshang tak han a man ong.

⁶A ma jiang a ti, “Pathian Pasalnai ha naninko, kan chom thakro, ajarko hingahin a kan jiak sake, Pathian in nang ranga thaneithiangngai ha chong benata, hale na ke na theng khiakmak na rang anmanin an kut an na lui pom rang ke”.

⁷Jisun ama jiang a ti, “Hingahin a kan jiak, nang in na Puma ha ensinthei noni che.”

⁸Veikhat seitan in Jisu ha tangbung shang tak khat chunga a tuanga, ramuol chunga rengram le ma hok lian na a man mu.

⁹A ma jiang a ti, “Nang in na kunna chubei nanabuk inko hiva rakip hi ki na pe rang ke.”

¹⁰Han Jisun ama jiang a ti, “Chetaro seitan, ajarko, hingahin a kan jiak sake, nang in na Puma na Pathian jak ha chubei na buk rang a suak.”

¹¹Han, seitan in a mak jui, enru, thaneithiangngai an honga, Jisu ha an hong sanjui.

¹²Johon an churra ren inna an thunjuiti Jisun a jet pha Galili ramtiang a che jui,

¹³Nazaret khuo a mak Zebulun le Naphtali ram sunga tui sirra om Kapernam anti khuo han a om jui.

¹⁴Hivahi tashanthei Isaia ning alui ri chong ha tung na rang ani,

¹⁵“Zebulun ram le Naphtali ram, tui khamma om Jordon va ralla Galili jatdangmingai.

¹⁶Ajing mun na a om mingai ning var a lian khat an mu jui. Hale thina ram sung le thina nilim thuoia omngai chunga a hong varjui.”

¹⁷Hava pha tenna Jisun Pathian chong ri a phut a ti, “Nan lungthulru, ajarko vanrengram ha a nai jui.”

¹⁸Jisun Galili tui khamma a hong lon na, Pitar, Simon om anti a naipangpa Andrew ngai ucha, ngachurmi anni jarra, tui sunga len an vorra nga an tok ha alui mu.

¹⁹A man anmani jiang a ti, “Kei na juiru, han kei ning len vorra michur na man changkati.”

²⁰Hava phatak han an len an mak a ama an jui jui.

²¹Hava tenna an hong chea, Zebedi a nai, anni Jems le a naipangpa Johon, rokuang sunga an pa Zebedi le len an shui ha a mu uchangai ha a kui jui.

²²Hava lai tak han anmanin rokuang le an pa an mak a manuk an jui jui.

²³Hava suale Jisun Galili ram pumpuia a chea, Sainagok sunga rengram chongsat ruia alui man chu, hale nat rakip le ritong rakip mingai ha alui mandamjui.

²⁴han ama chuan sat tho na ruihi Sairia ram pumpuia a thangjui, adamtorlui natsat, ritong khodengthei, khotangriabuk in a choi, a ke a pang her khat a thi rakip a kol la an hong choi a alui mandamjui.

²⁵Hale Galili, Dikapoli, Jerusalem Judia, an khat om Jordan khel la om mitamtak in a nuk an lui jui.