Read Aimol MATHIU 8 Bible Online

MATHIU 8 - Aimol bible

MATHIU 8

¹A man tangbung tenna a hong chum han, mitamin ama an lui jui.

²Hale enru, pangpharpa tuiritong khat alui honga chubei han buk a ti; “Puma na najotpe inko, kei hi na na mandamtor.”

³Han, Jisun ama ha a shitda a ti, “Kein ka jot nang thiangtaro,” hava lai tak han pangphar ritongpa ha a luithiangjui.

⁴Hale Jisun ama jiang a ti, “Enro, tu jiang khat om ri maro; tak-ha chero, thiampu jiang hong kandoro, hale Mousi chong pek nuk juia pek rang phur ha pero; anmani jiang shakhi khat chang na rang ani.”

⁵Atun, Jisun Kapernam a lut pha, ralmi riakhat neipu han ama jiang lam na a nei.

⁶Ahongti, “Puma ka suak khat hi a pangher khat athi a, khodengthei tak a inna ajalla a om,”

⁷Jisun ama jiang a ti, “Kein hong ka ta ama ha mandam kati.”

⁸Ral mi riakhat neipun a hong shanga a ti; “Puma ka inna ni hong rang hi ka rahui nima,” tak-ha na chong bejak han ka suakpa dam nati.

⁹Hiva jarra kei om ranakneingai thuoi a om khat ka ni; kei thuai han nom ralmi an la om, hale kein hiva mingai jiang chero ka ti le an che, a dang khat jiang hongro ka ti le an hong; hale ka suakpa jiang hivahi thoro, ka ti le an tho.

¹⁰Jisun hivahi a jet a a ngak banna a nukjuingai jiang a hong ti; “Kein a thianga nang ni jiang kati, kein hiva mi ang hin takngai a nei mi Israel sunga la mu making.”

¹¹Hale kein nang ni jiang kati, “Nisuatiang le taitaktiang mitamtak hong nanti u, Abraham, Isak, Jakob le vanrengram han ongsuam nanti.”

¹²Tak-ha rengram neipu naingai ha ko, a jing na mun tual tiang han deng juan nanti; hava han chap le harialna na mun ni nati.

¹³Han, Jisun ralmi riakhat neipu jiang a ti, “Chetaro, na takngai na nuk juia nang jiang dam ha ni rase, hava phat tak han a suakpa natha a dam jui.”

¹⁴Atun Jisun Pitar inn na a honga, Pitar a tarpining a tunna a jal ha a man alui mu.

¹⁵Hale a man a kut a sitpea, a tun ha a dam jui ha suale a man a thuia an sepa a tho pe jui.

¹⁶Nitak a hong ni pha han sat mak thavang in a choingai ha mitamin ama jiang an hong tuang hale a man sat mak thavangngai ha chong khat jak a a notchei a natngai ham alui mandam.

¹⁷Hivahi tashanthei Isaia in alui ri ha tung na ranga ani. “A man keini kan tor mak na hale natna kan nei rakip ana lui choipe.”

¹⁸Atun Jisun mitam akola an om ha a mu a varaltiang an che na ranga man chong alui pek.

¹⁹Hava suale dan oja khat in a honga ama jiang a ti “Oja na che na rakip hin kein nom na juirong,”

²⁰Hale Jisun ama jiang a ti “Melangngai om khur an nei, hale chunga vatengai in rabu an nei tak-ha Mi Pasalnai rang ko a lu siakna rang mun om mak.”

²¹A thiamruoi khat in ama jiang a ti, “Puma kein ka Pa ruok ha man chebak kati.”

²²Tak-ha Jisun ama jiang a ti, “Kanuk na juiro,” hile a thi ngai ning anmani a thi ngai ha ruak kan re nanti.

²³Atun a man rokuang sunga a lut a a thiamruoingain ham an lui jui.

²⁴Hale jet lui thai lui a tuipuilian han rua le phaivuolian a honga tui kan nok ha ning rokuang ha akhude, tak-ha ama ko alui jal.

²⁵Hava suale a thiamruoingain an honga ankei thuia anti Puma na sanro, keini thirang kan ni.

²⁶Tak-ha a man anmani jiang a ti, “Ijarra mo nan chit, o takngai torlui ngai,” han a man a thuia phaivuo le tuipuilian ha akhapjui, hale a dai riai jui,

²⁷Hale mingain an ngakreia an hong ti, “Phaivuo le tuipuilian innom a chong an jui hi ko imimo ani?”

²⁸A ma ning varal tianga om Gadara ram ma a hong pha han thantang tenna a hong suak seitan in a choi miring anni le an kantong anmani ha chit rang om tak anni jarra tu khat innom hava lam ma luichetor ma u.

²⁹Hale jet lui thai lui a an hong khek anti, “Jisu Pathian Pasalnai nang le keini hi imo kan suak, a phat animak ma keini hi man pong kati tia nang na hong mo?”

³⁰Anmani le aviar kanlakdet le vok tamngai rup khat an chak an lui om jui.

³¹Seitan in ama jiang chong lam na an nei a anti nang in keini hi na na notchei inko vok rupngai jiang keini che ranga na jot pero.

³²Hale a man anmani jiang a ti, “Cheru,” han anmani ning, an hong suak vokngai jiang an lut jui, hale jet lui thai lui a vok rupngai ha an kansuklet lamsuk tiang an hong tanna tuipuiliana an chulla an thi jui.

³³Hava suale a selngain an tanna, khuo sunga an lut i suak rakip le seitan in a choi mingai ruia an lui ri jui.

³⁴Hale enru, khuopum ma Jisu ha mu na ranga an hong suak jui, han ama ha an mu pha an ram ha a makpe na ranga chong lam na an lui nei.