Read Aimol MARK 1 Bible Online

MARK 1 - Aimol bible

MARK 1

¹Pathian pasalnai Jisu Khrista Chongsat a phut na ha hi ani.

²Pathian tashanthei Isaia rabu hingahin akansun “Enro, ka chongchoina madonna ka tir, a man na lam a na sinperangke;

³ramtong lian na mi an khat khek rasa han, ‘Puma lam lian sinperu, a lon na rang lam man tunru tia a ri anga ani.’ ”

⁴Johon Baptis han ramtong lian na a lon na siat ngaidam na rang “lungthulla tuija baptais tho na rang chong a ri titira a om.”

⁵Hale Judia ramrakip mingai le Jerusalem ma mirakip ama jiang an honga, an siatna ankanri, Jordan tuidunga tui a manlutjui.

⁶Johon ning saringsei amul han puan asia, savun kongkhit akong a khit, khoining, le khai a chak ani.

⁷Hale a man a ti kei kanuk a hong ama ha kei nek a a ranak a raht, ka kunna akekokrui kasut rang om kei ka rahui chang mak.

⁸Kei inko, nang ni tuija baptais kanaluimantho; tak-ha a man ko Thavang Thianga tuija baptais namantho nati;

⁹Havalai han Galili ramsirra Nazaret khuo an phut Jisu a honga Johon in Jordan tuidunga tuija baptais aluimantho.

¹⁰Hale a man tuija an phut a hong suaklim le, vanram a kan longa, hale khunu anga Thavang ha a chunga a hong chumma a man a mu jui.

¹¹Hale vanram tenna rasa an khat in, “Nang ka nai manrit tak na ni, na chunga ka lung a be a hong ti.”

¹²Thavang han ama ramtong lian han a tuang jui.

¹³Hale hava han ni sommanli a om, Seitan ning a ensinjui. Ramsangai le a man om, tak-ha thaneithiangngai an honga ama sepa an hong tho pe.

¹⁴Johon anchura ren inn na anthunpha, Pathian Chongsat a ri Jisu Galili hin a hong jui,

¹⁵hale a ti, “Aphat a tung jui, Pathian rengram ha a nai jui, nan lung thul unnang Chongsat ha takngairu a ti.”

¹⁶Galili pat sirra Jisu a honga Simon le a naipangpa Andrew pat a len anhongvora nga anchurha alui mu; ajarko anmani ngachurmi an lui ni.

¹⁷Jisun anmani jiang a ri, “Hong unlang na juiru, kein lenvora michur na manchang kati.”

¹⁸Hava pha anmanin an len an mak a anuk an jui jui.

¹⁹Hava mun tenna aviar alakdet a chea, a man Jebedi naingai Jems le a naipangpa Johon an rokuang sunga len anmanthiang alui mu.

²⁰Hale a man a mu lenle a kui jui; hava pha anmanin an pa Jebedi le a hong mingai rokuang han an mak a Puma ha an lui jui.

²¹Jisu le a thiamruoingai Kapernam khopui a an honga, hale veikhatna sernikhuo Jisu ning kan chun na inna alui manchujui.

²²Hale a mi manchuha dan a theingai manchu anga nimak, ranak nei tak a man chu a chang jarra a tam tak anluingakjui.

²³Hava lai tak han an kan chunna inna han thavang salui a lut mi an khat a hong lut,

²⁴hale a man a ti, “Nazaret hin a om Jisu, keini ijarra mo nanapholom? Nasuk khui namanmang rang mo na hong?” Nang tumo nani kan na jet, Pathian na an phut a thiang tak an khat ke nani, tia a hong khek.

²⁵Tak-ha Jisun aranna, “Omchianro, hale hava mipa an phut suakro; tiachong a pek.”

²⁶Thavang a salui han mipa a keituorra rasaring tak a a khek hale a suak jui.

²⁷Mirakip in hava a tam tak an lui ngak an karra an kan dingkel, “Hi imo ani? Manchuthar an khat nimak mo? A man thavang a samak ngai om ranak nei tak a chong a pek, anmanin a chong an jui anti.”

²⁸Hale a rak tak a Galili ram pumpuia ma hok na chong a thangjui.

²⁹Hava suale anmanin Sainagok ha an mak a Jems le Johon le kanroi a adingphit a Simon le Andrew inna an lut jui.

³⁰Simon a tarpi ha raitunna a nat a luia jal, Jisu jiang a nat chong ha a rak tak a an hong manjet.

³¹Jisun a kut a kei thui-a hale araitunnat ha a dam jui.

³²Nitak nilutpha, mingain adammakngai rakip le khonamngai in a choi rakip ama jiang an lui hongpui.

³³Khopui mingai rakip ha inn khar kung a han an hong kan chun jui.

³⁴A man a dang danga a nat mi a tam tak amandam hale khonam a tam tak anotcheijui, khonamngai ha khek ranga jotpemak, ajarko anmanin ama ha tumo ani an lui jet.

³⁵Jingtiang kho var mak ma mantak Jisu a thuia a dai ripna mun khat a a chea a man a lamjui.

³⁶Hale Simon le a kanruoi pui rakip in a nuk an juija, an mu pha,

³⁷ama jiang, “Mirakip in nang an natok,” anti.

³⁸Anmani jiang a ti, “Madon na khuongai sonnom kein in chong ri kan che chiak rang ke hava ranga kei kahongsuak le tia alui sang.”

³⁹Hiva jarra a man Galili ram rakip a che an kan chun na in rakip chong a ri, hale khonamngai anotcheijui.

⁴⁰Pangphar mi an khat Jisu jiang a honga, a khup a hong bilinga, “Nang in na najotpe inko na na man thiang tor,” tia a hong ri.

⁴¹Jisun a lungsiat, “Kein ka jot jui nang thiang taro a ti.”

⁴²Hava phatak han pangpharpa ha ama sua jui, hale ama a thiang jui.

⁴³Hava pha Jisun ama jiang chong a lut tak abea atirjui.

⁴⁴Hale Jisun ama jiang a ti, “Hiva hi tute jiang rimaro, tak-ha che in lang thiampulian jiang nabing jak hong kandoro, hale mingai jiang nang a thiang na chang na rang, Mousi chong pek nuk jui a kan bol na vaneiro a ti.”

⁴⁵A ni in om a man a chea, hava chong ha mun rakip arithang jui, a man ha ngan a ri manthang jarra Jisun han phuanga lui lut torlaimak, tak-ha mun dang khat tiang a binga alui om jui, han a mun rakip mingain ama jiang an hong jui.