Read Aimol MARK 10 Bible Online

MARK 10 - Aimol bible

MARK 10

¹Jisu ning hava mun ha a mak Jordan tuidung akanna Judia ramtiang a che jui. Hale mitam an hong kan chun na a nuk anjuiret hale a man anga ngaija a tho chak anga anmani a man chu jui.

²Pharisi her khat ama jiang an honga ama hi an chang a mankhit thei na rang anmanin an dingkel; “Mi an khat in a numei a mak rang hi kan dan in ajotmo?” Naripero, anti.

³Jisu ning anmani jiang, “Mousi ning ija mo chong a na pek?” Tia a sang.

⁴Anmanin anti; “Mousi ning pasal an khat in a numei mak na rabu an khat a pek inko kansenpuirase, tia alui ti.”

⁵Jisu ning anmani jiang a ti; “Nang ni man chu nantatrei jarra hiva chongpekhi inaluipek ani.

⁶Tak-ha a phut na tak hingahin, ‘Pathian in pasal an khat le numei an khat a sin, chong thiang in a ti.

⁷Hiva jarra pasalin a nu a pa a mak a numei le a kan chunrang ani,

⁸han anmanin anni ning an khat jak an chang jui.’

⁹Hava jarra Pathian ning i man chunsaha miring in mankansen ma rase u.”

¹⁰Anmani inn sunga an kir pha, thiamruoingain Jisu jiang hava chong chung chang a andingkelret.

¹¹Jisu ning anmani jiang a ti; “Anumei a mak a numei dang a-ompui mi han a numei a enda va ka-alal ani;

¹²hava anga a lompa a mak pasal a dang a-ompuinu han a lompa a enda va ka-alal ani,” a ti.

¹³Mi aher khat in Jisu sitranga a kol la nai pangngai an lui hong tuang jui, tak-ha thiamruoingai han mingai ha an luiran,

¹⁴Aninnom Jisun a jet pha, a lung huilui, ngai jiang a ti; “Naipangngaiha kei jiang hong manhongru, khap maru, ajarko Pathian rengram ha anmani ranga ani.

¹⁵Kein adik tak ka na ripe ani, tu a chang innom Pathian rengram ha hiva nai pangngai an khat anga alui mak mi ha hava mun na lut tor chilnoning.”

¹⁶Hava suale Jisu ning naipangngaiha a kut akua an reng chunga a kut a siak, phual a pek jui.

¹⁷Jisu khuola che ranga a hong kan thok pha, mi an khat jana a honga a madonna a hong kunna, ama jiang, “A sat Oja, kum sot ring na kamutheina rang kein imo ki tho rang?” tia a hong dingkel.

¹⁸Jisu ning ama jiang “Ita mo asat ni nati? Pathian ni lui a asat tute om ma u.

¹⁹‘Mi thatmaro; ani lui chuan tho maro; leisei tho maro; na nu na pa chit jak neiro’; chong pek ngaiha nang in najetjui a ti pe.”

²⁰Mipa han a sang, “Oja, hiva chong pek rakip ha nai pang ka chang lai an phut ka hong juisake”, a ti.

²¹Jisu ning ama a en na, alungsiatjui, ama jiang a ti; “Nang in an khat jak nalavat a om. Chero na nei rakip juar in lang, a riang khodengtheingai vasem pero, hale nang in chung van na sumle-sial na nei rang ke, hava suale hong nang kanuk na hong juiro.”

²²Mipa han hiva chong hi a jet pha, amaisua amok, lung hui lui tak a a che jui, ajarko ama mipaha kan chong alui ni.

²³Jisu ning a thiamruoingai a en na, anmani jiang a ti; “Mi kan chong ngain Pathian rengram lut rang hi i duk a tat jui mo ani.”

²⁴Thiamruoingai han hava chong ri ha an ngak jui. Tak-ha Jisun anmani jiang a ti ret, “Naipangngai, kan chong adeingain Pathian rengram lut ranga i duk khan na a tat mo.

²⁵Mi kanchong an khat Pathian rengram lut rang nek inko simphuai kuarra saringsei ning alutlam abeidet a ti.”

²⁶Thiamruoingain hava chong ha an jet anngakrep, an khat le an khat ankandingkeljui, “Han ko tu ning mo kan san ring na an mu rang?” Tia an kanbiakjui.

²⁷Jisu ning anmani a en na, anmani jiang a sang, “Hava ha miring ranga nitormak, tak-ha Pathian ranga ko i rakip anitorver,” a ti.

²⁸Han Pitar in a hong ti, “keinin i rakip kanhongmak na nuk ka na hong jui ke,” a ti.

²⁹Jisu ning anmani jiang a ti, “A thianga ka na tia ni, kei ranga le chongsat rang jarra a in alui, a nu, a pa, a sap a nai, a te a mak tor om ma u,

³⁰tu a chang innom a tun miruol hin in le lui nu le pa, nai le te a khel det apekde rang ke; hava anga khodengthei a mu, hale a hong rang pha hin a man kum sot ring na nei rang ani.

³¹Tak-ha ma alui sat a tam lammin nuk kairang anni, hale nuk a kei a tam lammin ma luisat rang anni,” a ti.

³²Tun anmani Jerusalem tung na ranga an che jui. Jisun thiamruoingai a khel la an madonna a che jui, hale anmanin an lui ngakjuia, a nuk jui ngaiha an che jui. Hale somlei anni ngai ham an londet-a a tuanga, a chunga a hong suak rang omchan ha a ripejui,

³³“Enru, keini Jerusalem tung na ranga kan che ani; hava han miring nai ha thiampulianngai le dan a theingai kut chunga peklutrang ani, hale anmanin that na ranga maral pek rang anni, jatdangngai kut chunga an pek lut rang ani.

³⁴Anmanin nuiso nan ta chilthuan rang anni, hale venanta that rang anni, ni thum suale a thui khiret rang ke,” a ti.

³⁵Jebedi a naingai Jems le Johon Jisu ma don tiang an honga, ama jiang an hong ri; “Oja, kein in nang jiang imo an khat kannalamhi na na thoperang kan dei,” anti.

³⁶Jisu ning anmani jiang alui dingkel, nang ni jiang, “I mo ka na thoperang nan dei?”

³⁷Anmanin an sang, “Lianpuina na rengram ma rengongna chunga na ongpha, an khat na chang tiang an khat navei tiang nang le kan ongsuam rang hi kan dei,” anti.

³⁸Jisu ning anmani jiang a ti; “Nang nin nan na lam ha imo a chang jet mak che u. Ka in rang koklai ha nan in tor rang mo? Kein baptais ka tho ang hin nang ni nan tho tor rang mo?” A lui tipe.

³⁹Anmanin “Kantor” tia an sang. Jisu ning anmani jiang a ti; “Adik, nang nin kei ka-in kok lai ha nan in rang ke, hale ka baptais tho anga nan tho rang ke.

⁴⁰Tak-ha ka chang tiang le kavei tianga ongrang ha ko kein ki na pek tor rang nimak, ka Pan inasiakpe ngaiha nan tumrangke,” a ti.

⁴¹Thiamruoingai som han hava chong ha an jet pha, Jems le Johon chunga han an lung a thakjui.

⁴²Tak-ha Jisu ning an renga a kui khomma a ti; “Jat dangai vai hom anga a om ngaiha ko anvai homna ngai chunga an Pathian achangai, hale lam a kei a lian tak an khat han an chunga chuan tho na ranak a nei, nang nin nan jet ani.

⁴³Tak-ha nang ni karra ko hava ha nimak; nang ni karra a lian tak a chang an khat ha nan suak ichangrang ani.

⁴⁴Hale nang ni karra tu-ang min a lutir chang jot mi han na suak ichang rang ani.

⁴⁵Ajarko Mi Pasalnai ham sep a mankantho ranga i hong chang mak, a man mitam tak ngaihi san ranga alui hong ani alui ti.”

⁴⁶Anmani Jerikho an hong jui; han Jisun thiamruoingai le mitam an kanruoi lai han, Timaios a nai Bartimaios anti ha lamsira a onga a kut a do a alui om.

⁴⁷A man Nazaret Jisu achongjek a jet pha, a hong khekjui, “David nai Jisu; na lungsiatro,” a ti.

⁴⁸Hale mitamtak in anranna, “Omchianro,” anti tak-ha a man adik khan akhekdet, “David a nai na lungsiatro,” a ti.

⁴⁹Jisun angira, “Hongkuiru,” a ti. Anmanin amitdelpa jiang, “Lunghip lungdai tak ominlang, hongthuiro,” Jisun a na kui antipe.

⁵⁰A man a puan a dengjuanna a hong kan thok Jisu jiang a hong jui.

⁵¹Jisun ama jiang, “Kei imo kinatho pe rang na dei tia ading kel?” Amitdel han alui ti; “Oja ken khuo, mu na neiretrong,” a ti pe ani.

⁵²Jisun ama jiang a ti, “Chetaro, na takngai han a na mandamjui.” Hava lai tak han a man khuo a mu a lam han Jisu a nuk alui jui.