Read Aimol MARK 11 Bible Online

MARK 11 - Aimol bible

MARK 11

¹Anmani Jerusalem antungrang tiang, Olib Tangbung Betphage le Bethani anphak pha, Jisun thiamruoingai karra mi anni an madonna a tirra,

²hingahin alui man chu, “Nan madonna khuo son cheru, nang ni nantung lim le sakourkap tu ten nom an la chuang chil lui an khat nan mu rang ke. Hava hongsut unlang hin hongtuangru.

³Han tu ang khat in, ‘Irangamo anti aninko?’ ‘Puman aneimanjot a om, a na hong thak khirlen rang ke,’ ” tiru a ti pe.

⁴Hale anmani a chea lam lian kottiang han sakourkap an khat an khit an hong mu a, an hong sutjui.

⁵Hava mun na a ngirngai han anmani jiang, “Ijarra mo sakourkapha nansutanti?”

⁶Anmani Jisun a manchuna ngai nuk jui a anluisang; hale anmanin an hong tuang jui.

⁷Anmanin sakourkapha Jisu an man chuangjui, a chunga an puan ngai anphava Jisu aluichuangjui.

⁸Mitamngain thingna anvatukthak lam ma han anphajui.

⁹Hale a madonna a che ngai le a nuk jui ngai han an khek, “Hosana! Puma minga a hong ama ha ravansat ani!

¹⁰Kan pa David rengram a hong hi ravansat chung nung Hosana!” Antijui.

¹¹Jisu Jerusalem ma a chea biakinn sunga a lut jui; hale a man i rakip a en ver ani. Tak-ha nitak a hong ni jui jarra thiamruoingai somleini le kan ruaia Bethani an che jui.

¹²Jing ang nikhuo han anmani Bethani an phut an hong kir pha, Jisu avonchamjui.

¹³A man a lak det a thei chang kung an khat a mua, ara a om rang ke tia akung tiang alui che jui tak-ha a mun a tung pha, a na ni lui a i om hongmumak, ajarko thei chang a ra pha ha luinilai mak.

¹⁴Puman thei chang kung jiang a ti, “Nang jiang naraha tu khat ning chakchil laimara seu,” alui ti. Hava a ti ha thiamruoingain an jet jui.

¹⁵Anmani Jerusalem an tung pha, Jisu biakinn sunga phurjuar le a chok rakipngai ha anotcheijui; hale peisanoi a thul le pharvali ajuarngai Dukal an ong na ngaiha amaletpejui,

¹⁶hale biakinn han min phurchoi rang ha angaidajui.

¹⁷Puman anmani jiang a ti, “Ka inn hi jat rakip ranga chubeibuk na inn anti rang ke tihi Pathian chong thiang in alui jiak sake. Tak-ha nang nin arukngai kanthupna khurlam nan manchang jui.”

¹⁸Thiampulian le dan atheingain hava ha an jet karra ama that na rang lam antokjui. Ajarko mi atamtakin a chong man chu na ha a tam tak an ngak jarra anmanin ama an chit ani.

¹⁹Ni ahongtak pha Puma thiamruoingai le khopui ha an mak jui.

²⁰Hava nikhuo suale jingtiang manhan lam ma anmanin an hong lonhan, thei chang kung ha akung tenna alik tunga avuaiha anmanin an mu jui.

²¹Pitar in a hong ngaidon phak hale ama jiang, “Oja, enro; nang in khuo nakhong thei chang kung ha avuai jui,” a ti.

²²Jisu ning a sang, “Pathian takngai na neiru.

²³Kein a thiang tak kinaripe ani, ‘Tu a chang innom a lunga kei chi kai ok nei chil luia a ti ha itung chiak rang ke tia takngai na a nei mi han’, hiva tangbung jianghin, kan thon in lang tuilai-a hong kan deng juanro, a tinko hava ama ranga akanthon rang ke.

²⁴Hava jarra kanamanchu, kinaripe ani, i a chang innom nang nin nannalam rakip ha kan mu jui tia takngairu, nan imurang ani.

²⁵Nang ni lam na ranga nan ngir pha tu a chang mi khat chunga lung hui mak na na nei rakip ha ngaidamro; ha a chang inko vanram ma a om nan pa ha nom nan siatna ngaiha i na ngaidam rang ke.”

²⁶“Nang in midangai ha nan ngaidammak a chang inko, vanram ma a om nan pa ha nom nang ni na ngaidam lai noning,” a ti.

²⁷Anmani Jerusalem ma an hong kir khiret jui, hale Jisu biakinn sunga alonlai, thiampulianngai le dan ojangai ulianrupngain ama jiang an honga,

²⁸an dingkel, “Nang in i ranak mo naneia hiva chuan hi na tho? Hiva ngaihi na tho na rang tunmo ranak a na pek?”

²⁹Jisu ning anmani jiang a sang, “Kein chong an khat jak na dingkel rong, nang nin hava ha nannasang inko, kein iranak a mo hiva ngai hi ka tho ka na manjet rang ke.

³⁰Johon in tuija baptais man lut na ranak a nei ha hova tenna anphutmo, Pathian tenna mo, miring tenna mo? Namanjet bakru a ti pe.”

³¹Anmani anbinga an kan biak, “keinin imo kan ti rang?” Pathian tenna an phut, ani tia kansangle, “Han ko ita mo nang nin Johon ha tak nanngai lui?” inati rang ke.

³²Tak-ha miring tenna an phut ani, tia kansangle han, mirakip in Johon ha adik tak tashanthei an khat ani tia anjetsa ani jarra nan chit, ke ati rang ani.

³³Hiva jarra anmanin Jisu jiang “keinin jetmasing”, tia an sang. Hava pha Jisun anmani jiang a ti “Kei ning om iranak nei na tiangamo hiva ngai hi ka tho tihi namanjetlai noning.”