Read Aimol MARK 13 Bible Online

MARK 13 - Aimol bible

MARK 13

¹Biakin na anphut an hong suak pha han, thiamruoi an khat in ama jiang a ti, “Oja, enro, lungngai le inn an sin ngaihi i duk a ngak pa mo ani!”

²Jisu ning a sang, “Innpui a lian ansinhi nan mu mo? Lungngai hi an khat chunga an khat jak om maklui-a mankui makrang an khat jak om ommak.”

³Jisu ning Olib tangbung chunga a ong pha han, Pitar, Johon Jems hale Andrew ning anbinga an honga andingkella,

⁴“Hava i tik rang mo, hale hiva rakip hi i tik mo a suak rang, imo jet na kan mu rang? keini na man jetro,” anluiti.

⁵Jisu ning anmani jiang a ti, “Tuten lam le tiang an na tu-ang mak na rang kan ning theiru.

⁶Mi atamtakin, ‘Keihi amaha ka ni!’ tia ka ming choi an hong rang ke, anmanin mi a tam tak lam le tiang tuang nanti.

⁷Ral kan nok rasale, ralchong nanjetpha chit maru; hava a hong suak chiak rang ke, tak-ha a torna laninoning.

⁸Ajarko jat an khat in jat an khat, hale rengram an khat ning rengram an khat chunga ral kan tho rang anni; mun a tam tak ning nu kannik rang ani, bu hong lutrang ani, hava ngaiha nai an nei rang tiang nai ha an dui anga a phutna pongna ha ni nati.

⁹“Nang ni nantak nanthei jak kan ning theiru; ajarko anmanin ulianrupngai jiang napeklut rang anni, hale Sainagokhin naverang anni, kei jarra nang ni ramvaihomngai le rengngai mai kung a shakhi ngirang nan ni.

¹⁰Chongsat hi a rapatak mirakip jiang an la ri chiak rang ke.

¹¹Anmanin nang ni annachura nan chongtan rang an na peklut pha, imo kanrirang tia a masat tak nan ning man dong maru; a phat a hong tung han nang ni nanrirang chong ha Thavang Thiang in irirang ani.

¹²Mi ning a u a nai a peklut rang, hale a pan a nai a peklut rang, hale an naingain an pa an nu an kan enda puia anla that rang ke;

¹³kei jarra mirakip ning nang ni na-enjot noni u. Tak-ha a torna tunga a khang rat han kan san ring na imu rang ke.

¹⁴“Mipong khodengthei manmang rang ma tir a-om tak, a ngir mak na rang mun na a hong ngirsuak nan mu rang ke, apasuak han itinamo jet theiru, hava pha han Judia ram ma a omngai ha tangbung tiang tan rase u;

¹⁵In chunga a om mi han in sunga aphur lui ranga lutlai ma rase;

¹⁶Hale lui a a om mi han a puan lui ranga insung lutlai ma rase.

¹⁷O, hava nikhuo chungrik-om, ranua anaivai ngai ranga khodengthei ke!

¹⁸Hava pha phabilai asuakmak na rang lamru,

¹⁹Ajarko hava nikhuo pha sung han a pong khodengthei na a lian tak, Pathian kut sin lai tenna tuntunga ilasuak chilui pong khodengthei na ha i hong tung rang ani.

²⁰Hava nikhuo pha ngaiha Puman amanbongmak inko, miring tute kansan ring tor noni u, tak-ha a man athang suakngai rang ko hava nikhuo kamanbong a ti.

²¹Hiva jarra tu a chang innom mi an khat in, ‘Enru, Khrista ha hin a om’, animakle, ‘son a om’, anti aninom takngai maru.

²²Khrista ni lui le tashanthei niluingai hong suaknanta jet nale chuan a ngak pa anthorangke a jot inko athang suakngai ten nom aletiang na tuang na rang tho nanti.

²³Tak-ha aphama kein nang ni jiang kinalui man chu ani, kan ning theiru,” a ti.

²⁴“Khodengthei na pha nikhuo a tor suale, khuo jingrang ani, tha varlainoning,

²⁵hale arsingai vanram tenna hongchulrang anni, hale thangvan sum phai kongkarra ranak rat na ngaiha kannokrang ani jui.

²⁶Hava pha Mi Pasalnai ha ama lianpui nale a ranak le kan ruaia sumphai chunga i hong kando rang ani.

²⁷Hava suale athang suaksa ngaiha khomchun ranga thaneithiangngai ramuol le chungvan na aki manli a torna kolmong an khat tenna an phut an khat tungkhan hongtirang ani”, a ti.

²⁸“Theichangkung a an phut kan churu. Theichangngai a don a na acher inko, kholum pha a nai jui ti nang nin nan jet.

²⁹Hava anga hiva ngai rakip a hong suak nan mu pha han, a man inn khar kung a hong phakjui, a phat a nai jui tijetru.

³⁰Adik tak kinatipe ani, hiva rakip asuakmak kar je a tunna miruol hi latornoning.

³¹vanram le ramuolko i lam ang rang ke, tak-ha kei chong ko mang chil noning.”

³²“Hava nikhuo le aphahako a Pa ni luia, vanram thaneithiangngai le a nai Pasal ha nom tu ten jet ma u.

³³Kan ning chakru, ajarko a pha i tik mo i hong tung rang nang nin jet mak che u.

³⁴Mi an khat in khuolla a che tiang, asuakngai en chuan sin ranga chong abea hale inkharngak jiang om a kan ning chak na rang chong a pek anga ani.

³⁵Hiva jarra kan ning chakru, ajarko in neipupa ha nitak a chang a, janchim a chang a, jingtiang a chang i tik phamo a hong rang nang in jet mak che u.

³⁶Jetlui thai luia ama a hong tunginko na lui jalla na lui ommak na ranga,

³⁷Kan ning chakru, katihi mirakip jiang kati ani.”