Read Aimol MARK 14 Bible Online

MARK 14 - Aimol bible

MARK 14

¹Atun Kanna ut le Cholkanchelui Tal Bulom ut thona rang ninijak a vat han, thiampulianngai le dan theingain Jisu ha ija mo chura that thei na ranga lamkhat an lui tok.

²Ajarko anmanin anti, “Ut pha hin ko nima rase mingai kannoknalam hong suak nati,” anti.

³Bethani khuo Simon tuiritongpa pangpharpa inna Jisu a tunga, bu aneklai, numei an khat in sariak a rim hui a man tam tak alabaster kok a sip an khat na ri a thiang tak an phut an sin ha a hong choia a hong. Amanuhan akokha asuk khuia sariak a rim hui ha Jisu luchunga alui bunthuan.

⁴Hava munnahan a lung huilui aviar an om hingahin anti, “Ita mo sariak hi hingahin namanmang?

⁵Hiva sariak hi dinar reithum khela luijuara, peisa ha a riang khodengtheingai nan pek rang ke,” anti a hava nu ha anluirisiatjui.

⁶Tak-ha Jisun anmani jiang a ti, “A man a tho jot ha tho rase ijarra mo nanpholom? Numeinuhin chuan asattak an khat kei ranga a tho jui ani.

⁷Ajarko a riang khodengtheingai hale nan om suamchak; nang nin na dei pha han anmani nansanthei, tak-ha kei ko i tik om nang ni le om suamchak nonising.

⁸Numeinuhin sariak rimhui ka tak chunga ananot hi anaphum madonna inanotjui ani.

⁹Adik tak-a ka na tia ni. Ramuolchung pumpuia asat chong ansemna munrakip a, amanu ngaidon chak na achuanthohi ri rang an ni jui,” a ti.

¹⁰Hava suale thiamruoingai somleini karra Judas Iskariot antipahan Jisu pek lut na rang thiampulianngai jiang a che jui.

¹¹Anmanin Judas Iskariot chong ha an jet pha an ning asat, peisa pek ranga kan jot na an nei jui. Hiva jarra a man Jisu ha a peklut thei na rang lam in khar alongjui.

¹²Cholkanchellui Tal Bulom ut nikhuo ama sat ning ut meranga belram that pha han, thiamruoingain ama jiang, “Kanna-uth hin nachak na rang mun ha hon mo kan sin rang hi nang in na dei?” Tia an hong dingkeljui.

¹³Hava pha han Jisun thiamruoingai anni a tirra, hingahin a manjet, “Nang ni khopuison cheru nang nin tuiphul a dom mi an khat nankantong pui rang ke, ama nuk ha juiru,

¹⁴ama lutna inn a neipupa jiang han ‘Oja ning a thiamruoingai le Kanna-uth an chak na rang ha hon mo ani?’ tia dingkelru.

¹⁵Hava pha a man inchunga ka aliantak manthiangsa an khat a na man mu rang ke, hale hava han luikanningru a ti pe.”

¹⁶Han thiamruoingai ha an thui a khopuitiang an che jui, hale anmanin a ti pe angahan an mu jui; hale anmanin Kan na-ut ranga an siak jui.

¹⁷Nitak a hong tung pha han Jisu thiamruoingai somleini hale an hong jui.

¹⁸Amanin tebol chunga anchaklai, Jisun a ti, “Adik tak-a kanatipe ani, nan karra kei le achaksuam an khat in kei hi najuarang ani jui.”

¹⁹Thiamruoingai ha anning a dong jui an khat le an khat an lui kanding kella, “Keimo tu mo tia an lui kan dingkel?” Anluiti.

²⁰Jisu ning a sang, “Nang ni somleini karra kei le kheng kibanpuisuam an khat hi ani.

²¹Ajarko chong thiang in alui ti anga, Miring Nai Pasal ha ithirangke; tak-ha Miring Nai a peklut rang mipa ranga ravansiat ani. A mahi nai alui chang mak inko a satdet rang ani,” a ti.

²²Anmanin anchaklaihan, Jisun tallom ha alui a ravansat phual a lam ma a ek khuia thiamruoingai jiang a pek a a ti, “Luiru, hiva hi ka tak sa ani.”

²³Hale a man koklai a luia Pathian a manpak na a nei suale anmani jiang a pek, an renga hava hana an phut an injui.

²⁴Jisu ning anmani jiang a ti, “Hiva mi a tam tak ranga aluang ka thisen, chongsam na thisen ha ani.

²⁵Adik tak ka na ripe ani, Pathian rengram ma a tharra ka inmak kar je hiva darkha tui hi kein inret lai noning,” a ti.

²⁶Hava han anmanin la an khat an tho suale, Olib Tangbung tiang an che jui.

²⁷Han Jisun anmani jiang a ti, “Nang ni nan renga kei hi namakrang nan ni jui; ajarko hingahin chong thiang in an lui jiak sake ani. Belram selpuha, vekhiak nan ta hale abelram ngai ham kansen khairang anni jui.”

²⁸Tak-ha keiringa ka hong thuikhir suale Galili a nan madonna luicherang ka ni.

²⁹Pitar ning ama jiang a ti, “Anmani an renga an na tande pet a chang innom, kei ko tanchilnoning.”

³⁰Hale Jisun ama jiang a ti, “Kein nang jiang adik tak-a kati ani tunjan tak hin ar ning veini akhuang karra, nang in veithumtak na jot noni che,” a ti.

³¹Tak-ha Pitar in anatdet a ri, “Nang le kan ruaia thina rang a chang innom, jet making tichil noning.” Hanga han a renga a kan angrip a an lui ti.

³²Anmani Getsamani anti mun ha antungjui; a man a thiamruoingai jiang, “Kein lam na, ka nei hin lui ongru,” a ti pe.

³³Hale a man Pitar le Jems hale Johon a tuanga, adik khan a thavang aponga khodengthei a phut jui.

³⁴A man anmani jiang a ti, “Thina tunga ka ning a dong jui; hin om unlang kan ning chakru.”

³⁵Aviarte a lak det a chea, leithuai-a a bok a, a jot rang aninko phat ha a man thulthak na rang a lam ani.

³⁶A man a ti, “Abba, A pa, nang ranga i rakip anitorpet; hiva koklai hi kei-a an phut na lui suakpero; hale kei lungdo changmarase, nang lungdo chang rase.”

³⁷Hale ama a honga anmani an lui jal a mu jui, a man Pitar jiang, “Simon, nang najal mo? Pha bongkhat khodengthei a om tor ma che mo?

³⁸Mathemna nalut mak na rang, kan ning chak a lamro, adik a thavang inko a dei, tak-ha tak sa inko ataksam ani,” a ti.

³⁹A ma acheret a ti chong rapa anga a lam ret ani.

⁴⁰Hale ama a hong ret anmani an lui jal amuret, ajarko an i amureijui ani, hale anmanin ama sangnarang jetlaimau.

⁴¹Hale ama veithum changna a hong pha a man anmani jiang a ti, “Nang ni tun tunga pong nankansak nanlajalmo? Ahunjui; Miring Naiha misamakngai kut chunga peklut na rang pha a tung jui.

⁴²Thuiru keini che tarei; enru, anapeklut rangpa a hong jui.”

⁴³Jisu ning hangan chong arilai, somleiningai karra Judas ha a hong tung jui. A ma le kan ruaia mitam chemsei mol le kan ruaia thiampu lianngai dan theingai hale, ulian atarngai an phut an hong jui ani.

⁴⁴Apeklutpa han anmani manjetna an khat a pek a ati, “Kein abiang kitum pe rang pa ha ama ani, churnang kaisuakru,” ati jui.

⁴⁵Judas a hong tung lim le Jisu jiang a chea, “Oja!” a tia abiang a hong tum jui.

⁴⁶Hava pha anmanin Jisu an mu a anchurjui.

⁴⁷Tak-ha akola a ngir mi ankhat in achemsei a kei sua, thiampulian suakpa kuar atuk thakpe.

⁴⁸Jisu ning ama jiang a ti, “Nang ni a ruk an khat chur anga kei churanga chemsei le molle kan ruaia nan hong mo?

⁴⁹A nitina kei nang ni le ka-om suam ma biakinna ka na manchu han naluiichur ma che u. Tak-ha hiva hi chongsat rabuhin alui kan jiak ha tung thei na rang ani.”

⁵⁰Hava suale thiamruoingai rakip in an mak a an tandejui.

⁵¹Ruipuan anemjak asi reathar an khat in Jisu ha a jui a, anmanin ama anchura,

⁵²arui puan ha a mak a atandejui.

⁵³Anmanin Jisu ha thiampulian in na an tuang jui; hale han thiampulianngai rakip le ulianrupngai hale dan a theingai an lui om.

⁵⁴Pitar in a lak det a hong jui a, thiampulian kholaidung tunga a hong jui. Hale a man mei a o va kotngakngai le an ong suam ma an om jui.

⁵⁵Thiampulianngai le an kan chun ulianrupngai rakip in Jisu thatthei na rang chong shakhi antokjui, tak-ha an khat jak om mu ma u.

⁵⁶Jisu enda na leisei shakhi a tam tak an pek, tak-ha ansakhi pek ha an khat jak om kanchun lai mak.

⁵⁷Hava suale mi aviar ning an ngirra Jisu enda na shakhi non tak an pek,

⁵⁸“Hiva mipa hin a ti, ‘Hiva kut an sin biakinn hi kein kaset a kut sinlui a dang an khat nithumma kein kasintor rang ke,’ kein in kan jet.”

⁵⁹Ha aninom anmani an ri rakip kan chun chilaimak.

⁶⁰Thiampulian han mi pui lai tak a angira Jisu ha chong ading kel, “Anmanin nang enda na shakhi annapekhi i jum nasangno nichemo?” Ati.

⁶¹Tak-ha a man i om sangluia a dai ni anga a om, thiampuliannin ading kel ret, “Nang Pathian Nai Khrista ha mo na ni?” Ati.

⁶²Jisu ning a sang, “Kei ka ni, hale Miring Nai Pasal ha ranak rattak a Pathian chang tiang a onga, vanram sum phai le kan ruaia i hong nang nin nan mu rang ke,” a ti.

⁶³Thiampulian han a puan a kei thera a ti, “keinin shakhi dang ngai iranga mo kantokrang?

⁶⁴Pathian a ran a esel tihi nang nin nan jet jui, imo nan ngaidon?” Ati. An renga a thi ranga rahui a suak tia anmasiatjui.

⁶⁵Aviar in Jisu an chilthuan an phut, a mai anchunpea, an vejui, “Riro, nang tu ning mo an na ve,” anti. Hale angakngain anbena an tuang jui.

⁶⁶Tual thuaia kholaidunga Pitar a onga alui om lai, thiampulian suaknu dongmangai karra an khat ama jiang a honga,

⁶⁷suaknuhan Pitar ha meikolla a om han a en na, “Nangom Nazaret Jisu le nan lui kan ruai,” a ti.

⁶⁸Tak-ha ama a kan nik pupuma a ti, “I mo nariha jet making, hale jet om jet chil making”, a ti. Hale ama inn khar kung tual tiang a suak jui.

⁶⁹Suaknu han ama amuret angirngai jiang han a ti ret, “Hiva mipahi anmani karra an khat ani,” a ti.

⁷⁰Tak-ha ama alui kannik, han a sirra angirngai han Pitar jiang, “Suailuia nang anmani karra an khat ke na ni; ajarko nang Galili mi an khat na ni,” anti.

⁷¹Tak-ha ama a thei a khomak akansamma kei jet chil making, “Kein nanti mipahi jet making,” a ti.

⁷²Hava lai tak han veini changna ar akhuangjui. Hava pha hin Pitar in Jisun alui ri, “Arkhong in veini akhuang karra nang in veithum na jot noni che, a ti ha a hong ngaidonjui.” Hale ama a mit tui a suak a aluichap.