Read Aimol MARK 2 Bible Online

MARK 2 - Aimol bible

MARK 2

¹Nikhuo aviar suale Jisun Kapernam khuo a hong kir, ama inna a om ti chong hi a thangjui.

²Hiva jarra mi a tam tak an hong kan chun na, inn khar kung tenna a mun luitong mak, Jisun anmani jiang chong alui ri jui.

³Pasal manlin apangherkhat a thi mi an khat an hong choia ama jiang an hong.

⁴Hale mipui ansiprei jarra, anmanin ama jiang an hong tung tor makpha, Jisu om na dingtak inchung ansetjui; hale anmanin inchunga, apang herkhat athipa ajalna le pher le a mai kung a an masul jui.

⁵Jisun anmani takngai ha a mu pha, “Kanaipa, na siatna ngaiha kana ngai dam jui,” alui ti.

⁶Hava mun han danthei oja an lui om jui,

⁷anmanin an lung sunga an kan dingkel, “Hiva mipa ijarra mo hinga hin a khek? A man Pathian anuisoke! Pathian ni lui a tumo siatna ngaidamtor an om?” anti.

⁸Jisun an lung ngaidon ha a jet, anmani jiang, a ti “Hang an ijarra mo na lung ri la nang ni chong nan kan dingkel?”

⁹Apangherkhat thipa jiang, “Na siatna ngaiha kana ngaidam jui,” tile, “Thui in lang napon pherha lui innang chetaro tihi homo abeidet?

¹⁰Tak-ha Mi Pasalnai han ramuol chunga siatna ngaidam na rang ranak aneihi nan jet na rang ani.” Tia apang herkhat thipa jiang a ri,

¹¹“Kein nang jiang kari ani, thuiro, na jalna pherha lui in lang na inna chetaro!”

¹²Hale ama a thuia, a rak tak ajalna pherha alui a mitam mai kunga alui che jui; hava anmanin an renga an ngak pet Pathian an manpak, “keinin hiva anghi la mu chil maksing anti!”

¹³Jisun Galili pat sirtiang acheret, mitam an renga ama jiang an hong kan chun na, aluimanchujui.

¹⁴Hale ama achesuo pha Alphaios a nai Levi khasana chomna inna a ong a mu a, ama jiang, “Najuiro.” Ati a hale a man a thuia a nuk a jui jui.

¹⁵Hava suale Jisu, Levi inna bu nek ranga lukham chunga khasana achomngai le siat nei mi a tam takngai le hale a thiamruoingai le an ong; ajarko a nuk jui ngaiha an lui tam ani.

¹⁶Hale Pharisi dan ojangain, Jisu ha khasana chomngai le siat nei ngai le anchaksomha an mu, thiamruoingai jiang, “Ijarra mo siat nei mingai le khasana chomngai le an nek an chak puisuom anti?”

¹⁷Jisun hava a jet pha, anmani jiang, “Adamngai ranga thiampungai mak, tak-ha anatngai ranga a ngai ani. Kei asatmingai kui ka hong nimak, tak-ha siatna neingai kuiranga kahongke a ti.”

¹⁸Johon thiamruoingai le Pharisingain bu anngei chachak ani; hale her khat an honga, Jisu jiang anti, “Johon thiamruoingai bu anngei chachak, tak-ha nang thiamruoingai ko ita mo anngeimak?”

¹⁹Jisun anmani jiang a ti, “Muipa a sap ngai le an om suam kar je asapngain bu anngei tor rang mo? Anmani, muipan akantoppui kar je bungei tor ma u.

²⁰Tak-ha muipa anmani kar tenna tuang na rang pha a la om rang ke, hava pha han anmanin an ngei rang ke.

²¹“Tu khat in puan thar herhan puan alui sa suide ngai ma u; ha a tho inko puan aluisaha ponthar herhan amanchet rang ke hale a mel om asiatdet achet rang ke.

²²Animakle savun alui sa han darkha tui tu ten thunngai ma u. A man hava a thun inko darkha han savun her ha imankui rang ke, darkha ha charrang ani, savun her a tharra juthar ha thunrang ani a ti.”

²³Jisun sernikhuo an khat han changbil a lai tak alui ro-a, hangan achena a thiamruoingain chabor ansiktan anphutjui.

²⁴Hiva jarra Pharisingain Jisu jiang, “Enro, na thiamruoingain sernikhuo dan adik mak an tho anti!”

²⁵Jisun a sang, “David in chak rang imo khat achakjot pha alui tho ha nang nin pangai mak che u mo? David le akanruoipuingai an von a cham pha han,

²⁶anmanin Pathian in thiang sunga anluilut hale Pathian jiang an lui pek bulom ha an lui chak. Hiva hi Abiatharning Thiampulian a chang lai pha a luini. Dan nuk jui a tukhat nom chak luijotmak thiampungai ni lui a tak-ha David le a thiamruoingai ning tal ha in thiang sunga an lui chak jui,” a ti.

²⁷Hale Jisun anmani jiang a ri, “sernikhuo hi miringngai satna rang an sin ani, miring hi sernikhuo ranga an sin nimak,

²⁸hiva jarra Mi Pasalnai ha sernikhuo puma ha ani.”