Read Aimol MARK 6 Bible Online

MARK 6 - Aimol bible

MARK 6

¹Jisu ning hava mun tenna an phut a hong suak a om na ramtiang a che jui, hale a thiamruoingain a nuk an lui jui.

²Sernikhuo ni han a man kan chun na Sainagok a man chu a phut jui; hale a ngai a jet mi a tam tak in an ngak, “Hiva mihin hon na chingna theina mo a luia hiva rakip hi hon mo a hong mu? Hale tho torlui chuan ngaihi ija mo a tho tor?

³A ma hi Meri a nai, Jems, Josis, Simon le Judas ngai ansap, anaipangnu hina keini le kan om suam, innsinpanai mo nimak” tia, anmanin i om leingaidon ma u.

⁴Jisu ning anmani jiang a ti; “Tashanthei an khat hi akhosung le a inn sunga chit jak na nei ma u, tak-ha ram danga a mun rakip a min chit jak na an nei ke ani.”

⁵Hava munnahan adammak aviar chunga a kut a siak pe a amandam ngai ni luia chuan a ngak pa alianha tho lai mak.

⁶Anmanin takngai an nei mak jarra a man a tam tak aleingakjui.

⁷Jisu ning khuo rakip a chea mingai a man chu jui. Jisun thiamruoi somleiningai ha ama jiang akuia, thavang thiang luingai chunga chong ri na ranak a pek a anni anni atirjui.

⁸“Anmanin thiang re ni luia bu puankok, peisa i om nanchoi lui rang; an tia chong a pek jui.

⁹Kekok jak chuangru halekuntai akanthua choi maru.”

¹⁰A man anmani jiang ariret, “Nang ni khopui an khat nan lut karra an na luidonna inn han nan mak mak kar je om chakru.

¹¹Hale hova mun a chang innom mingain an na don mak innom, nan chong an jet jot mak inko, hava mun ha nan mak pha le an chunga shakhi ranga nankedir thingthak peru a ti pe ani.”

¹²Hiva jarra anmanin an chea mingain an siatna an phut an lung an thul na rang alui ri jui.

¹³Hale anmanin khonam a tam tak an not chai a, mi adamlui a tam tak chunga olib sariak anbun thuan na an lui mandamjui.

¹⁴Jisu rui a chong ngaiha a mun rakip hin a thang jarra, Reng Herod in chong ithangha a jet jui. Mi her khat in, “Johon Baptis ha athia an phut aringkhirret an lui ti, hava jarra hiva anga ranak anei a chuan hi a tho torke,” anti.

¹⁵Achang innom her khat in, “A ma Elija,” anti. Adang her khat ngain, “A ma hi tashanthei an khat, man lai-a tashantheingai a lian an khat ke,” anti.

¹⁶Herod ning hi a jet pha, “A lu ka tan Johon Baptis ha aringret jui ke tia a ri,” a man a ti,

¹⁷ajarko ning Herodias a naipangpa Philip lomnu a neina arui jarra Johon ha chur na rang chong a pek anchura, an khit an khum ani.

¹⁸Ijarra mo kantinko Johon ning Herod jiang, “Nanaipangpa numei nang in lomnu naneihi adik nimak,” tia a ran.

¹⁹Hiva jarra Johon ha Herodias ning amatira, a enda va a tam tak alui that jot jui.

²⁰Ajarko Herod in Johon ha adik mi le a thiang mi an khat a chang jarra a chit asat nianga alui siak. Tunchu chongaihi a jet pha a ning adong, ha nom achonghi adik khan aluijetjot.

²¹Herod anaichangni nikhuo an khat ama in a ralmi a chong chengai le Galili ram ma lam kai rakipngai le ut an khat an tho a an lui kui.

²²Hava pha Herodias a nai numeinai a hong lut a lam ma Herod le ikui rakipngai an lung amanbejui, hava jarra rengpan dongmanu jiang han, “Nadeitak nalamro, na pek kati,” a ti.

²³A man chong sam na a nei, “Nadeitak ka na pek rang ke ka rengram her khat hi aninom nanalamha na pek kati” tia chong sam na alui nei.

²⁴Hava pha han dong ma nuhan a chea, a nu jiang, “I mo kilam rang?” “Johon Baptis lu lamro,” tia anun alui ti pe.

²⁵Hale a man a rak tak a hong kira a hong lut ret rengpa jiang, “Kheng an khat chunga Johon Baptis a luha atuntak hin nanapek rang hi kein ka dei,” tia a lamjui.

²⁶Rengpa ha a ning a tam tak a dong jui; a chang innom a chong sam nuk jui a le khoral mi akuijarra amanu chong ha makhuijot lai mak.

²⁷Hava pha tak han rengpa a ngak a ngir, ralmi an khat Johon lu hong choiranga chong a pek jui.

²⁸Anmani a ngak mipaha a chea ren inn sunga han Johon lu ahongtanna kheng an khat chunga a lu ha a hong choi dongmanu jiang a pek jui. Hale a man a nu jiang a choia a pek jui.

²⁹Johon thiamruoingain chong ha an jet pha, an honga, aruak ha an hong luia than an khat ang han anre jui.

³⁰Thiamruoingai ha Jisu jiang an hong kira, an man chu ngai le an chuantho rakip ama jiang anvarijui.

³¹Mi a chea hong antamrei jarra, anmanin bu neknarang pha mu tor ma u; hava jarra Jisun thiamruoingai jiang “Hongru a dai ripna mun na phabongkhat pong kansakrei,” a ti pe.

³²Hiva jarra anmanin mun a dai niangna an khat, an thei jak rokuang an khat an chuanga an che jui.

³³Anmani an che ha mitamtak in an mu an jet, hava khopui rakip mingai ning tang tiang ankalla anluicheha, anmani antungma an lui tung jui.

³⁴A man rokuang tenna a suak pha, mipui ngaiha a mu a, a lungsiat jui ajarko aselrangbui belram anga a mu a a man chu.

³⁵Hale nitak a hong nipha, thiamruoingai ama jiang an honga, “Atunko nitak ani jui, a munhi i om om mak na mun ani,

³⁶mingai hi chesen lang khuo son chak rang nek rang hong kan tok taraseu,” an hong ti.

³⁷Tak-ha Jisun a sang, “Nang nin anmani chak rang imo khat pekru,” a ti pe. Anmanin ama jiang, “keini kan hong chea dinar [1] bulom riani man na kan hong chok a kan pek rang mo?” Tia an dingkel.

³⁸Jisun anmani jiang a dingkel la, “Bulom ijat mo nan nei? Che unnang enru,” a ti pe. Anmanin an hong en na, “Bulom pek ranga le nga anni kan mu,” anti.

³⁹Hava pha han Jisun thiamruoingai jiang anmani arup rup ankan senkhui na rang le thingthui chunga an ong na rang a ripejui.

⁴⁰Hiva jarra mipui ngaiha riakhat le somranga rup rup parianga anongjui.

⁴¹Hava suale Jisun tal ranga le nga anni ha alui, vanram tiang a en na, Pathian aluimanpak a thiamruoingai jiang tal ha semnaranga nga ham alui a an renga sempetaru a tia apekjui.

⁴²Mirakip ning an chak ankhop-phetjui.

⁴³Hava suale a thiamruoingain mingai anchakbang tal le nga herhak ngaiha anrut a luk somleini aluisip.

⁴⁴Hale hava tal a chak mingai ha numei nai pang telluia pasal lising ranga an lui ni.

⁴⁵Jisu ning mipui ngaiha atir lai han, a thiamruoingai ha rokuang an khat a pat khat tiang Betsaida han man tung na rang chong a pek jui.

⁴⁶Jisu ning anmani ha amathan suapha han lam na ranga tangbung akaljui.

⁴⁷Nitak a hong ni han, rokuang ha patlai a aoma, amajak tanga a om jui.

⁴⁸Puma Jisu jingtiang pha dan an thum le karuk tanghan a thiamruoingai jiang a honga anmanin pong khodengthei tak-a rokuang anluijap; ajarko phaivuon anrokuang aluisempejui. Hava pha Jisun tui chunga a hong lon na, a hong phak dengjui.

⁴⁹Tak-ha anmanin tui chunga a hong ha an mu pha, “Khonam ani rang ke” tia anngaidonna ankhekjui;

⁵⁰ajarko an renga an mu a an chitjui. Tak-ha Jisun a rak tak a hong biak, “Chitmaru, kei ke ka ni, lunghip lungdai tak om ru;” ahongtipe.

⁵¹Hava suale Jisu rokuang chunga anmani le a om suam jui, hale phaivuo rang ha a bang jui, thiamruoingain an lui ngak ban,

⁵²ajarko anmanin tallom han mi lising ranga aluivaiha, an lung sunga lui ngaidon phak ma u.

⁵³Anmani pat ankanna, Genesaret ram antungjui, hale anmanin anrokuang ha ankhitjui.

⁵⁴Anmani rokuanga an phut an hong suak pha, mingain amake tia an jet jui.

⁵⁵Hava pha anmani an tanna havaram sung limma anatngai an jal na pher le an hong tu-anga ama jiang an hong manjaljui.

⁵⁶Jisu chena munrakip, khuo a chang a, khopui a chang a, ram ma chuan sin anninom chong a jet rakip in anatngai ha an jal mun na anmanjala a puan jak ansit an dam rang ke tia ama jiang an ri, hale a sit tor rakip andamjui.