Read Aimol MARK 7 Bible Online

MARK 7 - Aimol bible

MARK 7

¹Jerusalem ma an phut dan oja her khat le Pharisingai Jisu jiang an hong kan chun jui.

²Anmanin thiamruoi her khat in kut rasuk lui a bu an nek ha an mu jui.

³Ajarko Pharisingai le Jiwngai a dang rakip in an pu anpangai an chenangaiha anjuichak ani, anmanin kut rasuk lui a bu an nek ngai lui ani.

⁴Hale keithial kal an hong pha le phur le pai an hong choi a chang innom rasuk lui a i om chak ngai ma u, nei man um nei man ma u. Anmanin pulepa omchan ngai a tam tak an jui. Ti ko koklai, kheng kam, belngai, hi rasuk ma thiang lui alui neiman ngai ma u.

⁵Hiva jarra Pharisi ngai le dan oja ngai han Jisu jiang, “Ijarra mo na thiamruoingain pu le pangai che na jui luia kutchok pumma bu an nek” tia an dingkel.

⁶Jisu ning a sang, “Nang ni asat kanrol ngai chung chang a tashanthei Isaia ning a thianga alui ri jui; a man hingan alui jiak. Hiva mingai hin an bai ningjak chit annajak, tak-ha an lung sungako kei-a an phut a lak a an om.

⁷Anmanin a nem na bui a chubei an na buk, ajarko Pathian dan ha, miring in an sin chong pek lam an man changa an man chu.

⁸Nang nin Pathian dan ha nan mak, miringngai che na dan lam nan otitjui.”

⁹Jisu ning a ti, “Nang nin chingtheitak a Pathian dan ha nanthup hale nan manchulam ha nan otit,

¹⁰ajarko Mousi in, ‘Nanu, na pa chit jakro,’ hale ‘Tu a chang innom a nu a pa chunga khuo khong mi ha thirase-u,’ tia a ti.

¹¹Tak-ha nang nin nan ri, ‘Mi an khat in a pa a nu jiang akantop thei na chunga asanthei inko, hi ko Korban ani’, ti ko Pathian ta tina ani.

¹²A man a nu a pa ansanrang an phut an ma sua jui ani, sanlainoning, nanti.

¹³Hanga han man lai-a anchenangai a don don na nan jui na han Pathian chong ha i om ni lui a theinina nan nei. Hale hiva anga a tam tak om nang nin nan tho.”

¹⁴Hava suale Jisun mipui ngaiha akuiret anmani jiang a ri, “Nangrenga ka chongngai unlang jetru.

¹⁵Baisung ilut chak le nek ngai han mi ha manmang mak. Tak-ha mi an khat baia i hong suak han a manmang ani.”

¹⁶“Ngainarang kuar a nei in ngai rase u.”

¹⁷A man mipui ngaiha a mak insung a lut pha, a thiamruoingain hava tetan na chong ha an lui dingkel.

¹⁸A man anmani jiang a ti, “Aninko nang ni ngai ning nan jet lailuimo? I a chang innom mibaija a lut chak thei phur han mi ha manchokmak,

¹⁹ajarko bai a lut ha kan lung sunga lut mak kanphunga achethengke.” (Hiva atinako Jisun chak rakip a thiang tia iri ani.)

²⁰Hale Jisun a ti, “Mi an khat in a chong ri, a-omchanhan mi ha a man chok ani,

²¹ajarko mi lung sunga an phut sat mak, lungdo mithatna, siatna,

²²thangsiatna suak na, mi en lal, kan ri siat, man kan lian hale leisei ngaihi an hong suak ani.

²³Hava asat mak rakipngai hi milungsunga a hong suak, mi ham i manmang ani.”

²⁴Hava suale Jisu ning hava mun ha a mak Sidon ram Taiar khopui tiang a che jui. Hava mun na a om ha mi an khat jak om manjetrang dei mak, Jisun inn an khat a lut a om, tak-ha ama kanthup torchilmak.

²⁵Nupui an khat a numeinai sunga thavang satlui a lut hale Jisu chong a jet pha a rak tak a honga a ke kung a ahongkunjui.

²⁶Hava numei nu ha Grik alui ni hale Phonisija Sairia ram sunga alui om. Hava nuhan Jisu jiang thavang satlui ha a nai numeinu jiang tenna notchai na rang arijui.

²⁷Tak-ha Jisun a sang, “A ma sat tak nai pangngai khopbak di rase u, ajarko nai pangngai tal ha luia uingai jiang dengjuon rang hi dikma,” a ti.

²⁸Nupuinu han a sang, “Puma, adik, aninom nai pangngai chakbang a liam bang thuoia achulngai ha uingai innom an chak ke,” a ti.

²⁹Jisun nupuinu jiang, “Nang na chong sang jarra chetaro; khonamngai han na nai numei nai ha a mak jui,” a ti.

³⁰Hava pha ama nu ha inna akira a nai numeinai ha kangthual chunga alui jal ahong mu a, adik khet khonam ha a nai numeinai an phut a suak jui.

³¹Hava suale Jisun Taiar a mak a Sidon le khopui som akanna Dekapolis tenna Galili tuionglian tiang a che jui.

³²Hale mi aher khat in chong asat aritheilui, kuorsep mi an khat an hong tu-anga. Jisun a chunga a kut siak pe ranga an hong ri.

³³Jisu ning a maha mingai karra an phut a dang khat a atuonga a kuor sunga akutsim a thun na, hale achil asa thuan na, a leiha a sitpejui.

³⁴han Jisun vanram tiang a en na, lungtok a a lam ma, mipa jiang han, “Kanlongtaro” a ti pe.

³⁵Hava phatak han a kuor a var jui, hale a chong, ak laimak asat chong a ri thei jui.

³⁶han Jisun anmanin tute jiang an ri mak na rang chong a bejui; tak-ha a man rimaru a ti ha khela an ri jui.

³⁷Hale anmanin a tam tak an lui ngak a, “Puma ning chuan rakip a na tho pe jui, kuarsep ngain an jet, an khat om chong ri thei luingai jiang chong amanrithei,” anti.