Read Aimol MARK 8 Bible Online

MARK 8 - Aimol bible

MARK 8

¹Hava lai han mi a tamtak an hong kan chun ret jui. Hale anmanin chak rang i om an nei mak pha han, Jisun a thiamruoingai akuia anmani jiang a ti,

²“Mipuingai ranga kaning a dong jui, ajarko anmani ni thum kei le kan hong kan ruai suomjui, a tun chak rang i om nei lai ma u.

³Kein anmani bu nekluia an inna ka man kir inko an che na lam ma pong rang anni, ajarko anmani aviar ko ram alaktak an phut an hong ke,” a ti.

⁴A thiamruoingain ama jiang anti, “Mi hivajat chak ranga tallom hiva ram sunga hin tunmo amutor rang tia anluisang.”

⁵Jisu ning anmani jiang a ti, “Tallom ijat mo nan nei tia ading kel?” Anmanin, “Tallom sari kan nei,” tia anluisang.

⁶Han Jisun mipuingai ha leipak chunga an ong na rang chong a pek jui. Hava suale a man tallom sari ha alui a Pathian manpak na anei a, a ekkhui a mi pui ngai jiang sem pe na ranga a thiamruoingai jiang a pek jui, hale a thiamruoingain an sem pe jui.

⁷Hale anmanin nga a sin a lek om an lui nei, Jisun hava ranga han manpak na a pek, hava ngaham sem pe na ranga thiamruoingai jiang chong a pek ret jui.

⁸An renga an chak ankhop ver jui. Anmanin an chak bang anoi ngaiha thiamruoingain anrut, luk sari a sip ani.

⁹han a chak mingai ha lising manliduk anni.

¹⁰Hale a man thiamruoingai le rokuang chunga a raktak an chuanga Dalmanutha ramtiang an che jui.

¹¹Pharisi her khat an honga Jisu jiang chong dingkelna an nei, anmanin an ensin na, chung vanna an phut jet theina an khat na man muro tia an hong dingkel.

¹²Jisu ning thavang ponga a lung sunga phuk a san na, “Tunna miruolngain ijarra mo jet theina an tok? A thiang a ka na ripe ke, tunna miruolngai ranga jet thei na pek lai noning,” a ti.

¹³Hi a ri le kan ruai a anmani a mak-a rokuang chunga varaltiang kanranga a che jui.

¹⁴A thiamruoingain tallom choi rang an lui thei ni-a, rokuang chunga tal lom an khat jak an nei.

¹⁵Jisu ning anmani amanchua “Pharisi ngai le Herod ngai chol an phut kan ning thei unnang kerepru,” a ti pe.

¹⁶Hale anmani khat le khat an kan biak, “keinin tallom kan nei lailui jarra a man hi irike,” anti.

¹⁷Jisu ning an kan biaknaha a jet pha, “Tal a om mak jarra mo ijarra mo nang ni nan kan biak? Tun tunga la jet mak che u mo? Nan lung angara nan la om mo?

¹⁸Nang nin mit nan nei-a mu mak che u mo? Kuar nan nei a, jet mak che u mo? Hale langaidon phak mak che u mo?

¹⁹Mi lising ranga rang han tallom ranga kakhui pha han, a liam bang luk ijat mo anrut a ti pe?” Anmanin an sanga luk “Somlei anni” anti.

²⁰“Hale mi lising manli ranga tallom sari kakhui pha han, aliambang luk ijatmo a sip nanluirut” atia Jisun dingkel. Anmanin sari tia anluisang.

²¹Jisun anmani a ti, “Tun tunga nang nin la jet makcheumo?”

²²Hale anmani Betsaida an hong jui. Han mi a her khat in amitdelpa an khat Jisu jiang an hong tu-anga, a sit rang hi an dei.

²³Jisu ning amitdelpaha a kut a kei a khuo varaltiang a tuanga a mit achil thuanpe-a, a chunga a kut a siak pe ama jiang, “I mo khat na mu tormo?” tia ading keljui.

²⁴Mipa han khuo athira, “Ken mingai kamutor, tak-ha anmani thing kung a lon anga ka mu,” a tipe.

²⁵Hale Jisun a mit ha asitperet. Hava suale mipa asat ni anga a en na, a mit a var jui, i rakip a thianga a mu jui.

²⁶han Jisun mipaha, “Khuosunga lutmaro, na ina chetaro,” tia atirjui.

²⁷Hava suale Jisun thiamruoingai le Kaisaria Philippi-a khuo han an lui che. Jisun lam ma achena, thiamruoingai jiang ading kel, “Mingain kei hi tumo ani tia an nati?”

²⁸Anmanin, “Mi a her khat in Johon Baptis na ni,” anti. Adang a her khat in; “Elija na ni,” anti; a dang a her khat in, “Tashanthei an khat na ni” anti.

²⁹A man anmani jiang a dingkel la, “Nangninko kei tu mo ani”, nanati Pitar in a sanga, “Nang Khrista na ni,” a ti.

³⁰Hava pha Jisun kei chung changa tute jiang rimaru, tia chong a pek jui.

³¹Hava han Jisu ning thiamruoingai jiang a ri, “Mi Pasalnai ha dan ojangai le, thiampulianngai le ulianrupngain jotnoniu, khodengthei na a tam tak duinata hale ama an that rang ani, hale ni thum suale ama a thui khir ret rang ke a ti.

³²Hale a man a thianga a tia ni. Hale Pitar in ama a hong tuanga aranjui.

³³Tak-ha Jisu a kan hei a thiamruoingai a en na Pitar aranna, “Seitan; kanuk tiang chero, Pathian i ngaidon ha ngaidon mak chea, miring ngaidonlam na ngaidon,” a ti.”

³⁴Hava suale Jisu ning mipuingai le a thiamruoingai ha akola akuia anmani jiang, “Tu a chang innom mi an khat in kanuk anajuijot a tinko a bing jak ranga ngaidon ma rase, a khros kandom senlang, kanuk na jui rase.

³⁵Ajarko tu a chang innom a ringkhuo akansanjot mi han imangrang hale keirang le chongsat rang jarra a ringkhuo a mang mi han kan san ring rang ani.

³⁶Mi an khat in ramuol pumpui a tum achangvera, a ringkhuo a manmang aninko, ama ranga imo a nem na a om?

³⁷Mi an khat in a ringkhuo le man kan thulnarang imo a nei?

³⁸Tu a chang innom tunlai siat nale sat mak na miruol sunga hin keirang le ka chong rang jarra a na jakpui mi ha, Mi Pasalnai han a pa lianpui nale kan ruaia thaneithiangngai an hong pha anjak pui rang ani,” a ti.