Read Aimol MARK 9 Bible Online

MARK 9 - Aimol bible

MARK 9

¹Hale Jisu ning anmani jiang a ti, “A thiang tak-a kinaripe ani, Pathian rengram ha ranaknei tak a hong an mu mak kar je athimakrang kan karra mi her khat an ngir ani.”

²Ni ka ruk suale Jisun Pitar, Jems hale Johon anmani anni ching asangna an khat chunga aluituangjui hale Jisu ha anmani mai kunga a mel akanthuljui.

³Hale apuansi ngaiha a chek lak avara a var, ramuol chunga tu ten hava anga rasuk manchek tor ma u

⁴Hale ankola Elija le Mousi an hong kando, ani Jisu le an lui kan biak.

⁵Pitar in Jisu jiang, “Oja, keini hiva mun na kan om hi asat ani, keini ning tham anthum sinrei, nang ranga an khat, Mousi ranga an khat, Elija ranga an khat,” a ti.

⁶Anmani an chit ankhel reia, a man irirang lui jet lai mak.

⁷Hale sum phai an khat in anmani a hong khu de jui, sum phai-a an phut han rasa an khat a honga, “A ma hi ka nai manrit tak ani, a ri ha ngairu,” a ti.

⁸Anmani a rak tak ansir anpang an en titira Jisu ni lui a tute mu lai ma u.

⁹Anmani tanga anhongchumlai, Jisu ning anmani jiang a ti miring nai ha thina tenna a thui khir mak kar je, na imu ha tute jiang risuak maru, tia chong a pek jui.

¹⁰Anmanin a chong an jui, tak-ha anmanilim karra, “Thina an phut thui khir ret,” tihi itinamo tia an kanbiakjui.

¹¹Hale anmanin Jisu jiang andingkella, “Dan atheingain Elija man ihongchiak rang ke” anti.

¹²Jisu ning anmani jiang a ti, “Irakip ranga Elija man ihongrang a suak ani, hale chong thiang in alui ti Miring Naiha khodeng a tam tak ithei rang ani hale andeilui rang ani.

¹³Tak-ha ken ka na ripe ani, Elija ha a hong jui, hale mingain a maha an dei nuk jui a i rakip a chunga chong thianga an ri anga anthojuike a ti.”

¹⁴Anmani thiamruoi a dangngai jiang an hong pha han, mipui a tam tak anmani jiang an lui om ha an mu, hale thiamruoingain dan thei ngaiha chong an lui kankherpuijui.

¹⁵Mipui ngaining Jisu ha an mu pha han an renga an ngak ama jiang a rak tak an tanna chubei an hong buk jui.

¹⁶Jisu ning a thiamruoingai jiang “Ichongmo anmani le nankankher tia ading kel?”

¹⁷Mipui karra pasal an khat in a sang, “Oja, kein ka nai nang jiang ka hong tu-ang, ajarko thavang satlui ning a chunga a om ma chong rithei mak;

¹⁸thavang salui han ama a chur pha, amankannik ani, thavangsatlui ha nanot cheipero tia kei ning na thiamruoingai jiang karia anmanin notchei tor ma u,” a ti.

¹⁹Jisu ning anmani jiang a ti; “E takngai na a nei lui mingai; i duk sot mo ka na om pui suamrang? I duk sot mo kanalaruaitor chak rang? Kei jiang ama ha hongtuangru.”

²⁰han anmanin amapa ha ama jiang an hong tu-anga, thavang satlui han Jisu a hong mu lim le, ama ha a kei tuara leithuai chunga a kan lum ma a bok a baija acherhuan a suak jui.

²¹Jisu ning a pa jiang, “Hingahin atinahi i duk mo asotjui?” tia ading kel. Hale a pan, “Anaipang chang lai an phut ani jui.

²²Phat a tam tak thavang satlui ning meisunga le tui sunga alui man lut jui. Nang in na tor inko lungsiat, tak na san pero alui ti,” a ti.

²³Jisu ning ama jiang a ti, “Adik, nang in na tor inko; takngai a nei mingai ranga i rakip anitorpet.”

²⁴Hava pa ha a rak tak-a chong a hong ria, “Kei tak ka ngai, han nom ivat sam na na sanro,” tia a ri.

²⁵Jisu ning mipuingai han an hong kan chun ha a mu pha han, thavang satluijiang han chong a pek-a, “Chong ajekthei mak le kuorsep thavang satlui nang kein chong ka na pek ani, naipangpa an phut han hong suak taro, hale ama jiang nang lutret lai maro,” tia alui ti.

²⁶Thavang satluihan naipangpa ha ranak nei tak a a kei kheak a a suak jui. Naipang ha a thi sa aruak ang jui, hava jarra mirakip in, ama a thi jui, an luiti.

²⁷Tak-ha Jisu ning ama kut ha a o va a keithui pha han, ama a thei a angirtheijui.

²⁸Hava suale Jisu inn sung a lut pha han, a thiamruoingain rukchian na ama jiang andingkella; “Ita mo kein in thavang satlui ha kannotchei torlui?” tia an dingkel.

²⁹Jisu ning anmani jiang, “Lam na jak in anotcheitor ani, i om om mak” tia aluisangjui.

³⁰Anmanin hava mun ha an mak Galili ankanna an che jui. Jisun a om na mun hi tute mi an khat jak in an jet rang hi a man luidei ma,

³¹ajarko anthiamruoingai a manjet, hinga hin anmani jiang a ri, “Miring Nai mingai kut chunga an pek rang ke, hana anmanin that nan ta, hale ni thum suale ama ha aringkhirret rang ke,” a ti.

³²Tak-ha anmanin aria imo a ti na jetthiang tor ma u, hale ama jiang dingkel rang om an lui chitjui.

³³Anmani Kapernam ma an hong jui, hale anmani inn sunga an lut pha han Jisu ning a thiamruoingai jiang, “Lam puia ichongmo nan kanjiat?” tia ading kel.

³⁴Tak-ha anmanin an lui om chianjui; ajarko tu mo ankara a lian tak chong anmani lam ma han an hong kan kher ani.

³⁵Jisu ning a kolla, a thiamruoi somleiningai ha akuia anmani jiang, “Tu a chang innom ama sat tak a chang jot mi ha mirakip nuk tiang hale mirakip suak ichang rang ke”, a ti.

³⁶A man nai pang ang khat a hong tu-anga an madonna a man ngira; a man a kut akuava anmani jiang a ti,

³⁷“Tu a chang innom kei ka minga hiva nai pang an khat alui mi han kei inalui ani, hale tu a chang innom kei a na lui mi han, kei jak a na lui niluia, a na hong tirpa ham ilui ani,” a ti.

³⁸Johon ning ama jiang a ti, “Oja, mi an khat in khonamngai na minga a notchei kein in kan mu, ama keinirup karra mi a chang mak jarra kein in kankhapjui, ani.”

³⁹Jisu ning anmani jiang, “A ma khap maru;” ajarko kei ka minga a ngak pa chuan a tho mi han a rak tak asat mak na tholainoning,

⁴⁰Ajarko keini ama endalui mi ha keini mi ani.

⁴¹Kein adik tak ka na ri ani, nang ni Khrista a mi nan chang jarra tui koklai an khat jak a na pek mi ha tu a chang innom ningsat na man ilamu rang ke.

⁴²“Hale kei tak a na ngai nai pang a sinte ngai an khat kutsuikesui na a tho ha tu a chang innom, a ringa chakiri lung an khat khitkhai a tuionglian athukna tak deng juan rang ama ranga asatdetjui.

⁴³Hale na kut an khat in siatna a na man tho a chang in ko, tanro; na kut anni a om ma a thi chilui mei khura nalutrang nek kut an khat jak le kum sot ring na nalutrang lam hi nang ranga asat det.

⁴⁴Hava han ralungin an chak ha thichilmak, hava han ikang meiham thichilmak.

⁴⁵Hale na ke an khat in siatna a na man tho a chang in ko, tanro; na ke anni ompumma mei khura nalutrang nek inko, na ke an khat jak le kekhoi puma kum sot ring na nalut lam nang ranga asat det.

⁴⁶Hava han ralungin ichak ha thichilmak, hale meikang han nom thichilmak.

⁴⁷Hale na mit an khat in siatna a na man tho a chang inko, kelro; mit anni om puma mei khura nilut rang nek inko, mit an khat jak le Pathian rengram ma nalut han nang ranga, asat det ani.

⁴⁸Hava han ralungin an chak ha thichilmak, hale a kang mei han thichilmak.”

⁴⁹Ajarko mirakip meining arovam manthingrang asuak machi ning pek phur amanthiang anga ani.

⁵⁰“Machi hi asat ani. Tak-ha machiha a alna a om mak, aninko nang in ija mo nan man altheirang? Nang ni na binga machi anga ni ru, hale an khat le an khat kancharu.”