Read Aimol LUK 1 Bible Online

LUK 1 - Aimol bible

LUK 1

¹Aphut na tak anmipa anluimungai hale, chong lui ringai anmani ning, keini jiang an na lui ripe nuk jui a,

²keini karra ahongsuakthei nuk jui a mitam ning rochi anga an hong jiak na ruia.

³O Theophilas a lian tak nang naluiri adik chong ha jetthei na ranga,

⁴kei om a phut na tenna akip hiamma an lui ri nuk jui a, hongsiak kati.

⁵Judia reng Herod mirual lai Zakharia anti thiampu khat alui om ama a numei ming Elizabeth anti, a mahi Aaron phung sunga numei alui ni.

⁶Anmanihi Pathian chitlejak a nei mi an lui ni, mirakip madonna Pathian chuan hi adik tak an lui tho.

⁷Anmanihi naibui an lui ni, hale a tam an lui tarjui.

⁸Hingahin Zakharia ning Pathian chuan innthianga chuan a tho lai tak han.

⁹A ma ning a rim hui dhup aluihal.

¹⁰Hava phat lai tak han mitam ning tualla an lui om ma Pathian chubei an lui buk lai tak han thourimhui an lui hal.

¹¹Biakinn sunga chang tiang han Thaneithiang a ngir ha alui mu.

¹²Han Zakharia ning a mu karra a tam alui chitjui.

¹³Thaneithiang in ama jiang a tipe, “Chitmaro Zakharia, nang nin nalamha Pathian ning a na jet pe, nanumei Elizabeth ning pasalnai an khat nei nati, a ming ko Johon nati rang ke.

¹⁴Nangrang a tam ningsat na rang ani, han ama a hong kanjirhi miring rakip ranga ningsat na ninati.

¹⁵Ajarko ama hi Pathian mit en na a tam liannati, hale Ju om innoning, ama hi a hong kan jir tenna an phut Thavang a thiang le a hong kan ruai ani.

¹⁶Hale ama ning Israel naingaihi Pathian jiang hong tuang nati.

¹⁷A ma hi Pathian madonna a rat tak Elija rat nale ranak ha nei nati. Anpa ngai ning an naingai jiang ngaidon na, Pathian chongla jet thei na rang, ama ning Pathian mingai ha lui man kan ning nati.”

¹⁸Zakharia ning thaneithiang jiang alui ti, “Hiva ngaihi ija mo kei chunga anitor rang? kei hi katarjui hale kanumei om atarjui.”

¹⁹Kei thaneithiang Gabrial ha ka ni, “Kei hi nang jiang hiva chong hi ri rang Pathian ning a na hong tir ani.

²⁰Tak-ha nang in ka chong ri hi tak na ngai mak innom ni khat ko a la hong suak rang ke, ka chong ri a hong suak mak kar je nang in chong ri thei noni che, nang in ka chong ri hi tak na ngai mak jarra ani.”

²¹Zakharia ning in thiang sunga phat sot tak a om ha mitam tualla an lui ngak, ijarra mo hivak han asothi antia,

²²ama ning a hong suak karra mingai ha leibiak theilaimak, mingain om an lui ti, ama ning in thiang sunga imo khat lui mu nati tia an ngaidon, a chong suak lui jarra a kut a jet na alui tho.

²³Hinghin ama ning Pathian chuan ha a tor suale inna a hong kir jui.

²⁴Aphat sotlui a a numei Elizabeth chungrik a hong om jui, han ama hi tha ranga alui kanthup ama chungrik om ha tha ranga alui thup, ama ning a ti, a tun ko Pathian ning kei hi a na sanjui.

²⁵“Hale minuiso ka tung rang rakip puman analuisuak pe jui.”

²⁶Tha karuk suale Pathian ning Galili ram Nazaret Gabrial thaneithiang ha alui tir.

²⁷Thaneithiang ning David phunga a om Josep anti pajiang a numei chang ranga chong an kan torsa numei thiang Meri jiang a honga,

²⁸ama ning Meri jiang a ti, “Lunghipha nangnjiang om rase, ravan satnu; Pathian in nang ha a na ruai chak.”

²⁹Thannei thiang chong ri ha Meri a tam a ning a dong jui, ichongmo ani tia a ngaidon.

³⁰Thanei thiang in Meri jiang a ti ret, chit maro, pathian in phual anapekdo.

³¹Nang nin pasalnai khat vonnata nala kan jir rang ke, a ming ko Jisu tinanti.

³²A ma hi lianpui na reng la ni nati, asangtak Pathian nai nan la tirangke, Pathian ong na mun ha ama jiang pek nanti, a pa David anga,

³³ama ning Jakob phung sunga reng la hong chang nati; a reng ramhi a tor ti om noning.

³⁴Han amani ning thaneithiang jiang a ti, “Ija mo hiva chuan hi ilani rang? Kei kalompa la om mak.”

³⁵Thaneithiang ning a hong sang, “Pathian in na chunga thavangthiangha a hong tir rang ke, hiva jarra naitepa Pathian nai ke anti rang ani.

³⁶Enro na inkuo naphung sunga Elizabeth om alui ti, tak-ha a tun ko nai avonjui. Chungrik a om ma. Tha ka ruk ani jui.

³⁷Ajarko Pathian nin itorlui i om om mak.”

³⁸Han Meri ning thaneithiang jiang a ti, “Enro, Puma suaknujiang, nang chong pek nuk jui a kei jiang a suak ha ni rase;” hale thaneithiang ha Meri a mak a a che jui.

³⁹Meri ning a thuia, tangbung tiang a che jui, Judia ram khopui han a tung jui.

⁴⁰Han ama ning Zakharia inn sunga a che, Elizabeth ha chubei aluibukjui,

⁴¹Meri ning chubei a hong pek ha a jet karra, Elizabeth a von sunga a om nai ha alui kanchomjui, Elizabeth om a thiang thavang ning aluiruai.

⁴²Han Elizabeth ning rasa suak a hong khek a ti, “Nanghi numei karra ravan satnu nani, ajarko nang in nai nalavon rang ke.

⁴³Hiva khan ravansat kanihi kapumanu nang in kei jiang nahonga hongkhanna rasisatmo ani.

⁴⁴Nachonghui ka jet an phut ka von sunga a om nai hi om ningsat le kan ruai a a hong kan chom,

⁴⁵Pathian chong ri ha tak a ngai mi han i duk ravansat numei mo i ni rang?”

⁴⁶Meri ning a ti, “Kalungsunga puma ka manpak.

⁴⁷Hale ka thavang ning a na san ringpu Puma ham ningsat tak a achoilom,

⁴⁸“Puma ning a suaknu kei hi a na ngaidonthei jarra enru a tun tenna an phut mirakip ning ravan satnu na tirang an ni jui.

⁴⁹Ajarko pathian hi ka chunga a na sanjui, puma ama a ming ko a thiang ani.

⁵⁰“Puma jiang chitlejak a nei mirakip ko Pathian ning a san theng pet.

⁵¹“Hale a man kan lian mingai ha ko puman a kut ranak han a kei thak an bing anbinga athechai.

⁵²“Puma ning a reng ong na mun tenna a tor pu ngaiha anongthak, hale a sin ngaiha a kei thui.

⁵³“Puma ning avoncham a pong ngai ham chaksat avai, hale a neingai ham kut ronga ama sua.

⁵⁴“Pathian in kan pu kan pangai jiang chong sam na alui nei ha, a nai Israelngai san ring ranga a hong jui.

⁵⁵“Puma ning kan pu Abraham ha alui ngaidon anga atu a tengai hi om phat rakip a a ngaidon.”

⁵⁶Meri ning Elizabeth le tha thum an om suale a nuk akanlejui.

⁵⁷Hale Elizabet kanjirrang a pha a hong tung han, a man pasalnai an khat a nei jui,

⁵⁸hava chong ha ainkua ngai ning an jet karra ningsat tak a ama hi an lui ma hok, mingai ning anti; i duk asat pathianmo ani hiva numei nu chunga a lungsiat na inadopehi.

⁵⁹Naitehan nikariat a hong tung karra anmanin vun tan ranga an lui hong, hale anmani ning a ming a pa ming anga Zakharia tirang an lui ti,

⁶⁰tak-ha Elizabet ning jot mak a “A ma minghi Johon kan ti rang ke.”

⁶¹Han anmanin an hong ti, hiva minghi naphung sunga tu khat om la kan phua ma u.

⁶²Hava suale anmanin imingmo kanphuarang tia ankandingkel,

⁶³Zakharia ning jiakthei na rang Selep khat a lam ma a man Johon ani tia ati jui. Mingai ning a tam an ngak jui.

⁶⁴Hiva phat laitakhin Zakharia veikhat chong a hong ritheiretjui, Pathian a manpak.

⁶⁵Hingahin a innsir, a inn tanga a om mingai ning an jet karra anluichitjui, hiva chong hi Judia khopuia a om rakip jiang akantirjui:

⁶⁶Mipui ning an ngaidon hiva naipanghi “Ija mo ihongni rang?” Tiko Pathian ratnahi ama chunga a om.

⁶⁷Johon a pa Zakhariahi Thavang Thiang ning aruaija Pathian chong alui risuak;

⁶⁸“Pathian ha manpak tarei, Israelngai Puma ha a hong jui, a mingai pong khodengthei san ranga!

⁶⁹David phung sunga San ringpa aratpa khat keini jiang a na pek jui.

⁷⁰Kum ijat madonna Thiampungai rakip jiang chong alui phuangsuak anga;

⁷¹keini rakip anamatir le a na enda tenna an phut ama ning na san rang ani;

⁷²Kan pu kan pangai jiang ka na manrit rang ke alui ripe ngaiha ama chong thiang ngaidon na ranga ani.

⁷³Kan pu Abraham jiang alui ri nuk jui a,

⁷⁴Puma ning khodengthei na tenna a na sanringa, chit ti om lui a a chuan a na manthojui.

⁷⁵Hiva jarra puma ning keini hi ringkhuova siatna tenna a na mandikjui, a na man thiang jui.

⁷⁶“Hale nai, nang ni hi a sang tak Pathian amachong sem nan ni jui kan ti rang ke; ajarko Pathian jui na lam kan ning ranga puma madonna ni che rang ani.

⁷⁷Mirakip jiang tiperu Puma ko San ringpa ani, hale an siatna rakip ham a ngaidam pe jui.

⁷⁸Puma Pathian in ama manrit na hi jing dai kho var anga kan chunga a na hong manvar pe jui;

⁷⁹avarhi ajinga alui omngai ranga ani, lunghip ning kei hi a na manruai chak jui.”

⁸⁰Hingahin nai pang ha thavang le tak sa ahongrat suam jui, han Israelngai jiang andomak kar je lampuia ramlai a alui om.