Read Aimol LUK 10 Bible Online

LUK 10 - Aimol bible

LUK 10

¹Hiva suale Jisu ning Tirlon somsari leini athanga, mi anni a man kan ruaia khopui rakip alui tir jui.

²Jisu ning anmani jiang a ti, chapar khomrang a tam, tak-ha akhom ranga miko an tom. Hiva jarra alui neipu jiang riru, chapar khom ranga mi a na hong tir pe na rang.

³Enru kein nang ni hi keisal karra belram anga kanatir ani.

⁴Nang nin peisa thunna sekhui puankok, Kekok i te khat choi maru, hale lamlaia mi chubeibuk maru.

⁵Nang nin Inn khat nan lut karra ama sat tiru, a hip ha hiva inna om rase.

⁶Han anmani jiang a hip ha a om aninko nang nin nan pek a hip ha an chunga i om rang ke. Anmanin anluimak aninko a hip ha nang ni jiang vakir nati.

⁷Hale hava inn han an na pepek chak nekru, ajarko chuan a sin ama han a pong lo imurang a suak, inn khat tenna an phut inn dang khat kan thon maru.

⁸Hale nang nin khopuilian na nan che karra, anmani ning nang ni ha an na luilut aningko, nanma don na an na dongpe rakip chakru.

⁹Hava hanna a om mingai ha mandam peru, hale anmani jiang riperu, “Pathian rengram hi a hong nai jui.”

¹⁰Han nang nin khopuilian khat nan che karra nang ni ha an na luidonmak aninko, hava lam lian lamlianna che unlang riru;

¹¹Nan khopuia keini kankedirhan shakhi chang na ranga kan na nalpe ani. Tak-ha ngaidon taru Pathian rengram ha anai jui.

¹²keinin nang ni jiang kan na manjet ani. Pathian chong jen nikhuo hin hava khopui ha nek sodom lammin asadet rang ani.

¹³Khorazin iduk khodengthei na ani nang ranga? Bethsaida nang ranga om iduk khodengthei na mo ini? Ajarko nang ni jiang a suak a ngakpa chuan hi Tair le Sidon hin alui suak aninko anmani ning hava laia ruipuan ankaia, hale vaiphin, vaivut kanphul nan ta an lung an lui thul rang ani.

¹⁴Tak-ha a torna chongjen chongtan nikhuo hin ko Tair le Sidon nek nangnilam atatdetrang ani.

¹⁵Hale Kapernam nang ko vanram tung khanamo na kan domjot? Nang ko mei khur sunga na deng lut rang ani.

¹⁶Nang ni chong a na ngai mingai ha, “Kei ka chong annangai anni, hale nang ni a na jot lui ngaiha kei a na jot lui anni, hale kei a na jot lui ngaiha kei a na hong tir Pathian ha an jot lui ani.”

¹⁷Hale tirlon somsarileini ngaiha ningsat tak a an hong kan le a anti, “Puma” nang “Nang naminga bhut ngai ning om kan ri rakip ha annachit.”

¹⁸Han Jisun anmani jiang alui ti, “Vanram tenna an phut kolkanlet anga seitannin ramuol la a hong chul kan mu.

¹⁹Enru nang nin rul rakip le aipui, braschik chunga nansir na ranga, hale a na enda rakip tor thei na ranga ranak ha kei ning nang ni jiang ka na pek ani jui, han nang ni hi i om pop lai noni che u.

²⁰Ha aninnum adik lui thavang ning a na ruai tia na ning man sat maru, han nang ni ming ha vanram ma an anjiak jui tia nan ning man satru.”

²¹Hava lai tak han Jisun Pathian jiang ningsat a lam ma, O, Ka pa vanram le ramuol pumma kein ka na manpak, ajarko nang in hiva ngai hi a ching a thei ngai jiang nathup nai pangngai jiang na manjet jui, ajarko hivahi nang na lungdo ke ani.

²²“Hiva chuan rakip hi ka pa ning kei jiang na na ngamnajui, a pa kan chel lui a a nai ha tu mo ani tihi tu ning om jet ma u, ajarko anaipaha tupa naimo tihi tu ning om jet noni u.”

²³Han Jisu ning thiamruoingai a en na a ti, “Nang ni ning nan mu nan mu rakip a mungai ha ravansat anni.

²⁴Ajarko kein nang ni jiang ka na ti, ajarko Pathian chong luiri hale reng rakip ning, nang ni ning nan mungai ha anluimujot tak-ha lui mu tor ma u, hale nang nin nan jet rakip ha an luingai jot tak-ha luijettor ma u.”

²⁵Jisu hi dan en rang tia dan oja an khat a honga a ti, “Puma ije ka tho le kum sot ring na ki mu rang?”

²⁶Jisu ning a sang “Che na dan rabuhan a kan jiak ha nang in ija mo natel?”

²⁷Han ama ning a sanga, “Napathian na Puma ha na lung pumpuia lungsiatro, hale na inn ri na inn tang ha na tak tak na kan lungsiat anga lungsiatro.”

²⁸Jisu ning alui ti, “Nang in adik nanasangjui, hivahi thoro,” hale “Kum sot ring na mu nati.”

²⁹Han a man sat akanrolla Jisu jiang ading kelret, “Ka inn ri ka inn tangai ha ko tungai ha mo anni?”

³⁰Jisu ning a sangret, “Tu ang mi an khat ning Jerusalem tenna an phut Jerikho tung na rang alui hong lai han, miruk dakungai ning, a puan adiar, aruphai choirakip ansut, hale a tak om anvejek lamlaia anpaijui.

³¹Hava suale hava lam han thiampu an khat alui hong, a man hava ha a mu karra lam dang khattiang aloia a che jui,

³²hale vei khat hava lamlen han biak inna chuan tho Levi alui hongret, amannom mipaha a mu karra a dang khat tiang aloia alui che jui.

³³Hava suale ramchei che Samaritan mi an khat hava lam lian tiang han a honga a man mipaha a mu karra a lung asiatjui.

³⁴A man a honga apomma apopnale anatna rakip thaiatei pe jui, hale Sakor chunga a man chuanga tuang jui, han mitungna inn khat a a hui a a man om jui.

³⁵Nikhat suale a man a hong karra dinnar anni ruphai anni a pek. Hale a man inn neipu jiang a ti, ‘A ma chunga alutrakip kei ka hong kan le phale ka na ma le rang ke, asat a luienro.’ ”

³⁶Han Jisu ning a dingkel la, imo na ngaidon? “Hiva miring an thum karra tule tu ha mo khodengtheipa inn ri inn tang ani?”

³⁷Han chongjenpu dan oja han a sanga, “Ahuia a tho pe ama han ni nati.” Jisun ama jiang a ti, “Chero nang om hava anga hongthoro.”

³⁸Hingahin Jisu le thiamruoingai ha khopui khat a an hong karra Martha anti numei khat ning Jisu ha aluidonjui.

³⁹Han anaipangnu Meri an ti nu khat alui om, a man ko Jisu kol la a om ma a chong ri rakip asat aluingai.

⁴⁰Martha ning a chuan a tam reia a man Jisu jiang alui ti, “Puma kei ka thei jak kanaipang nu ning sep a inamanthohi takteluia mo niom? Kei hi aviar a na san na rang na ri pero.”

⁴¹Tak-ha Jisun amanu jiang a sang, “Martha, Martha, nang ko na sin akandeng jarra na ning adong.

⁴²Tak-ha tho mak jot lui chuan khat a om, Meri ko ama jiang tenna an phut lui khir i jot lui rang khat alui jui.”