Read Aimol LUK 11 Bible Online

LUK 11 - Aimol bible

LUK 11

¹Hingahin Jisu ning lam na a nei lai han hingahin alui suak, a man lam na a tor pha han, thiamruoi khat ning Puma jiang alui ri, Johon ning thiamruoingai jiang lam na alui manchu anga, keini om namanchuro.

²Han Jisu ning a luisang, nang nin Pathian jiang nan lam karra hingahin tiru, “O a pa Pathian na ming a thiang ha nirase, na rengram ha hong tung rase,

³kein in kankhop na rang chak le nek ni khat ni khat ranga napekro,

⁴hale kan siatna rakip na ngaidamro, ajarko keininom kan lamal atual ngaiha kanngaidam hale keini hi mathemna tiang hin na man lutmaro”.

⁵Hingahin Jisun anmani jiang a ti, nang ni nan karra tu ang khat in ansap khat jiang janchimrip a chea, “sap tal anthumjak napekdiro,

⁶ajarko kei ka sap khual mi khat a hong tung jui, han kein ama manchak ranga i te khat nei lai making a ti karra,

⁷a sunga a om pa han, kei na man pong maro, a tun kot inn khar kakaljui, hale ka nai ngaile kanjalla kan om jui, a tun thuibak nang ite khat na pek tor noning tia hong sang nati mo?”

⁸Kein nang ni jiang a thianga ka na ri ani, ama ha asappa ani chunga thuibak pekjotmak, tak-ha nalamrei inko, ama ning thuinata aneisalep a na pek rang ke a ti pe.

⁹Hiva jarra nang ni jiang a thianga ka na ri ani, lamru, nang ni jiang napak nati, tokru, nang ni mu nanti, Innkharha veru, nang ni jiang na long pe nati,

¹⁰ajarko a lam mirakip in an mu, atokngain an jet, hale inn khar ave rakip jiang a long pe.

¹¹Nang ni karra tu angpa ankhat jiang a nai ning tal a lam karra, lungtum mo apekrang? Animakle nga a lam karra, rul mo ama jiang nga rahut a pekrang?

¹²Animakle artui a lam karra, atur om rulhamo ama jiang ipek rang?

¹³Hiva jarra nang nin a satlui ha nan lui ninnom nan naingai jiang phursat a pek nan thei aninko, chunga a om nan pa Pathian ning a khel la a lam mingai jiang thavang thiang le kan ruai a ipekrang ani.

¹⁴Hingahin Seitanning amanvet chong ri thei lui mi ankhat alui om, han Jisun seitan anotsuak suale mipa ha a satjui, chong a hong ri karra mitam ning pum ngak an ngak jui.

¹⁵Tak-ha mi aviar ning anti, hivahi khonamke, Seitan ngai rengpa Belzabul ning khonam anot suakke anti.

¹⁶Mi aviar ningko Jisu hi dan an enjot jarra an lui ti, vanram tenna an phut jet na tetan naha na man muro, anti.

¹⁷Han Jisun an ngaidon ngaiha a jet a a ti, rengram rakip an kansen karra rengram ha majiang hongtanati, mangnati, hale inn sung khat le inn sung khat ankansen aninko anmani ha mang nanti.

¹⁸Seitan ning om a tak sunga a kan jot mak aninko ijarra mo arengram vai ahomrang? Ajarko kein Seitan kanot suakhi Belzabul ranak ani nanti.

¹⁹han kei ning om Belzabul ranak Seitan kanot suak aninko, nan naingai chunga Seitan ha turanak amo anotsuak?

²⁰Tak-ha kein Khonam kanotsuakhi Pathian kutsin na aluininko, Pathian rengram hi nang ni jiang a hong jui.

²¹Anat mi khat in, ralpuanle ral ratuk athoa anei aphur ngaiha arung karra, ama aphur ngaiha mang noning.

²²Tak-ha ama nek a arat khat a hong karra ama jiang a om phurpai puan a renga sutnata hale phurngai ha a sem rang ani.

²³Kei le akanruailui ama ha kei a na enda ani, hale kei le a na ompuilui ama ha a na tande mi ani.

²⁴Thavang satlui han mi tenna an phut a hong suak suale lut na rang mun a tok a achehan a man i om a mulailui pha han a ti, kei ning ka hong suak na mun han kir ret takati a ti,

²⁵han a man a hong kir karra a kan phiatpet a kan sin hei a a om ha alui mu.

²⁶Hiva jarra ama ning ama nek a asatluidet thavang satlui sari a hong tuanga an lui om jui, hatenna ko alui nat jui.

²⁷Hingahin Puman chong a ri lai tak han mitam karra numei an khat ning Puma jiang a ti, Puma nang in na hong kanjirna von naikok ha rasisatke, hale nang in na lui in ranuha ravan satke ani.

²⁸Tak-ha Puma ning a sanga, hingahin an in nom Pathian chong a jet a a jui mingai ha ravansat anni.

²⁹Hingahin Jisu ha mitamin an lui hirra anti, a ngak pa chuan Jetna na man muro, han Jisun a sang, a tunna khang mirual ngaihi asat om mak che u. Jona jianga jet na ni lui a tu ning om jetna adang napek lai noni u.

³⁰Ajarko Jona ning Neneveh mingai jiang jetna a chang anga, Mi Pasalnai ning om hiva khang rual hin jetna tetan na ha ani rang ke.

³¹Taitak tianga rengnu ning chongjen nikhuo han hiva khangrualla pasalngai le kan ruai nan ta anmani ha adik lui anni alatiperang ani, ajarko a man kolmong tenna an phut Solomon chingna ha jetkati tia a hong ani, hale enru a tun Solomon nek a lian mipa ha a om jui.

³²A torna chong jen nikhuo han Niveveh mingai thui nan ta, nang ni dik mak che u an na latirang ani, ajarko anmanin Jona chong ri an jet karra an lung anluithul, han kein na ti rong a tun Jona nek a aliandet ha a om jui.

³³Tu khat ning om thaimei meiser ansit karra mimului na rang, animakle luk khudemau, tak-ha a hong lut mi ning an mu na rang tia thai mei siakna chunga ansit ani.

³⁴Nang ni na taksa meivarko na mit ha ani. Namit chena mun adiklejak na taksa pumpui ha imanvar ani, tak-ha namit chena ha adik mak inko na taksa pumpui ha amanjing ani.

³⁵Hiva jarra nang jiang a om a var ha ajingmo enru.

³⁶Han na tak a renga a jing na mun na man om luia asat a namanvar inko, thaimeining ivar anga nang om pum varra navarrang ani.

³⁷Hinga hin Jisun chong a ri sualehan, Pharisi an khat ning Puma ha bu nek ranga alui kui, han Jisu ning a chea alui ong jui.

³⁸Jisu ning bu nek madonna a kut arasukha Pharisi pa ning a mu karra alui ngak jui.

³⁹Han Jisun Pharisipa jiang alui ti, a tun nang ni Pharisi ngai ning kheng le kual ngaihi ma pal tiang jak nan not, hale nan lung sungako a satlui leisei ning a sip.

⁴⁰Mipangai; mapal tiang asin Pathian han asung tiang om a sin mo nimak?

⁴¹Hingahin a sunga a om phur ha kan pekru, hale enru phur rakip nang ni ranga athiangpet.

⁴²Nang ni Pharisingai ranga pong khodengthei na a om; ajarko nang nin anle na ko semsomma nanpekbak a; Pathian chong thiang adik ha ko nanmasuajui, hiva ngai hi nan tho rang a suak, hale a dangai ham ma sua maru.

⁴³Nang ni Pharisingai ranga ning dong a om ajarko inn thiang mun hin nang nin a lian na om rang nantok, hale mingain nang ni jiang chubei man kan bukranghi nan dei.

⁴⁴Nang ni ranga ning dong a om! Nang ni ko mu lui than anga nan ni, ajarko mingain than chunga an lui che jet chil lui a.

⁴⁵Dan oja khat ning Jisu jiang aluiti, Puma nang in nari chong han keini jiang mai chuapna kan nei jui.

⁴⁶Jisu ning a sanga, dan oja jiang nang ni chongjenthei ngai rang om ning dong a om! Ajarko nang nin phur rik hi mingai nan man choi, tak-ha nang ninko phur rik ha nan kut chalningom mansitjot ma che u.

⁴⁷Nang ni ranga ning dong a om; ajarko nang nin Pathian chong aringai ranga thamun nansin, hale nang ni nan pa nampu ngain anmani ha an lui that.

⁴⁸Hingahin nang nin kan mu kan jet nanluiti, hale nang ni ning a jot om nanti, ajarko anmani le anmani ankanthat hale nang nin anmani thanmun nansinpe ani.

⁴⁹Hiva jarra han Pathian jetna chingna han nom a ti, Kein anmani jiang kei ka chong lui ringai hale katirlonngai kimanche rang ke, anmani ning an that rang ke, hale a dangngai ha an man pong rang ke,

⁵⁰ramuol a phut na tenna a thei a rangai an lui that thi sen ha Abel tenna an phut,

⁵¹Zakharia tunga Pathian chong thiang lui ringai chunga thina alui hongsuakhi nang ni khang rualngai chunga ichul rang ke, han kein nang ni jiang kari ani, hiva miruol chunga kinasing rang ke.

⁵²Thiampulian chongjenthei ngai chunga ning dong a tam a om; ajarko nang nin ching na var na chabi soha nan lui suak jui, nang ni nan tak ning om lut mak che u, hale lut rang a ti ngai ham man lut ma che u.

⁵³Jisu ning hava mun tenna achesua pharisingai le dan oja, chongjenthei ngai ning Jisu ha an lui risiatjui, hale ama jiang chong adadang anding keljui.

⁵⁴Han anmanin Jisu ama sial na jak ha an ruanga an lui om ani.