Read Aimol LUK 13 Bible Online

LUK 13 - Aimol bible

LUK 13

¹Hingahin Pilat rengpan Galili mingai hi thisen le ankatrang phur, a man kanjel pe jui tia, mi aviar ning Jisu jiang anluiripejui.

²Han Jisu ning anmani jiang a ti, Galili mingain hiangahin pongna an jet jarra, Galili a om mirakip ning a khel la siatna an choi tia mo nan ngaidon?

³Kein nang ni jiang kari, nimak; nang nin nan lung nanthul mak aninko hava ang han nang ni nan renga nan mang rang ani.

⁴Silomma mi somlei kariat, Inn ning adekhua, an thi ngaiha nang nin Jerusalem ma a om mingai nek a siatnei anni tia mo na lui?

⁵Nimak; kei ning a thianga naripekati, nang ni ning nan lung nanthulmak aninko nan renga nan thi rang ke ani.

⁶Hinga hin Jisu ning tetanna an khat alui ripe, “Phat khat a Darkha kung rahuan khat alui nei, a man arahuan hin thei chang kung khat a nei, arako luimumak.

⁷Han ama ning rahuan ngakpa jiang a ti, ‘Enro kein kumthum hin hiva theichang hi ka en na a ra mu making, hivahi tuk khiakro, ama ning simlei hi arianma a man om hi ijarra mo ini?’

⁸Han angakpan a neipu jiang alui sangjui, ‘Puma kumin jakko omdirase, kei ning hiva a sir apanghi asatak a Serat ek hapkati,

⁹hanna a hong ra aninko a satjui, han aramak aninko tukthat taro’ ” a ti.

¹⁰Nikhat pong kan sak nikhua khat Jisun Sainagok hin alui man chu,

¹¹han kumsom leikariat tunga thavang satlui ning imannat numeinai akong akuntit thuina jot lui an khat alui om.

¹²Han Jisun ama ha a mu karra akuia a ti, numei nang in nanatna tenna an phut ka na mandanjui.

¹³Jisun numei nainu chunga a kut a siak pha han anatnuha a dam jui, han Pathian alui manpak jui.

¹⁴Han Sainagok sunga a om chuantho han pong kansakni mi imandamha a lung luihui ma, mitam jiang a ti, “Mi ning chuan sin na rang nikhuo karuk a om, hiva sunghi a nat mandam rang hongru, pong kan sak nikhuo hin ko hong maru” alui ti.

¹⁵Han Jisu ning a hong sanga, “A sat kanroljot, nang ni mirakip ning pong kansakni nanserat ngai, nan Sekorngai nan khit tenna nansut a tui nanmanin nimak mo?

¹⁶Enru; hiva Abraham anainu hi ko kum somlei ka riat Seitan ning alui khit, hivahi pong kan sak nikhuo hin sutmo jot mak?”

¹⁷Hiva chongngai hi Jisu ning ari a a en dangai ha a man jakjui.

¹⁸Ajarko Jisu ning a ti, Pathian rengram ha ilemo kakhi de rang?

¹⁹Hingahin ani, “Mi khat ning anchamru alui a alui puk laia alui vor, hale hava han a hong mong, a hong kanthuia, thingkung anga a hong lianjui, hale a changngai chunga Vate ngain an rabu ansinjui”.

²⁰Hale Jisu ning a ti ret, “Ilemo tetan na ki tho ret rang, Pathian rengram hi?

²¹Hingahin numei khat ning Yam athit a pek an thumma akhui senna, han a man chol aphilla amut mak kar je a siak anga ani.”

²²Hinga hin Jisu ning Jerusalem tiang ahonghan, khopui rakip han a lut mirakip alui manchujui.

²³Mi aviar ning an dingkel la, “Puma ring na a mungai ha aviar jak mo anni?”

²⁴Han Jisu ning anmani jiang a sang, “Kot Inkhar asinhan lutru, ajarko kein nang ni jiang kati, mi atamin han lut rang anti, tak-ha lut tor ma u.

²⁵Inn neipu pan kot a khar karra nang nin tualla ngir nan ta, kot ve nan ta ‘Puma keini hi na longro’ nanti karra a man ‘Nang niha tumo nan ni na jet making’ tia na hong sang nati.

²⁶Hava phat han nang nin nan tirangke, ‘kein in nang le chak le nek kan lui tho, nang in na na leiman chumo nimak’?

²⁷Hale a man hong ti nati, ‘Nang ni ha hon tianga a hong mo nan ni? Kei tenna an phut che taru, nang ni misat nimak che u;’

²⁸Nang nin Abraham, Isak, Jakob hale Pathian chong lui ri rakipngai ha Pathian rengram ma, han nang ni hako tualla napai nanta hava mun han chap nanta, nanha krak krak riallang nan ni.

²⁹Han anmanin nisua, taitak, hale simle mar tenna an phut hong nan ta Pathian rengram ma an ong rang ani.

³⁰Hale enru; a tunna aphut na ngai han a torna hong chang nanti, hale, a tunna a torna ngaining a rapa hong chang nanti.”

³¹Hava phat lai tak han Pharisi ngai ning Jisu jiang an honga anti, “Nang a rak a hiva mun tenna an phut che taro; ajarko Herod ning nang ha nathat rang ati jui.”

³²Han Jisu ning anmani jiang a ti, cheru, melang ngai jiang tiru, “Enru, ve en ni om, jiang om kein khonam kanotchai, anatngai om kamandam, hale ni thum sungako a chuan rakip lungdo kimantung rang ke.

³³Hale ve en ni om, Jingom, thiamma om kei kiche rang ke, ajarko Jerusalem jak ni luia a mun rakip Pathian chong ri ngai mang jot mak that tihi dik mak.

³⁴“Pathian chong lui ringai an that, hale nang ni jiang a hong tir ngai ha lunga an deng, O Jerusalem, Jerusalem, arpui ning athanuaia atengai akhude aruai anga kei ning na nai ngaihi i duk asat a kapom jot, tak-ha nang in najotpe mache;

³⁵Enru nang ni inn hi arong hiaia kasiakjui, han kein nang ni jiang kari, Puma minga a hong a maha ravansat anni, tihi nang nin nanti mak kar je kei hi nan na mu rang ni lai mak.”