Read Aimol LUK 14 Bible Online

LUK 14 - Aimol bible

LUK 14

¹Pharisi ngai karra a lian a chong che an khat inna Jisu ning pong kansak nikhuo hin bukheng ban alui chehan pharisingain Jisu hi anluiruanga an lui om.

²Jisu kolla a kut a ke pumthinga athingpa khat alui hong.

³Han Jisun pharisi jiang ading kel, “Pong kansak nikhuo hin mi mandamhi nang ni dan nuk jui a ajotmo, jot mak mo?”

⁴Han anmanin i om sang ma u, Jisun mipa ha amandamma a man che jui.

⁵Han Jisu ning anmani jiang a ti, nang nin nansial hale nan naingain pong kansak nikhuo hin khur sunga an chul aninko, pong kansak nikhuo lenhan nankei suak rang mo nimak:

⁶Han anmanin hiva chong hi luisangtor ma u.

⁷Hinna thangkuina chea mungain a lian ongna mun an lui tokha Jisu ning a jet karra anmani jet na rang khat aripe.

⁸Nang nin lu huang khat a kholai khang ranga bu nek ranga an na kui karra a lianngai, chitlejak a omngai ong na han ong maru, tu ning mo an jet nang ni nek alian anmani ning lui kui a jot.

⁹Hale nang om, a na kuipa han hong nata nang jiang inati rang ke, hivapahi ong na mun pektu mo, hava phat han, nang in jak nata athuai tak a na ong rang ani.

¹⁰Han nang ha kuina a na nei karra athuai a sin ngai ong na han ongro, han a na kuipa han a hong karra sap hiva a chung alutiang ongna hin na ongpero tia inakui rang ke. Hingahin mitam karra nang ha chitjak an na nei rang ani.

¹¹Han a man kan lian ama han alasin rang ke, hale a man kan sin ama han a man lian rang ani.

¹²Hale Jisun mi kuirangpa ama jiang om a ti, nang in jingtiang animakle nitak mi bunek nakui karra na sap najar, na u na nai, a nei kan chong na innsir ngaiha kuimaro. Tuninge anjet anmani ning om nang ha vei khat nala ma le a jot.

¹³Tak-ha nang in mi navai bunek na kui karra asualngai, a ke kiakngai, a mitdel ngaiha kuiro.

¹⁴Hava na tho han nang ranga ravansat ni nati, ajarko anmanin nang jiang lamal nasak tor noni u, ajarko a thi ngai ning an hong thuikhir phat han Puman nang ni jiang nasak nati.

¹⁵Hinga hing Jisu bukheng mun khat alui ong suam mi khat ning a jet karra Jisu jiang a ti, Pathian rengram ma bungeija a om mi ha ravansat anni.

¹⁶Han Jisu ning ama jiang a ti, mikhat ning khengbu ban a lian tak khat ranga mitam tak aluikui.

¹⁷Han a kui mingai ha, hongtaru, i rakip kan kan ning ver jui tia a suakngai ha a tirra a hong man khomjui.

¹⁸Tak-ha anmani rakip ning mikuipa jiang ngaidam an lui lam amasatpa ning atia, kei lui khat kachok hong enbak kati, ve enni kei hi hongtor lai noning.

¹⁹Hale a dang khatpa ning a tiret, kei ning serat pot ranga kachok, ansatmo, an satlui mo hong enbak dirong, kei hongtor noning.

²⁰Hale ankhatpa ning a tiret, kei kanumei khat ka hong tuang jui, hongtor noning.

²¹Han suakpa han a hong kanlea rengpa jiang manjet karra, rengpan a ranga a suakpa jiang a ti, Khodung laia chenlang, a mitdel, a riang aroi, akekiak, apongaiha hong tuangru.

²²Han suakpa ning rengpa jiang a ti, Puma nang in niri nukjui a thokati, tak-ha mun hi a tam a la om.

²³Han rengpa ning a suakpa jiang a ti, cheunlang khopui rakip, khodung khokhanga mirakip hong khom unlang ka inn hi sipnarang bang saluia hongtuangru.

²⁴Ajarko kei ning nang ni jiang kari ani, kakuia ahongluingai tu khat innom hi anga kholai khangnahi kan chel noni u Kuina a mu rakip ning kabu ka an neknahin kan chel noni u.

²⁵Hingahin ni khat mitam le Jisu an lui kan ruaia anmani jiang a kan heia a ti,

²⁶kei jiang a hong rakip ning Kathiamruoi chang tor noni u, anmani ning kei hi an pa an nu nek, an nai pangai, annumei nek, an naingai nek a kei hi an na lungsiat rang a suak.

²⁷Tu aninom an tak an khros a hong kan choilui ama han kanuk najuitor noning kanuk juiranga matik chamak.

²⁸Ajarko nan karra mi khat ning inn asinjot aninko inn sin torkhanna a lut rang sumle sial a nei jui mo, hale a man ongnata asat telnata ngaidon noning mo?

²⁹Hinga hin animak inko a man innsinha a phut bak a ator theimak pha han,

³⁰miring a mu rakip ning innsinpa jiang a innsin torthei laimak tia nuiso rang an ni jui.

³¹Animakle reng khat ning reng khat jiang ral tho a che karra ralmi lising som aneipa han ralmi lising somni aneipa kanduipuitor nati mo tia a man a masat kan ngaidon noning mo?

³²Ral ha athotormak inko a dang a lak omngai jiang, kan chamnarei tia chong choi ngaiha tirnoning mo?

³³Hiva jarra nang ni karra hin nom nan tak chunga a om rakip masua luia a hong ama han kei kanuk najuitor noni u.

³⁴Ha ang han machi hi asat ani, tak-ha machi ning a al ha a mang inko ija mo itui rang?

³⁵Hava ha simlei ranga om hale har rang om a nem na omlaimak, han peinanta ariampa a om rang ani, a kuar nei ama han ngai rase.