Read Aimol LUK 15 Bible Online

LUK 15 - Aimol bible

LUK 15

¹Hiva rakip suale khasana chom, ngai le siatneingai ning Jisu chongngai ranga an lui hong.

²Han pharisingai le a dang dan ojangai ning an lui risiatjui, “Hivapahi ijarra mo siat nei ngai le bukheng iban chun?”

³Jisu ning anmani jiang tetanna khat aripe.

⁴“Nan karra belram selpa khat ning abelram reakhat sunga ankhat a vat han a mang han somkualeikua ha mak bak a amang belram khat ha hongtok nata, amumak kar je atokluirang nan om mo?

⁵Han a man a hong mu karra alianga hongput nata ningsat a hong tuang noning mo?

⁶Hale a man a hong kan le pha han a sap a jar ngaile a Innsir a inn tang ngai kuinata keihi ning nasat puiru, ajarko Ka belram a mang ha ka mu jui tirang ani.

⁷Kein nang ni jiang ki na ri ani, hingahin alungthul ngai lui Pathian jet lui khat ning a lung a thul karra Pathian jet somkualeikua nek a siatnei mi khat ha vanram ma puma ningsat na a nei.

⁸“Hale ruphai som a nei numei khat ning, makhai khat a manmang karra thaimei sitnata, innphiat nata a tok lui rang numeimo an om?

⁹Han a man a mu karra a innsir, a inn tang, a sap ajarngai kuinata keihi na ning nasat puiru, ajarko kamakhai khat a mang ha ka mu jui itirang ani.

¹⁰Hingahin kei ning nang ni jiang ka na ri ani, siatnei nai khat ning an lung anthulha thaneithiangngai madonna ningsat na khat ani.”

¹¹Jisu ning hinga alui ti, “Pasal khat in a pasalnai nai anni alui nei.

¹²A nai naipangpa ning apajiang a ti ‘Kamurang katum lal le thum rakip ha napektaro,’ hava han a pan a lal ngai ha aupa le asempejui.

¹³Hale naipangpa han apajiang lal rakip ha alui a ram lak tak a ache jui, han a nei rakip ha pumtorra a torpet jui.

¹⁴A nei rakip a manmang pet pha han a om ma ram han bu an atangjui, han ama khodengthei na a mujui.

¹⁵A man a om na ram ma mipa khat jiang a lut a ama voksel ranga luipuk hin alui om jui.

¹⁶Hava han a man vokbuha a chak jot jui, a von a cham reia, tak-ha tu khat ning om lui pek ma u.

¹⁷Han ama ning a hong angaidon khir jui, ka pa suakngai ning om anchaktor annektor luikhan a siak, ijarra mo kei ning von cham ka khanga hiva mun hin ka om?

¹⁸Kei ning thui kata ka pa om na mun na che kati, ‘a pa kein Pathian le nang madonna siatna ka tho jui,

¹⁹kein a tunko na nai ti ranga ka rahui chang laimak, keihi na suak khat anga na man omtaro,’ vatikati ati jui.

²⁰Han a man a thuia a pa kol la a che jui, hingahin ama ning atungma va ralla a pa ning a hong mua, a pan avatanna lungsiat le akoljui.

²¹A nai pa han apajiang a ti; ‘A pa kei ning Pathian le nang madonna siatna ka tho jui, kei a tunko na nai ti ranga ka rahui chang laimak, keihi na suak an khat anga nasiak taro’.

²²Han a pa ning asuakngai akuija a ti, ‘Nang nin puansi diar asatak ngaiha mantiang taru, hale kiat sarit mandon nang kekok manchong taru.

²³Nang nin anoltak seratte khat thatru, kan renga kan ning man sat suam tarei.

²⁴Ajarko kanaipahi athibak a ahong ring khir ani, alui mang tak-ha kanmukhir jui, han an ning asat ut ha anlui tho jui.’

²⁵“Hiva phat hin a nai ulianpa ning luipuk alui om ma intiang alui hong kan le pha han antualla khuangle sanan ta, an lam rasa ha aluijetjui.

²⁶Han anmani ning ansuakngai khat jiang akuia ading kel imo a suak jui.

²⁷Ansuakpa ning ama jiang alui ti, ‘Nanai pangpa a hong kanlejui, han napaning ama a nat khodengthei om lui a amuret jarra serat te khat athatpe ani.’

²⁸“Tak-ha aupa ning a nuarra lung thak jarra inn na lutjot lai mak, han a pa ning a hong suak a aluimathemjui.

²⁹Han a man apajiang han a sang, ‘Enro, kum sot kei ning nang ha ka na ngaidon, kei ning ka sap ngai le man huina ranga nang in weikhat jak om nala pek mache.

³⁰Tak-ha hiva naipangpa ning numei chuklui lim le a kan mu lal rakip a tor suale a honga nang in serat te anoltak khat nathatpe.’

³¹Han a pa ning ama jiang a sang, ‘Nai nang ko kei le ani tin kan om suam, kei ka nei rakip hi nangtarong ani.’

³²Tak-ha hiva naipangpa hi ko a thi tenna an phut a hong ringkhir ani, a mang tenna an phut kan mukhir ret ani, hiva jarra kan ning asat pui rang a suak.”