Read Aimol LUK 16 Bible Online

LUK 16 - Aimol bible

LUK 16

¹Hingahin Jisu ning a thiamruoingai jiang alui ripe, suak donpa kan chong khat alui om, hale a man a suakpa jiang sumle sial na manmang tia aluikok.

²Han ama ning a maha akuia ati, “Kein naruia ka jet, imo nathojui, nang in ni lui nei man na rakip ha na manjet taro, hale nang in veikhat ka chuan thoko jot lai noning”.

³Han suakpa ning arilruk a alui ngaidon, ‘kapumapan kei hi chuan a na manbang aninko kei ning ija mo ki tho rang? Luitho rang om ratmaking, hale rikhir rang om kajak’.

⁴Kei hi anmanin ka chuan mun tenna a na nongthak karra, anmani Innsung karra ka sap lutret na rang mi ka nei.

⁵Han a man rengpa peisa atual rakip akuia amasatpa jiang a man a ri. “Nang ni rengpa peisa ijatmo natual?”

⁶A man a sang, olib ‘Thai kilo reakhat a man ama jiang katual a ti, notbuk han som ranga tia jiakro.’

⁷Hava suale khat pajiang ading kelret, ‘nang in rengpa jiang imo natual?’ Han a man a sang, ‘Gehu kilo reakhat’, a man amajing a ti, ‘na notbuk han a rak a som ka riat tia jiakro’.

⁸A lung thiang lui suakpa ning achinga a tho jarra rengpa ning ama ha amanpak, ajarko “Avara a om mingai nek hiva simleia a om mirual ngai ning an tak nem na rang a tam anching an thei”.

⁹Jisu ning alui ti ramuol la sumle sial hin nansap sinru a nilui che na ranga. Hale anmani ning nan om na nan om na amongtibui inna na tuang nati.

¹⁰A sintet hin a lung thiang lui ama han a lianpa hin nom a lung thiang noning, alianpahin a lung thiang ama han a sintet hin nom a lung athiangrang a suak.

¹¹Hiva jarra nang ni jiang anilui ramuol la lallethum hin ngam na nanjotmak aninko, ija mo adik chuanhan nang ni hi an na ngam narang?

¹²Hale nang nin mikhat jiang nan omma an na ngam na mak aninko, tu ningmo nang ni jiang a om pha han an ngam na rang?

¹³Suakpa khat ning rengpa annijiang chuan thotormak, ankhatpa ha a enda le an khat pa ha a lungsiat rang ke. Ankhatpa jiang chong alui le, ankhatpa jiang chong juitor noning, nang nin Pathian le peisa annihin chuan vei khat tho tor noni che u.

¹⁴Peisa adeirat pharisingain hiva chong hi an jet karra Jisu ha an lui risiatjui.

¹⁵Jisu ning anmani jiang a ti, nang nin mi mit enna ko adik nankansa, tak-ha Pathian ning nan lung sunga a jet pet, miring mitenna a lian phur ngaiha, Pathian mit enna ko a sin tak ani.

¹⁶Mousi dan chong jen na rabuhan a om Pathian chong lui ri ngain an ri ngaiha Johon a phat tenna a lui om. Hava phat tenna an phut Pathian rengram ranga chongsat ha an lui ri jarra, mirakip ning hava han anmanche ani.

¹⁷Tak-ha chong jenna dan rabu a chong ha sundet bindu khat a mang nek inko vanram le ramuol a mang lamin abeidet.

¹⁸Hale a numei le akansenna midang khat a en na a nei a maha numei jiang omchan salui ka lal ani, han a pasal le akansenna pasal dang khat le a om numei ama ha omchan salui tho numei ha ani.

¹⁹Phat khat a kanchong pasal khat alui om, hale ama ning puansat diarsat athoa anitin ningsat ningsat alui om.

²⁰Hale ariangtak a ming Lazarus, a tak a pan mipa han kan chong pa inkot han bulam ranga alui om.

²¹A man kan chong pa a chak anekna khanoi tebol nuaia a chul ha kanek inko khop kati a ti, han Uiningom a tak panha an lui liakpe.

²²Hingahin bulampa Lazarus ha a thi jui. A thiang thavang ning chungvan na Abraham a rop chunga an man om jui. Hale kanchongpa ham athia an phumjui.

²³Han kanchongpa ha athikhuo mei khur han ponga a om jui, ama ning khuo athirra a en karra Lazarus ha Abraham a rop chunga a huia a om ha a mu jui.

²⁴Kanchongpa han Abraham ha akuia, a pa, keihi na lungsiat diro, hale Lazarus akutchal han tui manchop bak a ka lei hin hongmansit ranga na ri pero, ajarko kei meichuan chunga ponga kaomjui.

²⁵Han Abraham ning a sanga, ka nai nang ko ramuol la simlei chunga nalenglai ahuinaha rakip ha ka na pe jui, Lazarus ning pongna rakip alui mu, hiva jarra ama ning atun hin imanhui ani, nanglam nipong rang ani jui.

²⁶Hi jak hi niluia nang keini kong karra khuang athup a lian tak khat a om, hiva jarra tu khat ning om keini om na tenna an phut nang ni jiang che na jot mak, hale nang ni om na tenna an phut keini om na hin hongna jot mak.

²⁷Kanchongpa ning alui ti, a pa nang in Lazarus ha ka pangai Inna natir pero tia chubei le ka na lam.

²⁸Ajarko ka u ka naingai a tam an om, ama ning hongripe rase, ha aninko anmanin hikhanna pong na muno ni u.

²⁹Abraham in a sang, ‘na u nanaingai rang ko Mousi le Pathian chongringai an om, anmani chong ha ngai rase u.’

³⁰A nei kan chongpa ning alui ti, ‘nimak a pa Abraham, a thi ngai karra tu ang khat ning anmani jiang an che inko anmani ning an lung thul nanti’.

³¹Han Abraham ning ama jiang alui sang, ‘anmani ning Mousi le Pathian chong ri ngaiha an ngai mak inko a thi ngai karra mi khat ning a ring khirra a che aninnum anmanin ngaino ni u.