Read Aimol LUK 17 Bible Online

LUK 17 - Aimol bible

LUK 17

¹Hingahin Jisu ning a thiamruoingai jiang alui ti, mathemna a chul mingai ranga i duk ning dongnamo ini;

²a man nai pang asinngai khat amanmang rang nek inko, ama a ringa chakiri khat ankhaia tuipuilian tuija an deng juan lamin ama ranga asat det.

³Hiva jarra nang ni kan ning theiru nan nai pangain siatna an tho inko riperu asat, hale an lung an thul inko ngaidamru.

⁴Han a man ni khat nang jiang veisari tak siatna a tho inko, vei sari tak a honga ka lung kathuljui a ti inko ama ngaidamro.

⁵Thiamruoi ngain an honga Jisu jiang an ri, “Kantak ngai na hi na man khel pero.”

⁶Jisun anmani jiang a ti, “Nang nin nan takngai na ha anchamru tiat nan nei aninko hiva tangbunga thingkunghi a rajung le kanphoi in lang tuionglian na hong mongro nanti nom a hong mong rang” ani.

⁷Tu angkhat ning nansuakpa ning lui akhuaia animakle belram asella a hong kir pha han, bu nektaro, ong taro, a ti nan karra tumo nan om?

⁸Hava lam tiluia ‘nang in kei kachak ranga ngaidon taro, kei chak le nek kator maje nang in kasepa thoro, hava suale nang chak le inro tia nang nin tino nicheumo?

⁹A ma a chong ha suakpa ning a jui jarra a maha amanpakmo?

¹⁰Hingahin nang nin chuan lam rakip han nan tho suale, keini ko an enlui suak kan ni, keini ning tho rang a suak ha kanthojui, tia nang ni ning om tiru.

¹¹Jisu ning Jerusalem tiang achelai han Samarija le Galili khopui akanna alui che.

¹²Han Jisu ning khopui khat a lut han kusti takphar atong a nat mi somning a lak an om ma Jisu ha an lui mahokjui.

¹³Anmanin an khek an hong ti, ‘Puma keini hi na lungsiatro’ han Jisun anmani ha a man dam jui.

¹⁴Jisu ning anmani karra a ti, “Nang nin che taru belramsel ngai jiang hong kando taru,” hiangahin anmani ning an che chu chunga anluidamjui.

¹⁵Anmani karra mi khat ningko a dam ha a kanmu karra a nuk a hong kanlea rasa ringa Pathian ha amanpak.

¹⁶A man Jisu madonna a bok a chubei a buk jui, ama hi samaria mi alui ni.

¹⁷Han Jisu ning a sanga, “Misom kanatokmo nimak mi som kana man thiang nimak mo? Mi kua ngaiha honmo an om jui?”

¹⁸Ijarra mo hiva jatdang Jiw nilui mipa jak ning Pathian manpak i hong kir?

¹⁹Jisu ning atia, “Tak nangai jarra ka na mandam jui, thui in lang chetaro.”

²⁰Pathian rengram hi i tik mo i hong tung rang tia Jisu jiang an lui dingkel, han Jisu ning a sang, “Pathian rengram ko muponga hong noning.

²¹Enru; Pathian rengram ko hin a om, animakle han a om, ajarko Pathian rengram hi nang ni karra a om”.

²²Han Jisu ning a thiamruoingai jiang a ti, “Miring pasalnai ha nang ni ning nanmujot innom nan mu torlui phat ha hong rang ani jui.”

²³Mingain nang ni jiang anti rang ke, enru hin a om, animakle han a om, nang nin che maru, an nuk ham jui maru.

²⁴Ajarko vanna kol a kan let pha ramuol khat le khat a om ngain a var an mu anga miring pasalnai hong rang nikhuo ham hingahin ilanirang ani.

²⁵A ma ning a rapa tak pongna ilamu rang ani, hale hiva khangrual la mingain a maha lui jot noni u.

²⁶Noa phat lai alui suak anga miring pasalnai ham hinga hin ilasuak rang ani.

²⁷Noa ning rokuang sunga a lut maje anmanin chak le nek, lu huang ut an thoa an lui om, hale tuilian a hong karra anmani an renga anthipet an mang pet jui.

²⁸Hingahin Lot khanglai hin nom alui suak anmani ning chak le nek, anchok anjoar, an tir, innhui an sin na an lui om.

²⁹Hingahin Lot ning Sodom tenna an phut a suak han vanram tenna an phut mei lom a hong chulla anmaningai ha a kang mang jui.

³⁰Hanga han Mi Pasalnai ham ikando suak rang nikhuo han nom hiva anga lani nati.

³¹Hava nikhuo han inn chunga a om ama han hong chum bak inn sunga phur lui jot lai noning, hiva ang han lui puk a che mipa han nom inna hong kirlai noning.

³²Lot a numei ha ngaidon ru;

³³Tu ang khat a ringkhuo akansanjot ama han a ringkhuo mang nati, tu ang khat a ringkhuo a manmang ama han ring na mu nati.

³⁴Hava nikhuo han kein nati rong, ‘Mi anni ning kham chang ankhat anjalchun karra ankhat iluirang, ankhat lam imak rang ani.

³⁵Numei anni ning chang ansuk chun chakiri an tak chun karra ankhat lam tuang nati, ankhat ha maknati.

³⁶Luipuk a mi anni che nanti, ankhat lam tuangnati, ankhat lam maknati.

³⁷Han anmanin Puma jiang anti, ‘Puma, honmo ani?’ Hale Puma ning a sanga, “Mithingai Takluang om na mun han langkija ngai om an om.