Read Aimol LUK 19 Bible Online

LUK 19 - Aimol bible

LUK 19

¹Jisu ning Jerikho khopuia a lut a hong suak pha han,

²enru Zakharia anti pasal khasana chom alian tak, a nei kanchongpa khat alui om.

³A man Jisu ha alui mujot tak-ha mi karra a dung aniam jarra lui mutor mak.

⁴Han Jisu a hong na rang lam tiang han Lamphuang rella a kalla alui ngak.

⁵Jisu ning hava lampuia a hong karra chung tiang a enhan a mujui, han Jisun a ti, ‘Zakharia hong chumro, ajarko, ve enni kei ning nang Inna katunga ka om rang ani’.

⁶A man a rak tak a hong chumma Puma ha ningsat tak a alui don jui.

⁷Mitam ning hava ha an mu karra an ranga anti, ‘a man siatneipa Inna tung ranga a che jui’.

⁸Han Zakharia ning a thuia a ti, “Puma enro; kei ning ka nei rakip sunga aherphet hi a riang aroi ngai jiang kasempe, hale kei ning ani lui a ka lei luina rakip chunga saruk khat a saruk manli kamale khir.”

⁹Han Jisu ning ama jiang a ti, “Ve en ni hiva Inn sunga san ring na a hong jui, ajarko ama ham Abraham anaike ani.

¹⁰Mi Pasalnai han amangsangai tok ranga le sanring ranga ahong ani”.

¹¹Mingain Jisu chong ri ha an ngai laitak han an jet theina rang tetan na ankhat aripe, ajarko Jisu hi Jerusalem ma che rang ani, han anmanin Pathian reng ramhi a rak a hong rang ani tia an lui ngaidon jui.

¹²Jisun a ti, “Phatkhat a mikhat ning ram ankhat hin a bing a reng chang ranga chea, hale vei khat vakanle khirranga a suak jui.”

¹³A man a che tiang han a suak som ngaiha akuia anmani jiang sana peisa som alui pek a ti, “Kein kava kan le mak kar je hivahin lal luiuolru”.

¹⁴Atunko a mahi a ram mingain an endajui, chong choingai jiang chong an lui manchoia, hava mipa han keini kanrengpa ranga deimasing anti.

¹⁵Mipa han reng alui chang suale a hong kan le ret han a man a suakngai ha ama jiang hongru, anpeisa ngaiha ijatmo an man lianjui tia jetna ranga a hong kui jui.

¹⁶Han asat suakpa amaningning Puma madonna a ngirra a ti, “Puma peisa, sana ankhat hin peisa som ka man tung jui”.

¹⁷Han ama ning ama jiang a ti atam satjui, asat suak nang in chuan a sinte hin lungam na ngam na najot nuk jui a khopui som chunga a neipu changtaro.

¹⁸Han anni chang na suakpa han a hong sanga, Puma peisa anni han ranga ka man tung jui.

¹⁹Han a man ama jiang a ti, nang om khopui ranga chunga a neipu changtaro.

²⁰Han a dang khat ning a honga a ti, enro Puma, nang in ninapek peisa sana ha puan na kajella ka siak, ha hi ani.

²¹Ajarko kei ning nang ha kana chit, ajarko nang nalunghi angar, nang in nasiaklui ha naluikhir, hale na vor luiha naluak tia ka jet.

²²A ma ning a sang, “Nang a satlui suak; nari nuk juia kein chong najen kati, kei ko a lung ngar khat ka ni, kein kasiaklui phur ha ka lui, kavorlui phur ha kaluak ka khom tihi nang na jet luimo?”

²³Han ko kapeisa ha ita mo peisa siakna mun na nisiaklui, ni man lianlui? Naluisiak aninko kein ka hong kan le karra athuai ham kamurang ani.

²⁴Han ama ning hava han a ngirngai jiang a ti, “Peisahi ama jiang tenna an phut luikhirru, hale ruphai som aneipa jiang pekderu,”

²⁵han anmanin an sang, ‘Puma ama ko ruphai som a nei sake;’

²⁶A ma ning a sangret, “Mirakip ruphai aviar anneipet, aviar a nei ngai jiang ka pek de rang ani, hale a nei chil lui ama jiang om aneisalep ha kan lui khir rang ani”.

²⁷Han kei ning ka reng chang na chunga a na jotlui anmani ha hin hong tuangru, kama don na thatru.

²⁸Hingahin Jisun chong alui ri suale Jerusalem tiang hin a hong.

²⁹Jisu ning a honga Bathphage le Bethani a hong tung tiang han a man a thiamruoi anni olib tangbunga aluitierjui.

³⁰Nang ni ning madonna khuo son lutru, nang nin nan lut karra mikhat ning om anla chuanglui sakuarkap khat nan mu rang ke, hava ha hong tuangru,

³¹han anmani ning irangamo tia anna dingkel karra nang nin hingahin sangru ‘Puma ning chuan ka thona rang a om a ti’ tiperu.

³²Hale anmani ning an chea Jisu ning ati anga an mu jui.

³³Anmanin sakuarkap an lui sut karra a neipu ning alui ti ‘Irangamo nan sut?’

³⁴Anmanin an lui sang, ‘Puman hivahi chuan khat a om antipejui’.

³⁵Han sakuarkapha Jisu jiang an hong tuanga a chunga puan ankhua Jisu ning a chuang jui.

³⁶Hingahin Jisu ning aluihonglai han anmani ning an puan ngaiha lampuia an lui phajui.

³⁷Jisu ning a thianga olib tangbung a hong chumtiang han thiamruoingai le mitam ning an lui mua, han mitam ning chuang torlui sa ani jarra anmanin rasa suak an khek Pathian an lui manpak.

³⁸“Puma minga a hong a maha ravansat ani, Vanram ma lunghip nale Pathian ha lianpui na ni rase”.

³⁹Han mitamngai karra pharisi aviar ngain Puma jiang anti, ‘Puma na thiamruoingai ha om chian rase u’.

⁴⁰Jisu ning a sang, “Kein nang ni jiang ri kati, anmanin an om chian aninko, hiva lung ngai ning hong khek nanti u”.

⁴¹Jisu ning Jerusalem khopui hi a hong nai a mu karra, a chap chunga a ti,

⁴²nang in hiva nikhuo hin na tak tak in a hip a dai chuan na lui tho, tak-ha a tunko nang mit en tenna a kan thup jui,

⁴³ajarko nang chunga hiva nikhuo phat hin hong rang ani jui, ti ko nang a na enda ngain nasir napanga na a hil nan ta, a mun rakip a nang ha nakhan rang ani.

⁴⁴Hale nang le nasunga a om na nai le simleia na man kiakrang anni jui, na chunga lung khat ning lung khat chuanga anmanin man om lai noni u, ajarko Pathian ning nasan ring ranga mit en analut lai han nang jet lai mache.

⁴⁵Hava suale Jisu ning Jerusalem sunga a hong lut phurjuar ngai ha anot chai a phut a ti,

⁴⁶“Hingahin alui kan jiak sake, ka inn hi Pathian lam na in thiang ranga ani, tak-ha nang in arukngai om na lam na man chang jui”

⁴⁷Hingahin Jisun ani tin inn thiang sunga alui man chu, tak-ha thiampulian, dan oja ngaile mitam lamkeingai ning a maha an lui thatjot.

⁴⁸Tak-ha anmanin ija mo kan tho rang tihi lui jet ma u, ajarko Jisu a chong ri ngai ha asat a an ngaijui.