Read Aimol LUK 2 Bible Online

LUK 2 - Aimol bible

LUK 2

¹Agastin rengpa ning hinga hin mirakip mimal masing telru tia chong pek na alui nei.

²Mising an hong tel karra kuirinia ning Sairia reng vaihomlian alui chang.

³Miring rakip an omna mun rakip ming an lui pek lut.

⁴Josep hi om Galili ram Nazaret tenna an phut Judia ram Bethlehem khopuia alui che, ajarko ama hi David phunga a hong suak alui ni.

⁵Josep ning Meri le ming pek lut rang an lui che, ama hi Josep le mui ruoi ranga chong an kan tor jui. Tak-ha Meriko chungrik alui om.

⁶Anmanin Bethlehem an tung pha han Meri kanjir na rang phat a hong tung jui.

⁷Hingahin Merining pasalnai nai a rapa a nei jui, hale puan na an chun na Serat chak na kheng kuanga alui manjaljui, ajarko anmani ranga mun atong lui om mak.

⁸Hava phat lai tak han belramselngain an belram ansella luipukhan jan na an lui om.

⁹Puma thaneithiang ning anmani jiang a kando a, hale puma mahok lian na ha anmani karra alui om, han anmani ning an chitjui.

¹⁰Thaneithiang in anmani jiang an hong ti, “Chitmaru,” enru kei ning nang ni ranga chong hui ka hong choi, hivahi miring rakip ningsat na ranga ani.

¹¹“Ve en ni nang ni ranga San ringpa an khat David khopuia nai a chang jui, a ming ko Khrista puma ani.

¹²Nang ni jet thei narangko naite khat puan na chun nan ta serat chak na khengkuang sunga a om mu nanti.”

¹³Hava lai tak hin thaneithiang tammin Pathian ha an manpak an lui ti.

¹⁴“Asang tak a Pathian lian na nirase, hale ramuol chunga Puma lung manbengai rakip chunga lunghip na ni rase.”

¹⁵Thaneithiang ngain vanram ma an kir suale, belramsel ngai ning anti, “Bethlehem ma hong che rei, hong enrei, Thaneithiangain keini jiang inatihi tu mo ani.”

¹⁶Hava suale belramselngain a rak tak an che karra, Josep le Meri hi anluimujui, naite han serat chak na khengkuanga a om ha an mu jui.

¹⁷Belramsel ngain naiteha an lui mu karra thaneithiang ning anmani jiang aluiripeha anngaidonjui.

¹⁸Belramsel ngain mirakip jiang an ripejui, a jet a mu rakip ning an lui kanlaijui.

¹⁹Meri ning a lung sunga adik ngaidon na a nei jui,

²⁰aleihong suak le anmule, an jet le kan ruai a belramselngain Pathian ma hok na ha lha ansiarra an lui kan le jui.

²¹Nikariat suale naiteha vuntan an che jui, hale a ming ha Jisu anti, hivahi thaneithiang ngain nai a hong chang madonna anluitisa ani.

²²Mousi ning alui ri nuk jui a Josep le Meri annaihi man thiang na rang pha a hong tung han anmani ning an nai ha an tuanga Jerusalem ma Pathian madonna andojui.

²³Pathian chong thianga alui kan jiak nuk jui a a rapatak a pasalnai rakip hi pathian jiang anpeklutrang ani.

²⁴Anmani ning ram khunu anni animakle pharvali anni le ama an tuanga Pathian jiang kat ranga an che jui.

²⁵Hava phat han Simon anti mi khat Jerusalem ma alui om, ama hi Pathian chitlejak neikhat ani; Israel ngaihi puma ning san ring thei na ranga aluingakchak Thavang Thiang ning a chunga alui om pui.

²⁶A ma jiang Thavang a thiang ning alui ripe.

²⁷Hale Simonhi athiangning aruaia biakinn inthianga an hong lut. Hongthiang alui kan jiak nuk jui a, Jisu hi Pathian innthianga an hong tuang karra.

²⁸Semion ning Jisu ha a pomma Pathian a man pakjui.

²⁹“Puma nang in naluiri nuk jui a na suak kei hi lunghip na na ma sua jui.

³⁰Ajarko phungrakip madonna nang ning na lui hong var ani.

³¹Kamitkhet a sanringpa na na manmujui;

³²pumako jatdangngai jarra varha ani, a mi Israelngai ranga lianpui nale mahok na ham ani.”

³³Josep le Meri ning puma Jisu jiang antipe chong an jet karra an lui ngak jui;

³⁴Semion ning anmani ha phual a pek Meri jiang a ti; “Hivahi Pathian ning a thang sa, Israelngai san ring ranga ani, hale Israelngai karra chulnarang, an khat om a khel la sang na rang, hale jot lui na rang tenna tetan na na ranga ani.

³⁵Hale ama chemngai chemkolhan nan lung sunga sun nata, hale mitam ngaidon rakip hi an la hong kando rang ke.”

³⁶Asher phunga a suak Phanuel a numeinai Anna anti Pathian chong leirikhat alui om, a mako in a nei tenna an phut a pasal hale kum sari jak anluipal;

³⁷hale kumsom kariat le manli a tung khan na meithai alui chang; ama ning Biakinn sung jak a om ma bu nekluia, sun le jan na Pathian alui lam.

³⁸Hava phat lai tak han Anna ning a hong lut Pathian alui manpak Jerusalem a ringkhir theina rang a ngak mirakip jiang puma a ruia alui ri.

³⁹Josep le Meri ning Pathian jiang tho rang suak chuan rakip an tor le anmani khopui, Galili sunga a om Nazaret hin anhongkirjui.

⁴⁰Hingahin naipangha a hong lian na, chingna varna a tam alui nei, Pathian tenna an phut tangbunga thei nale lungsiat na ha ama chunga alui om jui.

⁴¹Akum racham Josep le Meri Jerusalem ma puma jan bukhengban ranga an lui che.

⁴²Han Jisu a kum somleini a hong tung pha han ama hi om antuangde.

⁴³Hingahin Janbu khengban an tor pha han, inna an hong kir, tak-ha Jisu ning a nu le a pa manjet lui a ama ning Jerusalemhin alui om jui.

⁴⁴Anmani karra a kan chel tia hingahin an hong kir jui, han an karra an en pha a maha lui mu lai ma u.

⁴⁵Hiva jarra Jerusalemhin an hong kirra anluitokjui, tak-ha mu lai ma u.

⁴⁶Nithum suale Jisu hi Jerusalem inn thiang sunga ojangai thiampu karra chong an lui kan biak chong ading kel lai tak han anluimujui.

⁴⁷Han Jisu achongri thei nale achongsang theinangai ha a jet ngai ning pum ngak a an lui ngak jui.

⁴⁸Hale Josep le Meri ning Jisu ha an mu karra an ning a donga a nu ning a ti, “Ka nai ija mo hinghin kan ning na man dong? Napale kei ning kan ning adong reija nang kan na hongtok ani.”

⁴⁹Jisu ning anmani ha a hong sang, “Ijarra mo nan ning a donga nan na tok? Kei ko ka pa inn na ka om rangke tihi nang in jet ma che u mo?”

⁵⁰Jisu ning a sang chong ha a nu le a pan luijettorlai ma u.

⁵¹Hinga hin Jisu ning a nu a pa le an honga vei khat Nazaret an hong kirretjui. Tak-ha Meri ning a lung sunga ama ning a ri chong ngaiha a ngaidon theng pet jui.

⁵²Hingahin Jisu ning chingna le, theina taksa lian na a hong nei a Pathian le mingai ning ama jiang jotna an hong nei jui.