Read Aimol LUK 20 Bible Online

LUK 20 - Aimol bible

LUK 20

¹Nikhat Jisu ning biakinn thianga mingai alui manchu lai tak han, Thiampulian le dan oja khat om ulianrupngain ruk a Jisu a kol la an honga,

²Jisu jiang an dingkel, ‘nang in iranak mo naneia, natorna a om ma hiva chuan ngaihi natho?’ keini jiang nariro? Hale nang in natorna ranak ha tu ning mo i na pek ani tia an lui dingkel?

³Han Jisun a sang, “Kein nang ni jiang chong dingkel khat naneirong, nasangru”;

⁴Johon ning baptais a man tho ngaiha vanram tiangamo ani, animakle mingai tenna mo ani?

⁵Hingahin anmani masia an lui kanbiakjui, ‘kein in vanram tenna an phut kanti le, a man inatiranghi, ijarra mo ama ha tak nanngailui?’

⁶Hale kein in miringngai tenna kanti le, mirakip ning keini hi lunga an na deng rang ke, ajarko anmanin Johon hi Pathian tashanthei khat ke ani tia tak an ngai ani.

⁷Han anmanin jetmasing tia anluisang.

⁸Jisu ning anmani jiang a ti, “Kein nom imo kitorna ka ranak a om tihi nang ni jiang na ripe lai noning”.

⁹Hingahin Jisu ning mingai jiang tetan na ankhat aripe, “Pasal ankhat ning darkha theikung rahuan khat a nei, hava ha a man arahuanna mingai jiang a man sala, ram dang khat a chea phat sot tak alui om jui.

¹⁰Han theikung ngaiha ara khompha a hong tung pha han a suak an khat ha theikung ngak ngai jiang alui tir, han theikung a ngak mingai ning suakpaha anvejek kut ronga an hong mankirjui.

¹¹Han vei khat a dang suak an khat a tirret; han nom anveret kut ronga an man kir ret.

¹²Hale a suak an thum chang na khat a tirret, ama ham thinai a suak khan an ve, han lam ma anpeijui.

¹³Han theikung neipu han ati jui, ‘kei a tun ko imo ki tho tarang? Ka pasalnai khat hi tirkati, ama ko aviar chitlejak nei nanti”, ati jui.

¹⁴“Hannom theikung ngak ngai ning an mu karra anmani masia an kan siamma, hivahi lalluak rangpa ani, hivahi thatrei, ama itum rang rakip keinitum chang nati.

¹⁵Han anmanin a maha an that jui rahuan varaltiang an deng juan jui, hava han theikung a nei pu han anmani jiang imo a tho tarang?”

¹⁶A ma ning hong nata theikung a ngak ngaiha thatbak nata, theikung ngaiha a dang khat jiang pek rang ani.

¹⁷Jisun anmanin jiang a en na a ti, “Ha aninko, inn sin ngai ning an nei manlui lungtak ha an luia kachalki han an phun anem tak-ha ani.

¹⁸Hava lung chunga a chul mirakipko a herhak kuinanti, hale hiva lungin tu angkhat chunga a chul inko vaiphin oul nati.”

¹⁹Hana dan oja le, thiampuilian ngain Jisu ha churrang tia an hongtok han anmanin mingai ha an lui chit, ajarko Jisu ning a ri rakip ha anmani jiang tetan na inatho tiha an lui jet.

²⁰Hiva jarra anmanin Jisu a masial na anruang chak a, chong ruk mi an lui tirra, Jisu anuk jui anga ankan lemma, hingahin ija mo a ri tihi jetna rang a lian ngai jiang manchur na rang tia chuan anvarjui.

²¹Anmanin an dingkel, “Puma nang in adik ninaripe, mi chang mi kha om naimache, tak-ha keini hi Pathian mu na lam ha na ri pero.”

²²Kaisar jiang keini ning khasana kan pek rang hi dan nuk juijako adik mo adik lui mo?

²³Han Jisu ning an lung satlui ha a jet a hongti.

²⁴Nanpeisa ha dodiru; tu ramil le amingmo a om? Anmani ning anti, ‘Kaisar a ming a om’.

²⁵Han Jisun a ti, “Kaisar jiang a pek rang suak ha Kaisar jiang pekru, hale Pathian jiang pek rang suak ha Pathian jiang pekru”.

²⁶Anmanin mitam madonna Jisu a chong sang han luichur tor lai ma u, ajarko a man chong ha adik a sang jarra, an om chianjui.

²⁷Han an thi suale a ringkhir om mak tia ngaidon Sadusi aviar ning Jisu jiang an lui honga an dingkel,

²⁸‘Puma Mousi ning keini ranga ilui jiak, tu angkhat ning numei a nei han nai nei luia a thi inko, a naipang khat ning hava numei ha neikhir nata, nai imakrang ani a ti.’

²⁹Han ko Unai sari an lui om, ulianpa tak ning numei ha anei a nainei luia athi jui.

³⁰Hale anni changna, anthum changna ngainnom an nei ret jui,

³¹Hanga han an pasal sari ning numei ha an nei pet nai neiluia anthipetjui.

³²Hava suale numeinu ham athi jui.

³³Hiva jarra athi ngai an hong ringkhir karra hava nuha tu numeimo ichang rang? An renga an luinei pet ani.

³⁴Han Jisun anmani jiang alui sang, “hiva kumrual sunga an naingai ha lu huang a om,

³⁵tak-ha hiva kumrual hinle athia aring khir tor rang rahui suakngai jiang ko luhuangrang pek mak”.

³⁶Ajarko anmani ha athiti om lai noning, anmani ha thaneithiangngai le kan angrang anni, anmani ko athi tenna an hong ringkhir jarra, Pathian nai an ni jui.

³⁷Tak-ha athi ngai an hong thui khir tia Mousi ning alui ti, a chul karra Abraham, Isak, hale Jakob Pathian tia an lui kui.

³⁸han Pathian a mako a thingai ranga Pathian nimak, tak-ha aringai Pathian ani. Ama tenna i rakip hi a ringa a om.

³⁹Han dan oja ngain an hongsangjui, ‘oja nang ning a thianga nanarijui,

⁴⁰han anmani ning a khel la chong dingkel na neitorlai ma u.’

⁴¹Jisu ning anmani jiang a ti, “Ija mo anmanin Mesaia ha David anaike anti?”

⁴²Ajarko David ning La Psalm han alui ti: Pathian ning ka puma jiang alui ti,

⁴³“Nang ni ning nang ni a na en dangai ha an chunga nansir mak karlim kei ka chang tiang hin ongru.”

⁴⁴Hiva jarra David ning a maha Puma a luiti ani, hale ama ning ijamo David insung tenna hong ani?

⁴⁵Mitamngain chong an ngai laitak han Jisun a thiamruoingai jiang alui ti,

⁴⁶“Nang ni kan ning theiru; Mitam kanchun na mun na puan diar asat tho ngai, Inn thianga a lutir chang jot, Ut karra om a lutir ngai ongna mun na an ong jot, mingai duk an man kanlutjot,

⁴⁷meithai ngai in le lui ansut, hale sat kanrolla asat lamngai anga anmani tenna phut nang ni kan ning theiru, anmani jiang kho khong naha itung rang ani”.