Read Aimol LUK 22 Bible Online

LUK 22 - Aimol bible

LUK 22

¹Atunko kanna ut thona phat a hong nai jui.

²Han thiampulianngai le dan ojangain Jisu ha ija mo kan that rang tia an lui tok, tak-ha anmanin mingai ha an lui chit.

³Thiamruoi somleini karra Iskariot antipa Juda om anti ama chunga seitan alui lut jui.

⁴Han ama ning a chea thiampulianngai le a dang ojangai jiang Jisu hi peklut na ranga chong an kan biakpuijui.

⁵Han anmanin an ning asat peisa pek ranga an kanbiakjui.

⁶Hale Juda ning a jot Jisu hi mitam an om mak lai tak han anmani jiang peklut na ranga tancha alui en.

⁷Hava suale anmanin kanna ut thona phat a hong tung jui, hivani hin anminin belram that na rang phat ani.

⁸Jisun Pitar le Johon jiang a ti, cheru nang nin kanna ut ranga chak le nek hong kan ning taru.

⁹Anmanin an dingkel, keini hova mun na mo luikan ningru nati?

¹⁰Jisun anmani jiang a sang, “Enru nang ni ning khopui nan lut karra, tuibella tui hongtang numei khat nan kan mu rang ke, ama alutna inntak ha nang ni om lutru,

¹¹hale inn neipu jiang dingkelru, ‘Puma ning nang jiang a ti, ka thiamruoingai le kanna ut tho suamna amun ha honmo ani a ti?

¹²Han inn sunga chung nungtak ka ankhat nang ni jiang na man mu nati, hava han nang nin keini kanna ut amunrang kan ningru”.

¹³Anmanin an lui che karra Jisu ning alui ri nuk juia an mu jui, hale kanna ut kholai khangna rang ankanningjui.

¹⁴Hinga hin a pha ahong tunga Jisun thiamruoingai le an ong jui.

¹⁵Jisun anmani jiang a ti, “Kei ning pong khodengthei ka mu mahin nang ni le hianga kanna uth tho suamna phat hi kaneijot.

¹⁶Ajarko kein nang ni jiang ka na ri ani, Pathian rengram hi atung mak karlim kei neklai noning”.

¹⁷Hale Jisu ning koklai alui a, “Pathian a manpak suale ati, hivahi nang nin kansemru;

¹⁸ajarko kein nang ni jiang ka na ri ani, Pathian rengram a hong mak karje kein a tun tenna phut darkha tui hi inlai noning”.

¹⁹Hale Jisun tal ha alui a Pathian ha amanpak, aher aher a ekkhui a anmani jiang a pek a ati, “Hivahi nang ni ranga ana pek ka taksa ani, nang nin kei nan na ngaidon na ranga chakru.”

²⁰Anmanin an chak suale, hava anga koklai ha aluia a ti” hiva koklai hi nang ni ranga ka thisen tenna an sin ani, “chongsan thar ani”.

²¹Enru, kei anajuar rangpa ha kei le bukheng kanban suam.

²²Mi pasalnai ha ko thirang ani, Pathian lui ngaidon nuk juia, tak-ha kei ana juarpa hako khodengthei rasibui ani;

²³Hava han anmani karra tu mo annirang tia an kan dingkeljui.

²⁴Hingahin thiamruoingai karra tunmo a lian a lutir ani rang tia an lui kansualjui.

²⁵Han Jisu ning anmani jiang a ti, “Jatdangai reng ning anmani chunga a neipu changa a om, hale anmani chunga chuan tho ngai han anmani ha an kut chunga an na siak tia an lui,

²⁶tak-ha nang niko hangahan nimak, tak-ha nang ni karra a liantak ning a sintak anga om rase, hale asin tak amaning aliantak ha ni rase”.

²⁷Jisu ning a dingkel la, “Aonga bu nek pa hale a ngir chunga sep a tho ha tulammo anlian det? A onga ompalam han a lian det nimak mo? Tak-ha kei ko nang ni sepa tho anga ka om ani.”

²⁸Tak-ha nang niko kei jiang an na en sin na rakip ha nan mu suam jui.

²⁹Hale ka pa ning kei jiang Pathian rengram en ranga ana pek anga, Kein nom nang ni ha ka na pek jui.

³⁰Nang nin kei le bukheng an khat kan bansuam rang ani, hale nang nin Puma ong na mun han ong nan ta, Israel phung somleiningai vaihom rang nan ni.

³¹Simon, Simon enro seitan ning a satlui ngai tenna asat ha senkhui ranga cham ha a mu jui.

³²Simon kei ning na lung nathon mak na rang a ka na lam pe, han nang in na nuk nakir karra na u na nai ngaiha an lung mandetpero.

³³“Puma kei ko nang le ren inn sung khan nom thisuam ranga ka kan ning jui”, tia Pitar ning a sang.

³⁴Jisu ning a ti, “Pitar nang in keihi jet making tia veithuntak nati mak kar je ve enni jan hin ar khongpan khuang noning”,

³⁵Han Jisu ning anmani jiang atia ret, “Kein nagnihi peisakok, chempai, hale kekok buia kanatir lai a vat imo a om?” Han anmanin antia, i om a vat om mak”.

³⁶Han Jisu ning anmani jiang a ti, “Atunko sekhui a lek ama ning om choita rase, hale chempai ham hangan choirase, hanna i om aneilui ama han nom a puan adiar juar senlang chemsei choktarase.”

³⁷Ajarko kein nang ni jiang ka na ri ani, kei ka ruia “Hiva chongthiang hi hong tung rang ani”, ajarko hiva rakip a lui kan jiak sa ani.

³⁸Thiamruoi ngai ning an sang, “Enro Puma, hin chemsei anni a om jui”, han Jisun a ti, “Ahunjui”.

³⁹Han Jisu ning Olib Tangbunga ache jui, han thiamruoingai ning an lui jui.

⁴⁰Hava mun na an tung pha han Jisun anmani jiang a ti, “Nang nin mathemna nanchul mak na ranga Pathian jiang lam ratru”.

⁴¹Han lunga adenga itungtorna khan han Jisu ning chubei aluibuk.

⁴²“O Puma nang in na najotpe aninko hiva koklai hi kei jiang phut na lui pero, tak-ha kei ngaidon lungdo changma rase, nang ngaidon lungdo ha nirase”.

⁴³Han vanram tenna thaneithiang an khat in Jisu ha ranak alui pek a man kan mu jui.

⁴⁴Hale Jisun a pong reia a khel la Pathian jiang a lamjui, han athannom thisen anga alom alom simlei hin avachuljui.

⁴⁵Jisu ning Pathian jiang a lam suale a hong pha han a thiamruoi gain ning dong tak a an lui jalha a mu karra,

⁴⁶anmani jiang a ti,” nang nin ijarra mo nanjal, mathemna nanchul mak na ranga thui in lang Pathian jiang lamru”.

⁴⁷Han Jisun chong arilai tak han, mitam an lui honga thiamruoi somleini karra Juda Iskariot ning, Jisu kolla ahonga abiang a hong tum jui.

⁴⁸Jisu ning ama jiang a ti, “Juda Iskariot nang in mi pasalnai ha abiang tumma nipeklut mo ani?”

⁴⁹Jisu le kan ruai a thiamruoingai ning, i hong suak, thiamruoingain Jisu jiang anti, “Puma kein in chemsei hin mo kantuk rang?”

⁵⁰Hale anmani karra mi ankhat ning thiampulian khat a suakpa a kuar khat ha aluisamthakjui.

⁵¹Jisu ning a ti, “Nang in jot pe taru”, han akuarha Jisu ning amakhop pea adam khir jui.

⁵²Han Jisun thiampulianngai, Innthiang a ngak ngaile ulianrupngai hale ama chur ahongai jiang a ti, “Aruk arep a chur rang anga chem le mol nan hong choia nan hongjuimo?

⁵³Kei ning nang ni le biakinn sunga kan lui omlai han nang ni keihi na chur rang tho ma che u, tak-ha hivahi nang ni ajinga a omngai rat na phatha ani”.

⁵⁴Hava suale anmanin Jisu ha an churra thianpulian ngai Inna an tuang jui, tak-ha Pitar ko a lak a kan samria hin Jisu nukha alui jui.

⁵⁵Hale anmanin tualla mei an thoa an renga an om phat han Pitar om anmani karra akanchella alui om.

⁵⁶Han Pitar ning mei ona mun na a om lai tak han, tu ang khat suak numei dongma ankhat ning ama ha a mu karra a hong ti, “Hiva pasal hi om Jisu nuk jui khat ani”.

⁵⁷Han Pitar ning a sang, “Numei nang in nati ama ha kei jet making”.

⁵⁸Hapkhat suale mi khat ning ama ka jet a hong tiret, “Nangom anmani karra khat na ni”. Han Pitar in a sang ret, “Kei ama hi jet chil making”.

⁵⁹Hale Dar khat suale midang khat in a hong dingkelret, ‘a thianga hiva mi hi om ama le alui kan ruai, ajarko a mahi Galili tenna ahong ani’.

⁶⁰Hannom Pitar in alui sangret, “E miring nang in nanti ha kei jet making”, ama ning chong a ri lai tak han ar ahong khuangjui.

⁶¹Jisun Pitar jiang a hong kanheia a hong enjui, han Pitar ning a ngaidon, ve enni ko nang in keihi veithum tak na na jot mak kar je ar ning khuang noning ti ha aluijetjui.

⁶²Han a man tualla a suak lungtok tak a achapjui.

⁶³Hale Jisu a chur mingai ning nuiso mariam le kan ruaia, an lui ve jui.

⁶⁴Anmanin Jisu a mit anhip pe bak an lui dingkel, ‘tu ning mo nang an na ve, riro’.

⁶⁵Hale anmanin Jisu ha chongsia an kokjui.

⁶⁶Khua a hong var pha han, thianpulian le dan Oja ngai an kan chun na, Jisu ha chong jenna madonna an hong juangjui.

⁶⁷‘Nang Khrista naninko keini jiang riro’, han Jisun alui sang, “Kei ning nang ni jiang kari aninnum, nang nin takngaino ni che u”.

⁶⁸Kein nang ni jiang ka na dingkel aninnum nang nin nasang noni che u,

⁶⁹“Tak-ha a tun tenna ko mi pasalnai ha chung nung Pathian chang tiang han om rang ani jui”.

⁷⁰Han anmanin antiret, ‘aninko nang hi Pathian nai mo nani?’ Han Jisu ning a sang, “Nang ni ning keihi nannatijui”.

⁷¹Hava han anmanin an luiti, ‘hiva khella keinin imo kanlajet de rang? A ma mur tenna an phut keini ning kan jet jui’.