Read Aimol LUK 23 Bible Online

LUK 23 - Aimol bible

LUK 23

¹Han anmani an renga an thuia Jisu ha Pilat madonna an hong tuang jui.

²Anmanin Jisu ha nontak an pek an luiti, ‘hiva mi ning keini jat rakip hi aniluina lam ma anakaijui, Kaisar jiang pek rang suak ham a na kharra, hale a mahi Khrista reng kani a kan ti’.

³Han Pilat ning ama jiang a luiti, “Nang jiwngai rengpamo nani?” Han Jisun a sang, “Nang in nitiha adik”.

⁴Pilat ning thiampulianngai le mitamngai jiang a ti, ‘kein hiva mipa chunga a siatna khat om mu making’.

⁵Han anmani ning ator an kan talla anti, “Hiva mi hi Galili, Judia hale hiva ram tenna mingai jiang kan sual kanse tianga a manchu ani.”

⁶Han Pilat ning a jet karra ading kel, ‘hiva mihi Galili mi mo ani?’

⁷Hava suale Jisu hi Herod rengpa a ram sunga mi ani jarra, Herod omna hi om Jerusalem ani jarra, Jisu hi ama jiang atir khir ret jui.

⁸Herod ning Jisu a mu karra a ning a luisat, ajarko ama ning phat sot tak a Jisu ha kan mu pui ranga alui ngak ani, hale Jisu ning atho angakpa ngai ham alui mujot ani.

⁹Herod ning Jisu jiang chong tam adingkel, tak-ha Jisun chong khat om luisangmak.

¹⁰Thiampulianngai le dan ojangai ning Jisu chunga anilui chong tam an ri a Jisu ha nontak an lui pek.

¹¹Herod ning a ralmingai le a kanrualla eselna le nuiso tak a Jisu ha reng puan an man tianga vei khat Pilat rengpa jiang antirretjui.

¹²Hava nikhuo tenna phut Herod le Pilat ha an kan jotretjui; ajarko anmani anni hi arapako an lui kan enda ani.

¹³Pilat ning thiampulianngai achong che rakip a kui khomma,

¹⁴anmani jiang a ti, “Mirakip lung aletiang a keiruoi tia nang nin kei jiang nan hong tuanghi, kei ning ka en na, ama jiang nang nin nontak nan pek rakip, ama siatna ite khat jak om mu making.

¹⁵Han Herod ning om siatna mu mak, hale a man keini jiang ihong tirret ani, han, enru, a man thina ranga chuanko i om tho mak,

¹⁶hiva jarra kei ning ama hi vebak kata masua kati.

¹⁷Kanna ut kholai khang hin ama ning anmani ranga mi khat hi amasuarang a suak

¹⁸Tak-ha anmani ning an kan rualla an hong khekjui, “Hiva mihi thatru, hale keini ranga Barabas ha namasuapero”.

¹⁹Barabas ko khopuia mi that hale hele bai man suak ren inn na om ani.

²⁰Hale Pilatning Jisu ha ama suajot jarra rasa ringa alui hongtiretjui,

²¹han anmanin an khek, “ama hi khros hin thatru, khros hin thatru” an luiti.

²²Veithum tung na anmani jiang ati ret, “A satlui imo hiva mipa ning athojui? A ma chunga that na ranga alalna ite khat mu making, hava jarra kein ama hi ve kata masua kati”.

²³Han anmanin Jisu ha khros chunga that na ranga rasa ringa an lui khek,

²⁴Pilat ning an khek nuk juia that ranga an lam ha a jot pe jui.

²⁵Pilat ning ren inn na a om mithatpa Barabas mi man kannokpa lam ama suajui, Jisu lam ha anmani lungdo tung na ranga an kut chunga apeklut jui.

²⁶Anmanin Jisu ha an tuang han khoralla a hong Simom anti ha anchur dea, Jisu a nuk tiang khros ha an manputjui.

²⁷Hale mitamin ama ha an jui, han numei aviar ning chajang ansiarra Jisu ranga an lui chapjui.

²⁸Jisun a kan heia a ti, “0h Jerusalem numeingai kei ranga chap maru, tak-ha nan tak rang le nan naingai ranga chapru”.

²⁹“Ajarko enru nang ni karra naineilui numei, a nai ranu ilavai chilui ngaiha iduk ravan satmo anni, nanti na rang nikhuo ha hong rang ani jui.

³⁰Hava phat han tangbung ning kan chunga nadetaro, hale tang bungte ngai jiang keini hi nakhu taro tia anmanin tirang anni jui.

³¹Ajarko thing kung a ring lai hin hingahin an tho aninko, thing kung a char karako imo ani tarang?”

³²A satlui tho miring anninom that ranga Jisu le an lui hong tuang chun.

³³Hinga hin anmani ning Lukorok anti mun han misatui anni, khat lam Jisu chang tiang, khat lam ha Jisu veitiang han an that chun jui.

³⁴Jisu ning alui ti, “Opa anmani hi ngaidamro, anmanin imo kan tho tiha kan jet ma u,” hale anmanin Jisu puan ha an ektherra rasi an kan en na jui.

³⁵Hale mingai ning an ngirra an en, hale Jiw lamkei ngainnom anner an man komma chong erro an ri a, ama ning midangko asanringtor, a mahi Khrista anti ha aninko, a tak a bing a kan san rase.

³⁶Hale ral mingai ning om Jisu kolla an honga, thei thurri, athur tui an pek an hong mariam.

³⁷“Nang jiwngai rengpa naninko na tak na binga kan san ringro an hong ti”.

³⁸Jisu a lu chunga han “A ma hi jiwngai reng ani”, tia an lui jiak.

³⁹Hale khros chunga an khai a satlui tho pa khat ning Jisu ha a mariamma a ti, “Nang Khrista ha nimak che mo? Natak na binga kan san ringro, hale keini om na san ringro”.

⁴⁰Hale an khat pa ning aluikok, “Nang Pathian chitmak che mo? Nangom ama le a kan ang rip thina namumo nimak?”

⁴¹keini ko kan mu rang i suak thina ha kan lui tho nuk jui a kan mu ani, tak-ha hiva mipa hi ko ite khat a satlui atho na om mak.

⁴²Han a man a ti, “O Jisu, na rengram natung karra, Puma nang in kei om nangaidonro”.

⁴³Han Jisu ning ama jiang a ti, “Kei ning nang jiang a thianga ki na ri ani, ve enni nang kei le Paradais hin om suam rang kan ni jui.”

⁴⁴Hingahin dar karuk a hong chul jui, Simni ahongjingjui, dar kua ahong tung mak kar je ramuol pumpui hi pum jinga alui jingjui.

⁴⁵Hale Pathian Innthianga puan duong ha alai tak a kan khuisenjui.

⁴⁶Hava suale Jisun hesang tak a akhek a ti, “O apa, ka thavang hi na kut kana pek lut jui”, han Jisu ha athi jui.

⁴⁷Han ralmi riakhat neipu pa ning hiva rakip a mu karra ‘hiva mihi Pathian jet, adik chuan tho mi ani,’ aluitia Pathian amanpak.

⁴⁸Hiva rakip a mu mitam ngaining an jet karra an rop anbenna an kir jui.

⁴⁹Hale Jisu le an lui kan jet mingai, le Galili tenna an phut Jisu a nuk hong jui numeingai ning hiva rakip an en na a lak det anlui om.

⁵⁰Hale enru ulianrup karra Josep anti chuan dik a tho pasal khat alui om.

⁵¹A ma ning ko mingain an lungdoa antho chuan ha luijotmak. Amai hi Judia khopui Arimathia tenna ahong Pathian rengram hong ranga angak chak mi khat ani.

⁵²A ma ning Pilat jiang a chea Jisu takruak ha a lamjui.

⁵³Han a man Limonpuannalla achunna, mi khat jak in num an la kanphumlui lungkhur than han puma ha a siak jui.

⁵⁴Hiva nikhuo ha sernikhuo ranga kan ningna phat ani jui.

⁵⁵Hale Jisu le an hong kan ruai Galili tenna numei rup ngai ning Puma aruok ha ijamo anphum tiha an hong en.

⁵⁶Hava suale anmanin an hong kirra a rim hui sariak teiranga ankanningjui. Ha sernikhuo hin ko dan nuk juia pong an lui kansakjui.