Read Aimol LUK 24 Bible Online

LUK 24 - Aimol bible

LUK 24

¹Han chei uol khat sunga a phut na nikhuo jingtiang masa hin arimhuiphur an hong choia anmanin than en an lui hong.

²Thankot lungham alui kanlong ha an mu jui.

³Hale an en karra Jisu a taksa ha mu lai ma u.

⁴Anmanin an ning a donga an lui ompha lai tak han hingahin a hong nijui, enru puan analpet atiang pasal anni anmani karra an lui ngir.

⁵Numeingai ning a tam anlui chit, an lu ha simleia an lui burver, han pasal anni ngaining anti, “Athi ngai karra a ring ha ijarra mo nang nin nantok?

⁶Ama ko hin omlaimak, a thuikhir jui, ngaidonru ama ning imo alui ti, a man Galili han a om lai.

⁷Mi pasalnai ha siatnei kut anlapeklut rang ke, khros han an that rang ke, hale ni thum suale hong thuikhir ret na ta ringkhirnati chong ngaiha an lui ngaidon”.

⁸Han anmanin Jisu chong lui ri rakipngai ha an ngaidonjui.

⁹Anmanin thaanram tenna an hong kir pha han, hiva ruia thiamruoi somleikhat ngai jiang le adang mingai jiang an lui manjet jui.

¹⁰Anmani ngaiha ko, Meri Magdalen, Joanna, ha Jems anu Meri, hale anmani le a kan ruai numeingain nom a dang thiamruoingai jiang hiva chong hi anlui ripe.

¹¹Thiamruoi ngainingning hiva chong hi adik chong nimak tia tak luingaipe ma u.

¹²Han Pitar ning a thuia thanramma a chea alui hong en karra ama ning puan jak ha amu jui, hale a suak chuan ngaiha a man a jet karra a ngak reia in tiang ahong kanlejui.

¹³Hava nikhuo tak han anmani karra mi anni ning Jerusalem tenna mail sari a lak Emmaus anti khopui han an lui che.

¹⁴Han anmanin a suak chuan ruia khat le khat an lui kan biak tirra anlui che jui.

¹⁵Hale anmanin an kan dingkel lai tak han hingahin a suak jui, Jisu a tak tak a hong kandoa anmani le anlui kan ruai suam ma anche jui.

¹⁶Jisu ning anmani jiang a mel ha lui man kan jet mak.

¹⁷Hale Jisu ning anmani hi adep a anmani jiang a ti, “Nang ni ning khat le khat nan kan biak ha imo ani?” Han anmanin chit le kan ruaia an ngirrepjui.

¹⁸Han an karra Kleopa anti ha ning ading keljui, “Jerusalem ma imo a suak tia jet luia a hong khualmi hi nangjak mo nani?”

¹⁹Jisu ning anmani jiang a sang, “I mo asuak jui”? Han anmanin an lui ti, “Pathian le mirakip madonna chuan tho Nazaret Jisu a ruia ani.

²⁰Thiampulian ngain, hale keini vaihom ngai ning ijarra mo ama ha khros chunga an that na chong ha ani,

²¹tak-ha keinin ko Israel naingai San ringpa ha ani tia tak kan ngai, hijak ni luia hiva a hong suak chuan hi ni thum a hong ni jui.

²²Hale kanshap numei aviar’ning om keini hi an na man ngak jui, anmanin thaanram an lui en;

²³tak-ha aruak ha ko lui mu mau, han thaneithiangngai ha mang anga an lui mu, hale anmanin jiang an tipe, ‘Puma hako a ringkhir jui.

²⁴Hale keini le a kan ruai mi ngaining, om thanna an che karra numeingai ning anti anga aluini jui, Jisu ha ko lui mu lai ma u”

²⁵Han Jisu ning anmani jiang a ti, “lduk apangmo nan ni, hale Pathian tashanthei ngain an lui ri ha iduk amo tak telluia nanluingai?

²⁶Khrista ning khodeng itheia Pathian lianpui na imuranghi ngai mak mo?

²⁷Mousi tenna an phut Pathian tashanthei ngain chong thiang rabu sunga an lui jiak”, Jisu arui ngai ha ama ning anmani jiang aman jet jui.

²⁸Anmanin khopui ha anhongnai karra Jisu vei khat a lak che ranga alui tho.

²⁹Han anmani ning Jisu jiang anti, keini hi na om puiro, ajarko, ni ahong takjui, hale Jisun anmani le om ranga alui che jui.

³⁰Hale Jisun anmani le an kan ruaia chak na ranga an lui ong jui, hale Jisun tal ha a luia Pathian jiang alam suale a ek senna anmani jiang a pek jui.

³¹Han Jisun anmani jiang a mel a man kan jet jui, hale anmani tenna an phut a mang dejui.

³²Anmani khat le khat an kan biakjui, “Puman lampuia keini jiang Pathian chong thiang inari peha, kan lunga meikang anga timakmo”?

³³Hale anmanin hava phat tak han an thuia Jerusalem an hong kan le khir jui, han a dang thiamruoi somleikhat ngaiha an kan chun na midang ngaile anlui om jui.

³⁴Han anti, ‘Jisu hi a thianga athuikhir jui’, Simon jiang om a man mu tihi an jet jui.

³⁵Hale lampuia ija mo alui suak, Jisu ning tal ha a eksenna, ija mo anmanin Jisu a mel an hong jet tiha anmanin an ri manthangjui.

³⁶Anmanin hiva chongngai hi an lui ri karra, Jisu ning an karra a hong ngirra a ti, “Nan karra a hip ha om rase”.

³⁷Anmanin a tam anlui chit, khonammo kan mu tia an lui ngaidon.

³⁸Tak-ha Jisu ning anmani jiang a ti, “Nang ni ijarra mo nan ning adong? Nanlunga imo keichi keiok nan nei?

³⁹Na enru, ka kut le ka ke ngaihi, enru kei khet ha ka ni, nasitru nan jet rang ke, ajarko khonam ko aru le a tak om mak, tak-ha kei ko ka nei.”

⁴⁰Jisu ning hingahin ati pe a kut le a ke ngaiha alui dopejui.

⁴¹Anmanin ningsat le kan ruaia an om laitak han Jisun ading kel, “Nang nin chak ranga imo nan nei?”

⁴²Anmanin nga aminsa khat anleipek.

⁴³Hava ha an madonna achakjui.

⁴⁴Han Jisu ning anmani jiang a ti, “Hiva ngaihi a thianga kei ning nang ni le kan om suam lai kina ripe ha ko, kei ka ruia Mousi dan sunga han an lui jiak jui, Pathian tashantheingai ning an lui jiak hale labu han nom an lui jiak ngaiha ka man tung rang a suak.

⁴⁵Jisu ning anmani ha Pathian chong an jet thei na rang an lung kot a long pe jui.

⁴⁶Hava suale ama ning a ti ret, “Khrista ning khodengtheia thinata ni thum chang na han a thui khir ret rang ke.

⁴⁷A ma minga lung thulna chong le ngaidam na chong ha Jerusalem ma anphut jat rakip jiang anlaripe rang ani.

⁴⁸Nang ni hiva rakip ranga shakhi nan ni.

⁴⁹Han enru ka pa ning a chong ngir na ha kein nang ni jiang kavatir; tak-ha chung tianga ranak ha nan chunga a hong mak karje nang nin hiva khopui hin ngaktitru.

⁵⁰Jisu ning anmani ha Bethani khopui tenna a kan ruai puia, a kut a dom ma anmani jiang phual alui pek.

⁵¹Hingahin phual a pek anmani tenna vanram tiang akaldejui.

⁵²Anmani ning ningsat tak a Pathian chubei an buk, Jerusalem ma an hong kanlejui.

⁵³Han phat rakip a biakinn hin Pathian an manpak jui.