Read Aimol LUK 3 Bible Online

LUK 3 - Aimol bible

LUK 3

¹Tiberiu ning reng chung nung a chang na kumsomlei ranga a tung pha lai tak, Pontias Pilat ning Judia ram ma reng a chang, Herod ning Galilija reng a chang, a naipangpa Philip ning Iturea le Trachontis hin reng a chang, Lysania ning Abilene hin reng alui chang,

²han Anna le kaijapha ngain thiampuilian an lui chang pha han Pathian tenna an phut chong alui hong Zakharia a pasalnai Johon jiang,

³Johon ning Jordan tui pui sirra a om rakip jiang Pathian chong alui ri a, nan lung thul taru, tuija baptais thoru, Pathian ning na siatna ngaiha a na ngaidam rang ke.

⁴Pathian tashanthei Isaia ning alui jiak; “Ramtong lian na mi khat ning aluikhek Puma rang lam ha luisin taru, Puma lon na lam ha man tunru.

⁵Akual ngaiha amantun rang ke, lampo le lamkur ngaiha man kan ang nati.

⁶Miring rakip ning Pathian san ring na ha an mu rang ke.”

⁷Baptais tho ranga a hong mitamngai jiang Johon ning a ti, “Rul vonchoingai nang ni hi” Pathian ning khodengthei na apekrang hin tantor kan ti tihi tu inatipemo?

⁸“Hiva jarra nan lungthul taru chuan sat thotaro, han kan pu Abraham a om tilaimaru, kein tikati hiva lung ngaihi Pathian ning Abraham a naingai amanchangtor.

⁹Atuntak hin nom thing kung rajunga reiha akanjep a om, hava jarra a ra om lui thing kung ngaiha antuk tanna meija anhallang ani.”

¹⁰Han mitam ning ama jiang an lui dingkel, “keini imo kan tho rang?”

¹¹Johon ning alui sang, “Tu angmanin kuntai athua anni a nei mi han a nei lui jiang khat pek rase han chak rang a nei mi han nom ha ang han tho rase.”

¹²Hale khasana achommi aviar Johon jiang an honga chong an dingkel. “Oja, keini hi ija mo kan tho rang?”

¹³Johon ning anmani jiang a sang, “Nang ni ning a khel la luimaru.”

¹⁴Hava suale ralmi aviar an honga an lui dingkel, keini ija mo kan tho rang? A ma ning a sang; “Nang ni tu khat jiang om namrakpa tho a luimaru, hale ani lui a non tak pek maru, hale nan mu rang suak han khop na neiru.”

¹⁵Mitam ngai ning an lui ngaidonjui, Johon hi Mesaia Pathian naihamo ani tia an lui ri.

¹⁶han Johon ning a ti pe, Kei ning nang ni hi tuija baptais ka na man tho; tak-ha kanuk a hong rangpa hi ko kei nek a lian a rang khat ani, kei ning ama kekok arui orang tenna ka rahui chang mak. A ma ning Thavang Thiang le meija baptais namantho nati.

¹⁷Puma ning a chang vena tarang mun ha sinnata, hale gehu thunnata puma jangjap han japnata asi avai rakip ko a tor ti bui meilaia deng juan rang ani.

¹⁸Hingahin Pathian chong thiang le sanring na chong hi Johon ning alui ripe.

¹⁹Tak-ha Herod rengpa ning a naipangpa numei Herodia alui nei jarra Johon ning aluikok.

²⁰Hiva ruihin Herod rengin Johon hi ren inn na a thunjui.

²¹Hingahin a hong ni jui, mirakip tuija baptais an tho pha han Jisu om tuija baptais a lut jui. Pathian jiang an lam pha han vanram hi alui hong kan long.

²²Thavang Thiang ning khunu anga a honga, Jisu chunga a om, han vanram tenna an phut chong khat a honga, “A ma hi kei ning ka lungsiat ka pasalnai ha ani, ama jiang ka lung a be ka lungdo a tung.”

²³Jisu ning puma chuan a tho phat han a kum somthum a tung jui. Mi ning an ngaidon anga Jisu hi Josep a nai ani, Josep hi Heli a nai ani,

²⁴Heli Mathathia a nai ani, Mathathia lam Levi nai ani, Levi Melchi a nai ani. Melchi Jan a nai ani. Jan Josep a nai ani,

²⁵Josep hi Mathathia a nai ani, Mathathia hi Amos a nai, Amos lam Naum a nai, Naum lam Esli a nai, Esli hi Naggai a nai ani.

²⁶Naggai lam Maath a nai ani, Maath hi, Mattthia a nai, Mattthia lam Semchin a nai, Semchin hi Josek a nai, Joshech lam Joda a nai,

²⁷Joda hi Joanan a nai, Joanan lam Rehesa a nai, Hehesa lam Zerubbabel a nai, Zerubbabel hi Sualtial a nai, Shualtial hi Neri a nai ani.

²⁸Nerihi Mechi a nai, Melchi lam addi a nai, Addi lam Kosam a nai, Kosam lam Elmadam a nai, Elmadam lam Er a nai,

²⁹Er lam Joshua a nai, Joshua lam Elizier a nai, Elizier lam Levi a nai.

³⁰Levi hi Semion a nai, Semion lam Juda a nai, Juda lam Josep a nai, Josep hi Jonam a nai, Jonam hi Eliakim a nai,

³¹Eliakim lam Melia a nai, Melia hi Menna a nai, Menna lam Mattatha a nai, Mattatha hi Nathan a nai, Nathan lam David a nai,

³²David lam Jesse a nai, Jesse hi Obed a nai, Obed lam Boaz a nai, Boaz lam Salmon a nai, Salmon hi Nason a nai,

³³Nason lam Amminabad a nai, Amminabad lam Admin a nai, Admin hi arni a nai, Arni lam Hezron a nai, Hezron lam Perez a nai, Perez hi Juda a nai,

³⁴Juda lam Jakob a nai, Jakob hi Issak a nai; Issak hi Abraham a nai, Abraham lam Tera a nai, Tera hi Naor a nai ani.

³⁵Naor lam Serug a nai, Serug hi Reu a nai, Reu lam Peleg a nai, Peleg hi Eber a nai ani.

³⁶Shela hi Kainan a nai ani. Kainan hi Arphaxad a nai, Arphazad Shem a nai, Shem Noa a nai ani, Noa Lamech a nai ani,

³⁷Lamech Methusela a nai, Methusela lam Enok a nai ani, Enok Jared a nai, Jared hi Mahalale-el a nai, Mahalale-el lam Kainan a nai ani,

³⁸Kainan lam Enos a nai ani. Enos lam set a nai set lam Adam nai ani, Adam lam Pathian nai ani.