Read Aimol LUK 4 Bible Online

LUK 4 - Aimol bible

LUK 4

¹Jisu ning Jordan tenna an phut a hongkir phat han a chunga thaneithiang in a sip, han khonam ning ramtong na ama them ranga a hong tuang jui.

²Nikhua Som manli tak ama ning ram ma a om ma khonam ning ama jiang alui mathem, hava phat han ama ning i te khat chakmak, han a von a tam a chamjui.

³Khonam ning ati jui, “Nang in Pathian nai naninko Hiva lung hi bu man changro.”

⁴Jisu ning a sang, hingahin a kan jiak sake, “Bu jak in mingai ring na nimak.”

⁵Han khonam ning atuangret ramuol chunga a om rengram a hui rakip ha a man enjui,

⁶han ama jiang a ti pe Jisu jiang; “Hiva rakip a neipu chang ranga, hale lian na rakip hi nang jiang ka na pek rang ke, ajarko hiva rakip hi keikut chunga a om jui,

⁷han nang in kei hi chubei nabukro a renga ka na pek rang ke.”

⁸Hava han Jisu ning ama jiang alui sang, “Nang in na Puma jak ha chubei na buk rang a suak tia, hingahin a kan jiak sake.”

⁹Hava sua khonam ning Jisu ha Jerusalem Innthiang asangna tak mun na a tuanga, “Nang in Pathian nai naninko hiva innchung tenna an phut kanchomthakro;

¹⁰hingahin chong thianga a kan jiak sake, nang a na lui oak rang Pathian ning thaneithiang jiang chong a pek rang ke.

¹¹Hale hingahin a kan jiak ret, na ke ngai lung in a tok mak na rang, anmani an kut a na lui pom nanti.”

¹²Jisu ning ama jiang hingahin alui sang, “Nang in na Puma napathianha ensin maro tia a kan jiak sa ani.”

¹³Han khonam ning Jisu ha alui mak jui, vei khat a pha amumak kar je.

¹⁴Hiva suale Jisu ning Galili alui hong kir pha han Thavang ranak in a chunga a hong sipjui. Hiva chong hi a mun rakip a an manthangjui.

¹⁵Jisu Sainagok innthianga a manchuhan mitam ning an lui manpak.

¹⁶Jisu ning ama khopui Nazaret hin a honga che na dan nuk jui a pong kan sak nikhuo hin Sainagok hin alui honga chong thiang tel ranga a hong ngirjui.

¹⁷Chong thiang lui ri Isaia a chong thiang ha Jisu ning a long a hingahin alui kan jiak a mu jui.

¹⁸“Puma Thavang ka chunga a om, ajarko a riang khodengtheingai jiang chongrina ranga, Kei hi a na thang jui, anluichur ngaiha ma sua na rang, a mit luidel ngaiha mu khir na ranga, a pong khodengthei ngai ma sua na rang ani.

¹⁹Hale Puma ajotpha kumha risuak na ranga kei a na hong tir ani jui.

²⁰“Han Jisu ning chong thiang ha innthianga chuan tho khat jiang a pek suale a ong jui, han Sainagok inn thiang sunga a om mitam ning ama jiang an enjui.

²¹Jisu ning mingai jiang atipejui, Pathian chong thiang sunga an lui ti ha nanngai jarra a hong tung jui.”

²²Han mitamin pumahi asat an lui bejui, hale puma amur sunga a hong suak chong han an renga pum ngak an lui ngak jui, han an kan biak; hivahi Josep a pasalnai ha mo nimak? an lui ti.

²³Han Jisu ning anmani jiang alui ripe “Nangning hiva chong rakhenhi ma sial chil lui a kei jiang nan na dingkel rang ke, thiampu na tak ha man kan damro, Kapernahumma na tho chuan ngai ha kan jet, hiva nakhopui hin nom thodiro.”

²⁴Jisu ning a sang, kein nang ni jiang a thiang ka na ri ani, Pathian chong ri mirakip hi an tak an tak khopui mingai ningko jotngai ma u.

²⁵“Tak-ha kei ning nang ni jiang adik a kan ri ke ani, Elia phat lai kumthum le thakaruk chung van alui kan kharra, ramuol rakiphin bu aluitang phat han Israel hin meithaitam an lui om.

²⁶Hale Elia ha tu khat ning om anmani karra luivatir ma u, tak-ha Sidomma a om Srepta mei thai nu jiang jak anluitirjui.

²⁷Pathian chong lui ri Elisha phat han Israel la kusti atong a nat mitam an lui om, anmani karra tu khat jak om leidam ma u, tak-ha Sairia a om Namaan jak ha aluidam.”

²⁸Han Sainagok sunga a om mingai ning chongaiha an jet karra an lung a tam luihuipe lai mak.

²⁹han anmanin an thuia puma ha khopui tenna an phut annotsuak, tangbung asangna tak a hong deng juan ranga an tuang jui.

³⁰Tak-ha Puma Jisu ning mitamngai karra a hong suak a a che jui.

³¹Han Jisu ning Galili khopui Kapernahumma a hong lut, ama ning pong kan sak nikhuo han mingai alui man chu.

³²Puma ning mingai ha a man chu karra, mingain a tam an ngak jui, ajarko Jisu ning chong lut a tam alui man chu.

³³Hale inn thiang sunga bhut ning amanvet mi khat alui om, han ama ning a khek a om ma.

³⁴“O Nazaret Jisu nang le keini imo kan suak? keini na manmang ranga mo na hong? Kein nang ha A thiang Pathian ha na ni.”

³⁵Han Jisu ning ama ha akhap a a ti, “Omchianro,” han bhut ning mipaha anamlonna, i te khat man pong lui a a mak jui.

³⁶Mingain a tam an lui ngak, khatlekhat an kanbiakjui. Hivahi ichongmo iri? Pathian ranak le rat na chong arile bhut ning asuakhiko?

³⁷Jisu ning aluithona chuan ha an om na ramrakip a akantirjui.

³⁸Jisu ning Sainagok a mak a Simon inn na a lut jui, Simon atarpiha a tam a nat a alui om anmani ning Jisu jiang an ri jui.

³⁹Jisu ning anatnu jamunna a chea damtaro a ti pe, han anatnuha aluidamjui. Hale khangthui a thuia Jisu ha alui manpak jui.

⁴⁰Hale ni alutsuahan anatrakip ngaiha Jisu jiang an hong tuang, ama ning a kut athem karra an lui damverjui.

⁴¹Hingahin bhut ngai ning om “Jisu ko Pathianke antia mitam kar tenna an phut a khek an lui suak jui.” Han Jisu ning om anmani ha leikhapmak, chong om leiman rimak, ajarko Puma ha Khrista Mesaia tihi an lui jet.

⁴²Jisu ning ni a hong suak pha han khopui a mak a hip adaina mun na a che jui, hale mingai ning Jisu ha an tok ti tirra an mu karra, anmani le om suam na ranga an lui ri jui.

⁴³Tak-ha Puma ning anmani jiang a ti, “Kei ko Pathian rengram rang chongsat ha khopuirakip hin karirangke, ajarko hiva ranga kei hi Pathian ning a na hong tir ani.”

⁴⁴Hingahin Jisu ning Sainagok innthiangmun rakip hin chong thiang ha alui ri jui.