Read Aimol LUK 5 Bible Online

LUK 5 - Aimol bible

LUK 5

¹Nikhat Jisu ning Genesaret pat kolla a om laitak mipuining ama jiang Pathian chong thiang ngai ranga an hong kankhomjui.

²Puman rokuang anni pat kolla a luimu, ngatokngain an rokuang an mak a len chenranga an lui che.

³Jisu rokuang anni sunga Simon a rokuang lam a jong a Simon jiang a ti, rokuang hi tang tiang aviar hong mansuakro, han rokuang hi tang tenna an phut aviar namlutro han Jisu ning ro kuang sunga a lut mitamngai ha a man chujui.

⁴Hale puman chong ri a tor le Simon jiang a tiret, “Rokuang hi tuithup natiang hongnamru, hale nanlenha vortaru a ti pe.”

⁵Simon ning a sang, “Puma kein in sun le jan na len kaluivor ngako khat jak om churmasing, tak-ha Puma na chong ri nuk jui a vorkati.”

⁶Anmani ning len an vor karra nga a tamtak an khum jui, an len chetrang a tho jui.

⁷Anmanin ansap rokuanga ngatok ngaiha an kut an jap man kan san rang an kui jui. Han rokuang anni anga han ansip reia rokuang ha tui sunga tum ranga a tho jui.

⁸Han ngangai an chur karra Simon Pitar ning Jisu jiang a bok jet a chubei a buk a a ti, “Puma kei jiang an phut chetaro, kei ko siat nei ka ni.”

⁹Ajarko anmanin pumngak an ngak jui, an-nga churna chung chang a.

¹⁰Hangahan Simon a sap ngai Jebedi a nai Jems le Johon nom an lui ngak, han Jisu ning Simonjiang alui ti, “Chitmaro a tun tenna ko nang ni michur na manchang rang ka ni jui.”

¹¹Han anmani rokuang ngaiha tangtiang ansiak an phur rakip an mak a Puma nuk an lui jui.

¹²Hinghin Jisu ning khopui khat a om lai kusti nat pasal khat ning Jisu a mu karra, a khup a bok a Jisu jiang a ti, “O, puma, kei hi na lungsiatro, namandamro.”

¹³Han Jisu ning a kut athemma a ti, “Kein ka jot jui damtaro,” hava lai tak kusti tongpaha a dam jui.

¹⁴Jisu ning ama jiang a ti, “Tu khat jiang om risuak maro, hale che in lang Thiampuilian jiang han man muro, mirakip ning na dam jui ti jet rase u, Mousi ning alui ri nuk jui a nadam jarra nang nin phur kat taro.”

¹⁵Tak-ha Jisu ning amandam ruia mitam ning a khel a khel la a nat rakipngai ha damthei na ranga an lui hong jui.

¹⁶Han Puman ramchikna mun na a che Pathian chubei aluibukjui.

¹⁷Nikhat Jisu ning mingai alui man chu pha han Galili, Jerusalem, Judia khopui sunga a om pharisi, thiampungai an lui om. Hava phat lai tak han Pathian rat na ranak ha Jisu chunga a om.

¹⁸Mi aviar ning a pang her khat a thi khancham pumma an hong domma Jisu jiang an hong tuanga Jisu madonna siakrang an tho jui.

¹⁹Tak-ha mi antam reia hong tuangna a jot lui jarra, mi inn chunga an kalla, innchungha anvit a anatpaha Jisu madonna mitam karra an hong ma sul jui.

²⁰Han anmani ning tak anngaiha Jisu ning ajetda alui ti, “O pasal na siatna ngaiha ka na ngaidam jui.”

²¹Han Pharisi ojangai ning an lunga jat jat an ngaidonjui, “Pathian amariam mi hi tu mo ani? Pathian jak inko mingai siatna angaidamtor an lui ti.”

²²Jisu ning an lung sunga jat jat an ngaidon ha ajet a a ti, “Ijarra nang in na lung sunga hangan nan ngaidon?

²³‘Nansiatna ka na ngaidam jui’ tile, ‘Thui nang chetaro,’ tihi homo a bai det?”

²⁴Miring pasalnai han mingai siatna ngaidan torna ranak a nei tihi nang nin nan la jet rang ke, han a man a pang her khat a thi mijianghan a ti pe; “Nang in thui nang na jalna choi nang chetaro.”

²⁵Han a man alui jal tenna an phut a thui a ajalna a choi a, Pathian anmanpakjui.

²⁶Hingahin anmani pum ngak an ngak jui, han Pathian an lui manpak, kein in ve en ni a ngak pa chuan hi kan mu jui antia, hale a tam tak an chitjui.

²⁷Hava suale Jisu ning aluihonghan khasana chom Levi antipahi a mu Jisu ning a ti, nang “Kanuk na juiro.”

²⁸Han Levi ning phur rakip a mak a Jisu nuk a juia a che jui.

²⁹Levi ning Puma a inn na bu nek kui na a var jui, hava karra khasana chom ngaile a dang mitam an om.

³⁰Han pharisingai le adang chong jen ojangain Jisu a thiamruoingai jiang han anti, “Ijarra nang in hiva khasana chom siat nei le nan chak nan nek chun” an lui ti?

³¹Han Jisu ning anmani jiang a sang “Anat ngai ranga thiampu a ngai, tak-ha adamngai rang ko ngai mak.”

³²Kei ning Pathian jet sa ngai ranga ka hong chang mak, tak-ha siatnei ngai lung manthul na rang ka hong ani.

³³Hinga hin anmanin “Puma jiang an lui ti, Puma, Johon thiamruoingain bu an ngeia lam na an nei, pharisingain hangan an tho, tak-ha na nuk jui keini ko chak le nek a jot.”

³⁴Jisu ning a sang, ““Muipa a om karlim ijamo muiruoi ahong ngai ha bunek luija ancherang?

³⁵Tak-ha hingahin Muipaha anmani tenna an la tuang rang phat a om, havatik han ko anmanin bu anlangei rang ke.”

³⁶Puman anmani jet thei na rang tetanna khat alui ripe, “Tu khat ning om puan thar ha ekset bak a puanlui han suide ma u, an suide aninko puan thar ham achetde rangani, hale a thar ham alui le kan ang noning.

³⁷Han tu khat innom darkha tui a thar ha savun puankok alui a thun ma u, hale an thun a chang innom savun puankok ha achet rang ani, buak na ta savun kokha imang rang ani.

³⁸Darkha a thar ha savunkok a tharra an thun rang ani.

³⁹Hale tu ang khat ning darkha tui alui ha an in suale, a thar ha tok ma u ajarko, anmanin darkha tui alui ju ha a tui det anti.”