Read Aimol LUK 6 Bible Online

LUK 6 - Aimol bible

LUK 6

¹Hingahin pong kansak na nikhua an khat Jisu ning lui puk ahonglai puma thiamruoingai ning gehubor an khomma an kut annuaia an lui chak,

²Pharisi aviar ning anti, “Ijarra pong kan sak nikhuo hin tho jot lui chuan nan tho?”

³Jisu ning anmani jiang a sang, “David le alui kanruaipui ngai ning an von a cham karra imo an tho?

⁴David ning ija mo inn thiang sunga an lut a, thiampulian ngai jak in chak a jot tal ha ijarra mo an chak, hale a nuk jui ngai om ija mo an chak, ti ha tunnom chongthianghan nang nin telma che u mo?”

⁵Puman anmani jiang a ti, Minai Pasalha pong kan sak nikhuo a neipu ani.

⁶Han pong kan sak nikhuo dang an khat a puma ning in thiang sunga mi a manchu, pha han a kut chang tiang a thi mi khat alui om.

⁷Han pharisi le danthei oja a dangngain pong kan sak nikhuo han a nat mitam amandam tia ama sial na an lui en chak.

⁸Han puma ning an lungai ha a jet, han akutkhat athipa jiang han a ti; “Thuiro; alaihin ngirro;” hale ama ning a thuia angirjui.

⁹Hale Jisu ning anmani jiang a ti, “Kein nang ni jiang na dingkel rong Pong kan sak na nikhuo hin chuan satmo kan tho rang, asaluimo kan tho rang, sanring na mo, animakle kan man mangrang mo?”

¹⁰Han puman anmani a en na a ti, na kut domtaro, hale ama ning a kut a dom karra a satjui.

¹¹Han anmani an lung hui lai mak, Jisu jiang imo kan tho rang tia khat le khat an lui kansiamjui.

¹²Hingahin Jisu ning tangbunga a chea Pathian jiang biakna alui nei a jansot Pathian chubei a buk jui.

¹³Khuo a hong var pha hin a thiamruoingai ha ama jiang akuia thiamruoi somleini athanga ama ning Pathian chong sem tirlon nan ni tia ming alui pek.

¹⁴Pitar anti Simon a nai, pangpa Andrew, Jems Jakob, hale Johon, Philip, hale Batholomew,

¹⁵Mathiu hale Thomas, Alphaus a nai Jems, hale Simon a lung lutpa Selot.

¹⁶Hale Jems a nai Juda, hale Juda Iskariot (Jisu ajorpa) anni.

¹⁷Hingahin Puma ning thiamruoingai le phaijol han alui hong chumpha han thiamruoingai le a dang mitamtak Judia, Jerusalem, Tair le Sidon khopuia a omngai,

¹⁸ama chong thiang ringai damthei na ranga kan en an lui hong.

¹⁹Hava han a om mitam ning Puma tak sa sitna ranga an hong tho han, puma rat na ranak han anatmi rakip anluidamjui.

²⁰Jisu ning a thiamruoingai ha a en na a ti, “Ariang khodengtheingai ha ravansat nan ni! Pathian rengram ha nang ni ranga ani.

²¹Atun a tunna achapngai nang ni nan lamanhui rang ke!

²²Miringnai pasal ruia mi ning an na ma tir, asat an na beluingai nang ni ravansat nan ni!

²³Hava phat hin nang ni nan ning man satru. Vanram ma nang ni lo man a lian na a om. Hingahin nan pa napungai Pathian nom Pathian chong lui ri ngai jiang alui suaksa ani.

²⁴Tak-ha “Atuntak naingai ko i duk a a tat mo ini? Ajarko nang nin asat a hui ha nan mu jui!

²⁵A tun na a khop ngai i duk a tat mo? Anvon cham rang ani jui, ajarko chajangsiarra chaprang anni.

²⁶Mirakip ning nang ni nanrui asat annari lai tak han i duk pong na mo ini? Ajarko hingahin anmani an pa an pu ngain Pathian chong lui ri ngai jiang aluithope.

²⁷“Tak-ha kein nang ni jiang kari ani, nang ni a na en dangai ha lungsiatru nang ni a na matirngai jiang chuan sat thoru.

²⁸Nangni khuo a na khong ngai jiang phual pekru, nang ni mang na a tho ngai jiang Pathian lam peru.

²⁹Nan ngemtang aben mi ha an khat tiang om manben deru, hale napuangsi anasut mi ha na kuntai anasut nom jotpero.

³⁰Nang jiang analam rakip pekro, hale naphur napai alui ngai ha vei khat singkhir maro;

³¹hale nang ni jiang mi nanmanthojot anga, nangninom mijianghan thoru.

³²Nang ni jiang a na lungsiat ngai jak na lungsiat aninko, nang ni jiang imo asat a la om? Ajarko siatnei ngai nom anmani a lungsiat ngaiha ko anlungsiat ani.

³³Nang ni jiang chuansat a thongai jiang jak chuan sat nan tho aninko, nang ni ranga manpak na imo a la om? Ajarko siat nei ngainom an tho tor ani.

³⁴Han nang nin nan mu khir na rang jak puk nangpek aninko, nang ni rang manpak na imo a la om? Siatnei ngainom siatnei ngai jiang anmukhir ranga an man puktor ani.

³⁵Hiva jarra nang ni a na en dangai ha lungsiatru, chuan sat tho peru, mu khir ranga manpuk maru. Nang ni lo man a lian, nang ni a sang tak pathian nai nan chang rang ani, ajarko mi pong na jet luingai jiang om, mi saluingai jiang om Pathian ningko a san,

³⁶nan pa Pathian ning a na lungsiat anga nang ni om kan lungsiatru.

³⁷“Mi chunga chong tanmaro, hale nang ni jiang om na man chunoniu, mi chunga a salui non tak pek maro, nang ni jiang om a salui napeknoniu, mi ngaidamru, nang ni om an na ngaidam rang ke.

³⁸Pekru, nang ni jiang om na pek nanti; asat a pek, anar chunga a pek, hale a khel la a pek ning a khel la mu nanti, ajarko nang in nan pek na dan na Pathian ning a na man mu rang ani.”

³⁹“Jisu ning tetan na an khat anmani jiang a ripe, a mitdel khat in a mitdel khat aruoitor mo? Anmani anni nia khurra chulno ni u mo?”

⁴⁰Thiamruoi ngain a Thiampu nek a lianmak, tak-ha asat anripesa ama ha ama thiampu oja anga alani rang ke.

⁴¹Hale nang na mit a chok a om ha muluia, ijarra mo na u nanaingai mitsunga a chok ha na mu?

⁴²Namit sunga a om a chok ha kelluia ija mo na u nanaingai mitsunga a om a chok ha na kel pek ati natitor? A sat kan rol jot ngai nang ni a rapatak kankel bakru, hava suale nang nin na u nanaingai mitda a om a chok ha na mu rang ani.

⁴³Ajarko theikung asatning a satlui ramak, hale Theikung satlui ning om arasat ratormak.

⁴⁴Ajarko Theikung rakip hi araning itheimo tihi a na manjet, ajarko mingai ning thei chang hi lingkunga khom ma u hale darkha rahi lingbuk karra khom ma u.

⁴⁵A sat mi ning avonsung tenna a om asat chuan a hong kei sua, han a satlui ngai ning an lung sunga a om a satlui jak a hong suak ani. Ajarko an lung sunga a om asatluihan an murra an hong suak ani.

⁴⁶“Nang nin ka chong ri ngaihi jui lui a kei hi ‘Puma,’ nannatihi ijarra mo?

⁴⁷Tu ang khat ning kei jiang a honga hale ka chong a ngai a chuan atho mi ha i ang mo ani tihi kein namanjetrong?

⁴⁸A ma hi inn mun a satna lung chunga inn sin anga ani. Tui a hong lian karra inn ha a hong nam, aninom inn ha luikannik noning, ajarko inn ha asat a an sin jarra ani.

⁴⁹Han tu ang khat ning ka chongngai hi ajetda a jui lui ngaiha ko Pasal khat ning inn mun thualluia inn sinpa anga ani, han rua a hong tho karra tui a hong lian na inn ha anam khiakjui, hava inn akiak ha a kiak pet jui!”