Read Aimol LUK 7 Bible Online

LUK 7 - Aimol bible

LUK 7

¹Hingahin mingai jiang chong ri rakip a tor suale, ama ning Kapernam hin a che jui,

²Roman rengpa a lungsiat a suakpa khat alui om, ama ha a tam a nat thirang a tho jui.

³Han rengpaning Jisu a ruia a jet karra ama ning jiwngai ulian aviar a tirra Jisu ha a hong mankui, a suakpa mandam na ranga.

⁴Anmani ning an honga Jisu ha an ma themma an lui ti, “Hiva mi hi na san ringpediro.”

⁵Ajarko a man keini rupngaihi analung siat, hale a man a thei jak keini in thiang Sainagokhi anasinpe ani.

⁶Han Jisu anmani le a che, hale Jisu ning rengpa inn a tung rang tiangtak han rengpa ning asapngai a hong tirra Puma jiang anti, “O puma na ning man dong maro, ajarko, puman ka inn na na hong rang hi ka rahui chang mak.”

⁷Hale ka tak tak puma jiang hongranghi rahui changluimi ka luini nom puma ning ka suak pahi damna chong pek na nei pero.

⁸Ajarko kei om ka chunga a lianngai thuai a ka om, kathuai ja a om ral mingai an om, hale kei ning anmani ha cheru ka ti le an che, a dang khat hongru katinom an hong. “Kei ka suakngai jiang hi thoru ka ti le an tho ani.”

⁹Hingahin Jisun chong a jet karra a tam alui ngak jui, a hong kanruoipui mingai jiang alui ti, kein nang ni jiang na ti rong, Israelngai karra hin nom hiva ang khanna tak a ngai mi hi la mu making.

¹⁰Hale thiamruoingain rengpa inn na an che phat han asuakpaha aluidamjui.

¹¹Hava suale Jisu ning Najin khopui hin a thiamruoingai le mitam le kan ruai a an che.

¹²Puman khopui lut na kot a tung tiang han, enru a thisa mi ankhat an lui hong choi, meithainu a pasalnai khatjak ha ani, khopui sunga a om mitam ning an hong kan ruipuia.

¹³Jisu ning a mu karra lungsiat a mu jui, han Jisun meithainu jiang a ti, “Chapmaro.”

¹⁴Han Jisu ning alui honga khumha a hong tok, hava phat han miruak choingaiha an ngirra an om ma, Jisu ning a ti; “Reathar kein nang jiang ka na ri, thuitaro.”

¹⁵Han athipaha a hong thuia, chong ahongrijui hale ama ha a nu jiang an pek jui.

¹⁶Han mitamngain achit anluichitjui, hale Pathian an manpak a anti; “Pathian chong ri a lian tak Pathian ning kankaara a hong tir jui.” Hale Pathian in ama mingai jiang a mit en a lut jui.

¹⁷Hale Jisu a ruija chong hi Judia ram rakip le a kol la a om khopui rakip hin a tung jui.

¹⁸Johon achongchoi ngain ama jiang chong rakip ha an ripe jui.

¹⁹Han Johon ning thiamruoi anni akuia puma jiang a tirra a man dingkel, “A hong rang puma ha nangmo na ni, animakle midang khat mo kan langak rang?

²⁰“Jisu jiang vei khat an honga an lui dingkel ret jui, tui anamanlutpa Johon ning keini hi a na hong tir, a hong pa ha nangmo na ni, khat mo kan la ngak rang.”

²¹Hava phat lai tak han Jisu ning a nat mitam bhut a lut mitamtak amandam pe jui.

²²Jisu ning Johon thiamruoingai ha alui sang; nan nuk kirtaru, hale nan mu na jet ngaiha Johonjiang ri petaru, a mitdelngain an mu jui, a nat ngain andamjui, akuarsep ngain an kuar a var jui, athingain anringkhir jui, hale kusti tong ngain andamjui, hale ariangain chong hui an jet an ri jui.

²³Kei jiang kutsuikesui a nei lui mingai ha ravansat anni.

²⁴Johon a thiamruoingai an kir suale Jisu ning mitamngai jiang chong ri aluiphut, nang ni ning Johon le ram ma tangbunga nan che karra imo en rang tia nan che? Phaivou ning a man kannik sing a mansat ha mo en ranga nan che?

²⁵Han nang ni imo en rang tia nan che ani? Puan a nem atiang mingai ha mo en rang nanti, enru, hava puansat ankansinhei, a huia a om mingai ha ko reng om na mun rengkualla an om ani.

²⁶Han imo mu rang en ranga nan vache? Pathian chongripa en ranga mo? O, keinnangni jiang ka na ri ani, ama ha ko Pathian chong ri an khat nek a lian det ani.

²⁷Hivahi Johon ani, ama a ruia alui kan jiak a alui omsake, Pathian ning alui ti, nang kama don na kachongchoi khat ka hong tir rang ke nang na lam hong sin na ranga ani.

²⁸Jisu ning anmani jiang a ti, Johon ning ramuol chunga a om mirakip nek a alian det, tak-ha Pathian rengram ruia a man kan sin ama ha Johon nek a lian det ani.

²⁹Miring rakip ning an lui anmaningai ha khasana chom hale Pathian chuan dik a tho, han Johon ning tuija baptais a man tho ngai anni.

³⁰Tak-ha Pharisi le dan thei oja ngainko lui jot ma u, Pathian in an man iranga a hong tir Johon jiang om tuija baptais lui tho ma u.

³¹Jisu ning a ti, “Atuntak mingai hi ilemo ka khide rang? Hale anmani ilemo an kan ang?

³²Anmani ngaihi phur juarna nai pangngai le an kan ang, anmani khat le khat ankanjuia anti, keini ning nang ni jiang theili kan tum le lamrang nanda, kein chajang kashiarle nang nin chaprang nanda,

³³ajarko tuija baptais an tho pe Johon ning talle darkha tui in lui a alui hong, tak-ha nang nin ama bhutchoike nanti a nan lui.

³⁴Mi pasalnai ha a hong jui tak-ha nang nin rolduakpa, ju inpa, khasana chomngai le, siatneingai sapke nanti.

³⁵Tak-ha ching nale var na lam ko, ama a nuk jui rakip ning adik nanti.”

³⁶Pharisi an khat in Jisu ha bu nek akuihan Jisun a chea nek na ranga a ong jui.

³⁷Enru khopui han siat nei numeinu khat alui om, ama ning Jisu hi Pharisi inna an omtihi a jet, han a man puma jiang teiranga thairim hui a hong choia,

³⁸Puma a nuk tiang hin a ngirra aluichap, amittuihan puma ke achop pe jui. Han ama a sam han puma ke ha aluinot, hale puma a ke ha alui tum thairim hui han anotpejui.

³⁹Han pharisi pan a mu karra a thei jak a akan ti, “Hiva mipahi a thianga Pathian nai aninko hiva numeinu ning a tok hi ajetrang a suak, hale ama ning ho ang khan na siatnei mi mo ani tihi om ijetrang a suak.”

⁴⁰Jisu ning Simon jiang a sang “Kein nang jiang chong aviar ri kati,” han a man a ti, puma riro;

⁴¹“Phatkhat a mipakhat ning peisapuk miring anni jiang alui pek, mi khat jiang ruphai reani somranga, hale, khat jiang ruphai somni leiranga anluitual.

⁴²Anmanin ansak torlui jarra aneipuning a bangpejui. Hava jarra anmani tulaminmo an lung siatdet rang?”

⁴³Simon ning a sang, kei ngaidonnako a tam atual palam ning a lungsiat det rang ke; han puman ama jiang a ti, nang in nariha adik jui.

⁴⁴Han Puman numeinu jiang a en na Simon jiang a ti, “Nang in hiva numeinu hi na jet mo? Kei ning na inn na ka hong, tak-ha kake narasukpe ma che, tak-ha hivanu ningko amituia kake anara sukpe asamma a na notpejui.

⁴⁵Nang in kei hi naluitum ma che, tak-ha hivamiko ka hong tenna kake anala juppe ani.

⁴⁶Nang in kalu chunga sariak rimhui nanotpe mache, tak-ha a man ko kake tunga thairim hui ananot pe jui.

⁴⁷Hiva jarra kein tikati, ama a siatna a tam tak ka ngaidam jarra, ama ning kei hi a na lungsiatdet ani.”

⁴⁸Han puman numeinu jiang a ti, “Nang na siatna rakip ka na ngaidam jui.”

⁴⁹Puma le bu nek suam ngain an kanbiakjui, “Miring siatna tenna a ngai damtor ama hi tu mo ini?”

⁵⁰Puman numeinu jiang a ti, “Nang in na takngai nuk jui a, lunghip tak a chetaro alui ti pe.”