Read Aimol LUK 8 Bible Online

LUK 8 - Aimol bible

LUK 8

¹Hingahin a hongni, Puma ning khopuiale khuo sunga Pathian rengram chong thiang arilaihan ama thiamruoi somleiningai om Puma nuk an lui jui.

²Hana numei khat a nat damthei luinuha amandam seitan sari Magdalen ning Meri tenna an phut aluinotsuak.

³Herod rengpa thuaia a om Chuza a numei Joanna le Susana, hale a dang numeitam ning Jisu le a thiamruoingai ha sep a an lui tho pe jui.

⁴Han khopui rakip mitamin Jisu jiang an hong pha han Jisun an jet thei na tetanna anmani jiang aripe.

⁵“Chimuru vorning achimuru vor ranga a hong suak, hale ama ning a vorra, aviar ning lampuia a chul han mi ning anluisir, hale vate ning om anrutjui.

⁶Chimuru aviar ko lung karra aluichulla among, tak-ha ram ajillui jarra a rajung che na om mak a hong charjui.

⁷Chimuru aviar ning lingbuk karra a chul, a hongmong tak-ha lingin akhudea a hong thi khir jui.

⁸Chimuru aviar ningko simleihuina a thiang achula asat ahongmongjui, a chang khat reakhatje ahongrajui.”

⁹Puma thiamruoingain ama jiang andingkella, tetanna hi athinga imo ani?

¹⁰Han puma ning anmani jiang a ti, Pathian rengram ranga chong thiang, chong ruk nang ni jiang a na pek jui tak-ha a dang ngainingko an en tak-ha mu ma u, hale an ngai tak-ha jet ma u.

¹¹Tetan na kariha hi ani; Chimu ruha Pathian chong thiang ha ani,

¹²lampuia a chul chimuruha Pathian chong ko a jet, anngaiom an ngai, tak-ha seitan ning an lung sunga a lut Puma chong ha man lut pemakna a thope ani.

¹³Lungchunga a chul chimu han Pathian chong ko an jet, an lui om an lui ningsat a tak-ha an lung ril tungako thun ma u, anmanin phatbongkhat rang jak a an luingai, mathemna a hong karra Pathian chong ha luijuitormau.

¹⁴Lingbuk karra a chul chimulamha Pathian chong ko anjetbak a ramuol chunga huinale nei na lamin atorra Pathian jiang a ra a om torlui ngaiha anni.

¹⁵Simlei a thiang na mun na a chul chimu rulam a thiang chongaiha an jet karra an lung sunga a lut le adik a an luia chong anjuia a ra om mingai ha anni.

¹⁶Tu aninnum thoumei a sit karra bellin khupdemau, hale, khancham nuai a siakmau, tak-ha a var ha mi ning an mu na ranga thaimei siakna chunga ansiak ani.

¹⁷Ajarko ri lui rang chong ruk i te khat om mak, hale jet lui ranga le rijot lui rang i te khat om mak.

¹⁸Hiva jarra nang ni ija mo nanngai, “Kan ning theiru, ajarko, a nei ama jiang pek nati, hale a nei chillui ama ning om ka nei ti na ta alapek rang ke.”

¹⁹Hava rakip suale Jisu a nu le anaipangai ning an honga, an hongtok, tak-ha mi antam reia anmanin Jisu ha kanmutorlai ma u.

²⁰“Han Jisu a nu le a pangai ning va ralla an om na kanmupuiranga chong an lui pek.”

²¹Han Jisu ning anmani jiang a hong sang, “Puma chong a ngai, a jui chuan a tho ngai ha kei ka nu le ka u ka naingai anni.”

²²Nikhat Jisu le a thiamruoingai rokuang anluichuanga anmani jiang alui tipe, keini tuivaral tiangson che rei, han anmanin rokuanga an hong jui.

²³Anmanin rokuanga anhonglai tak han Jisu hi ajalla alui om jui, hava lai tak han rothiphaivo kanchella adik khan alui ranga rokuang sunga tui ahonglutjui. Thiamruoingain a tam anluichitjui.

²⁴Han thiamruoi khat ning a chea Jisu ha a kei thuia, “Puma, Puma, keini hi thirang kan ni jui;” han Jisun a thuia ruale phaivou ha aluikhapjui, han anmani a hip a dai tak a an om jui.

²⁵Han a man a ti, “Thiamruoi ngai jiang nang ni nan takngai ha hon mo nansiakjui.” Han thiamruoi rakip ning a tam anluichitjui. Hivahi imimo ani? Ruale phaivou ning om a chong anjuihi.

²⁶Han Jisu le a thiamruoingai le Gerasene khopui hin Galili va ralla an hong tung jui.

²⁷Jisun hingahin khopuia a hong lut karra Seitanning i choi mi khat a kan tong pui.

²⁸A ma ning Jisu ha a mu karra a khek ahongchap Jisu madonna rasa ringa alui ti, “O, a sang tak a om Pathian nai nang le kei imo kan suak, kein nang kinangaituihi, kei hi na man pong lai maro.”

²⁹Han Puman Seitan ha suak taro atipejui, ajarko Seitanning ama ha a manponga alui om, han mingain ama ha thirruia an khit innom Seitan in aphoisat mi hi ramtiangjak aluimanche ani.

³⁰Han Jisu ning ama jiang ading kel, “Naming imo anti?” Hale a man alui ti, “Kaming a tam anti,” ajarko Seitanngai ning ama jiang anluilut.

³¹Han Seitanngai ning Jisu jiang anmathem, keini hi mei khurra namasul maro tia an lui ri.

³²Han tangkor khat voktam selpa khat alui om, hava han Seitanngain chekanti tia Jisu jiang an ri a Jisun a jot pe jui.

³³Hale Seitanngain mipa tenna an phut an suak a vokngai jiang an lut karra, voktam ngaiha an lui kan se jui, bual karra an thei an theia an lut jui.

³⁴Vokselpaning imo a suak tihi alui jet a khopuirakip hava chong ha a ri mathangjui.

³⁵Hingahin a suak chuan ngaiha en ranga mitam an lui hong Jisu jiang an hong karra Seitanning alui man vetpa puan si diar kei asatak akai a Jisu jiang a huia alui om ha an mu karra a tam an chitjui.

³⁶Hale Seitan in achoipa ija mo asat ti ha amungain mi jiang an lui ripe jui.

³⁷Han Gerasene khopuia a om ngain Jisu ha atam an chit jarra khopui tenna an phut chetaro antipejui, han Jisun rokuang a chuanga a nuk a hong kir jui.

³⁸Seitan a lut pasalham Jisu nuk ha juirong tia aluirijui.

³⁹Tak-ha Jisun ama ha a mak alui ti, “Na inna kirtaro, han Pathian in nang chuanga hiva duk chuan a lian anathopehi vari manthang taro. Hingahin ama ning khopuirakip Jisu ning ama chunga athopena rakip ha a ri manthangjui.”

⁴⁰Hingahin Jisu ning a hong karra mitamin ama ha a hui a andonjui, ajarko mitamin Puma ha an lui ngak ani.

⁴¹Enru Yairu anti pasalkhat alui om, ama hi sainagokhin reng ani, hale a man Jisu ke thuaija akunna ama inna na hong pero tia a mathem.

⁴²Ajarko ama a numeinai khat jak kum somleini jak alani nu ha thirang a tho jui. Hiva jarra mitam ning Jisu ha anhir khap a an om ani.

⁴³Hava lai tak kumsomleini thi acharra a nat an khat alui om, ama hi thiampungai jiang a tor khan na atinga a lui kan en in num damtorlui ani.

⁴⁴Hava numeinuning Jisu nuk tiang mitam karra alui honga Jisu puanmor ruk a asitjui, havalaitak han a thi alui charha a dam jui.

⁴⁵Han Jisu ning a dingkel la, tu angkhat ning kei nannasit mo? Mirakipning anluidajui, han Pitar in a ti, “Puma mitamngain nang annasitjui.”

⁴⁶Ajarko ka ranak aviar a che ka jet, “Tu ang khat in annasitjui.”

⁴⁷Han numei nainuhan annajetjui tia a chit reia aluikannikjui, hale Jisu madonna ahongkiakjui, a man ija mo Puma puan ka sit le hinghin ka dam lenjui tia mitam jiang a ripe jui.

⁴⁸Jisu ning hava nujiang a ti, “Kanainu, na takngai na han nang a na mandamjui, a hip a chetaro.”

⁴⁹Jisu ning hiva chong hi aluirilai, “Yairu ha nanainu a thi jui” tia chong a hong jui, “Thiampu tok lai maro.”

⁵⁰Jisu ning a jet karra Yairu jiang a ti, “Chitmaro, takjak ha ngairo, ama aladamrangke.”

⁵¹Han Jisu ning Yairu Inn a tung karra Johon, Pitar, Jems hale, insung nai pang a nu apalejak aluilutpui jui.

⁵²Mirakip ning chajang shiarra an chap naipangnuha an lui oi, han Jisun a ti, “Chapmaru, naipangnuhi a jalke.”

⁵³Anmanin Jisu ha an lui nuiso, ajarko naipangnuhi a thi jui tihi anjetsa ani.

⁵⁴Han Jisu ning a kut a o va alui kei thui, Alei thuitaro.

⁵⁵Han a hong thui jui, Jisu ning atipe ama jiang chak le nek pekru.

⁵⁶Hingahin a suak rakip an mu karra a nu a pa ngain pum ngak an ngak jui, hiva rakip hi tu khat jiang om manjet maru tia Jisu ning anmani jiang chong a bejui.