Read Aimol LUK 9 Bible Online

LUK 9 - Aimol bible

LUK 9

¹Hingahin Jisu ning a thiamruoi somleini akuia thavang satlui Seitan not cheina le a nat mandam torna ranak anmani jiang a pek jui.

²Han a man Pathian rengram chong thiang rirangle mi mandam ranga atirjui.

³Puman anmani jiang a ti, “Nang ni i om choi maru, ramchei nan che karra, chak thei, hale Puankok, peisa hale kuntai tennaom anni abo choi maru.

⁴Nang nin nanlutna inn tak han om ru, hale hava tenna an phut kanthuiru.

⁵Han nanlutna khopui mingai ning an na mahokmak inko nang nin suakderu, nan suak karra an mit an mu thei na ranga nankedirha khongthakru.”

⁶Hava suale thiamruoingai ning khopui rakip an lut Pathian chong thiang an ri manthang, hale a nat rakipham an mandamjui.

⁷Hingahin Herod rengpa ning alui suak chuan rakip a jet karra a tam a lung avetjui, ajarko mi a her khat ning Johon ke anti,

⁸han mi aviarinko Elija ha a hong suak khirretjui anti, hale mi her khat inko an lui ti, a tuan laia Pathian chong lui ri ngaiha an hong ringkhir ret jui.

⁹Herod in a ti, “Johonko a ring katanna a thi sa ke, tak-ha tu mo ini ama ha? Herodin ama ha aluimujot.”

¹⁰Thiamruoingai an hong kirra an tho rakipngai ha Puma jiang an ri jui, han Puma jiang anmani ha a tuanga Bethsaida khopui han an che jui.

¹¹Han mitamngain hiva chong hi an jet karra mitam ning an nuk an hong jui, Puman mirakip ha a huia a donjui, Pathian rengram ruia aripe hale anatngai ha amandampejui.

¹²Nilut tiang pha han thiamruoingain Jisu jiang an lui ti “Mingaihi khuo sunga tirro, hale chak rang nek rang hong manchoiro, ajarko keini achikna mun na kan om ani.”

¹³Jisu ning a ti, “Thiamruoingai jiang nang ni ning anmani jiang chak le nekha pekru.” Thiamruoi ngain an sanga, keini kanneiko tallom ranga le nga annnijak ke. “keini mitamngai ranga chak rang nek rang vachok kan ti an lui ti.”

¹⁴Ajarko mingai hi lising ranga dor anni, Jisun thiamruoingai jiang a ti, “Mingaihi arup arup man om ru, rup khat a somrangaje man ongru.”

¹⁵Tirlon ngain an lui man ong jui.

¹⁶Han Jisu ning tallom ranga le nga anni ha a luia chungvan tiang a en na Pathian phual a lamjui, hale tal ha a ek khamma thiamruoingai jiang a pek mitamngai jiang amansemjui.

¹⁷Hava mun na a om mingain an chak an nek suale a liam bang ha thiamruoingai ning anrut a luk somleini alui sip jui.

¹⁸Hinga hin Puma ning atheia lam na a nei lai han, thiamruoingain ama jiang an honga han Puma ning anmani jiang ading kel. “Mitamngain kei hi tu mo annati?”

¹⁹Mi aviar ningko anti, “Elija, hale mi aviarin Pathian Tashanthei khat a hong kir ret annati.”

²⁰Han Puman anmani jiang ading kelret, nang ninko kei hi tumo nan na manchang? han Pitar ning a sang, “Nang Pathian nai sangringpu Khrista ha na ni.”

²¹Han Puma Jisu ning a ti, hiva chong hi tu jiang om manjet maru tia a man chong a be,

²²han Puman a ti, “Mi pasalnai ha pong khodengthei na mu rang ani, hale a chong che ulianrup, thiampulian, hale dan ojangai ning ama ha enda na nei nanta a maha that rang anni, hale ni thum suale ama ha a thui khir rang ke.”

²³Puma ning mirakip jiang a ti, “Tu ang khat in kei kanuk annajuijot aninko a tak tak ning kan jot ma rase kan ma tirrase, hale a tak Khros hong kan choi senlang ni khat ni khat kanuk na jui rase.

²⁴Ajarko a thavang akansanringjot ama han mang nati, hale kei ranga a ringkhuo a manmang tor ama han thavang ring na ha mu nanti.

²⁵Mi khat ning ramuol pumpui a tum a chang in nom, a ringkhuo a kan santormak aninko ama rang a nem na imo a om.

²⁶Ajarko kei jarra, ka chong thiang ri ranga ajak ngaiha Mi Pasalnai le a pa le thaneithiang ngain lianpui na, a hong pha han amanjak rang ke.

²⁷Kei ning nang ni jiang ka na ti tor mi aviar ko Pathian rengram an mu mak kar je thi tihi om noning.”

²⁸Hapta khat suale hingahin a hongni, Jisun Pitar, Johon, hale Jems Jakob hi a tuanga tangbunga, Pathian jiang a hong lam.

²⁹Pathian jiang an lam lai tak han Jisu amelle a tak ha a hong kan thul, han a puan adiar ha om pumnguia alui ngui.

³⁰Han mi anni anmanin an lui mu, Puma le an kan biak, anmani ha Mousi le Elija anni.

³¹Vanram tenna a hong ngain anmani jiang an manjet, Jisu ning thinata hale Jerusalem ma Puma lungdo a man tung rang ani.

³²Han Pitar le a kan ruaipui ngai han imu anvuangjui, hale an hong har karra Jisu a lian na ha an lui mu, ti ko mi anni ning an ngirra Puma ha an lui ngak.

³³Mingai han Jisu ha an mak an che suale Pitar ning Jisu jiang a ti, “Puma keini hin kan om hi i duk asatmo ani jui? keini ning Tham inn an thum sin kan ti, Tham khat hi nang ranga, khat hi Mousi ranga, khatlam hi Elija ranga, Pitar in imo alui ti ha kan jet tor mak.”

³⁴Pitar ning hingahin a ri lai tak sum phai ning a khu de jui, Sumphai ning ahongkhude karra anmanin an lui chitjui.

³⁵Sumphai karra rasa khat alui hong, “Hivahi ka nai kathangsaha ani, nang nin ama chong ha ngairu,”

³⁶rasa a hong pha han Jisu a bing jak a alui om. Thiamruoingaiha an om chianjui, anmanin an jet an mungai ha tu khat jiang om risuakmau.

³⁷Hingahin ni khat suale Puma ning a thiamruoingai le tangbung tenna an phut anhongchum pha han mitam ning anmani ha andonjui.

³⁸Han mitam karra mipa khat ning a hong khek, “Ajarko kanaihi amajak ke.

³⁹Enru thavang satlui Seitan khat ning ama ha aluichurra, ama ha khang khek akhekjui, acherhuan suak na rang khan na a man pongjui, han naitepaha a suak jot mak chuchunga a saukjui.

⁴⁰Kein na thiamruoingai jiang kari tak-ha anmanin luimansat tor ma u.”

⁴¹Han Jisu ning anmani jiang a sanga, “O, takngai lui, aniluitho mirualngai, i duk mo kein nang ni le kan om suamrang? Nanaiha hong tuangro.”

⁴²Nai tepaha a hong tuang karra Seitan ning ama ha anok simlei chunga a man kanlumjui, han Jisun alui ti, Seitan nang suak taro; hingahin naitepaha Jisu ning amandam ma apaijiang vei khat an pek khir jui.

⁴³Mirakip ning Jisun a tho chuan ha an ngak ver jui. Mingain an lung avet an ngak laitak han Jisun a thiamruoingai jiang a ti,

⁴⁴“Nang nin chongngai hi nankuarra thunru, ajarko minai pasal hi mikut chunga pek rang anni jui.”

⁴⁵Tak-ha Jisun a ri ngaiha anmanin lui jet ma u, anmanin an lung sunga anthupjui, hale Puma Jisu jiang hava arui dingkelrang om an chitjui.

⁴⁶Han thiamruoi karra tu ning mo a lian tak ichang rang tia chong ri siat an lui tho jui.

⁴⁷Han Puman an lung sunga an kan kherha a mu han Puma ning naipangte khat ha ankolla a siak anmani jiang a ti.

⁴⁸“Tu ang manin kei ka minga hiva naipangtehi alui don mi ha kei analuidon ani. Hale kei a na lui don anmaningai ha, kei a na hong tirpu ka pa an lui don ani, ajarko, nankara asin tak ama han nan karra a lian tak ni nati.”

⁴⁹Han Johon ning a hong sang, “Puma nang na minga bhut ngaihi anot chaitor keinin ama ha kan khap, ajarko ama hi keini karra kan chel mak.”

⁵⁰Tak-ha Jisun ama jiang a ti, “Khapmaru, ajarko nang ni a na endalui ngaiha nang ni sapke.”

⁵¹Hingahin Jisun vanram ma a kal narangpha a hong nai jarra, ama ning Jerusalem che ranga ama hi a hong kan heijui.

⁵²Puman tirlonngaiha ma sat a aluimanche, Samarija khopuilian na ama hong ranga kan ningru tia atirjui.

⁵³Han Jisun Jerusalem tiang che rang alui kan ning jarra anmanin asat a luimahok lai ma u.

⁵⁴Han Puma tirlon Jakob le Johon in an mu karra Puma jiang anti, “Puma keini vanram tenna an phut Meilom kui kanta anmani ha manmang kan ti, najotmo?”

⁵⁵Puman anmani jiang a ti, “Nang nin ho anga thavangmo ani tihi jet mak che u, ajarko Mi Pasalnai han mithavang manmang a hong nimak, tak-ha sanrang tia a hong ani.”

⁵⁶Hava suale anmani ning khopuidang khat a an che jui.

⁵⁷Hingahin anmanin kal anthonna an che pha han mi khat ning Jisu jiang a ti, “Kei ko na che na mun rakip a kinajui rang ke.”

⁵⁸Jisu ning anmani jiang a ti, “Ram ui ngai om ankhur a om, vangai om rabu an nei, tak-ha mi pasalnai ha ko alusiak na rang tenna a mun om mak.”

⁵⁹Hale a man a dang khat jiang ariret, “Kanuk na juiro,” tak-ha hava mipahan a sang “Puma kei inna ama sat ka pa ruak varebak ranga na jotpero.”

⁶⁰Han Jisu ning a ti ret “A thingahin a thi ngai ha anruak luikanre rase u, nang che in lang Pathian rengram chong ha vari manthangro.”

⁶¹Hale a dang mi khat ning a ti ret, Puma na nuk najuikati, tak-ha inna chebak kata ka insung mingai hong mathan bakrong.

⁶²Jisu ning a sang, tu ang khat ning langkuan a lek chunga a nuk a kan heia a en mi han Pathian rengram ha mu rang a rahui chang mak.