Read Aimol JOHON 1 Bible Online

JOHON 1 - Aimol bible

JOHON 1

¹Arapatak chong ha alui om, chong ha Pathian le alui om suam, chong ha Pathian alui ni.

²Chong ha arapatak Pathian le alui omchun.

³A ma jiang anphut phur rakip a ranak alui sin, ankhat om iluisinna ha Pathian ama niluia ite khat om lui kan sin mak.

⁴Pathian jiang ringna chong alui om, hale hava ringna ha miring ngai ranga var alui ni.

⁵Avar ha ning ajing munna a var, a jing ha ning avar ha luitormak.

⁶Pathian in a hong tir mi ankhat a ming ha Johon anti, mingai tak chunga avar chong ngir Sakhi, chuan tho ranga Johon ha alui hong jui.

⁷Achong ri a mirakip in an jetna ranga le takngai na ranga ihongke ani.

⁸A mako avar ha luini mak, tak-ha avar chong ngir pek ranga iluihong ani.

⁹Ramuolla ahong mirakip asat varnarang amahi adik avar ha ani.

¹⁰Chonghan ramuolla alui om, Pathian in ama jiang anphut ramuol alui sin, tak-ha ramuol ha ning amaha luijet mak.

¹¹Ama a mingai jiang iluihong, tak-ha a mingaining lei lui mau.

¹²Mi a lek inko a maha tak an luingai jarra, Pathian naingai an chang theina ranga a man ranak alui pek.

¹³Anmani ngaiha ko miring ngai omchan nukjuia taksa le thisennai ni mau, Pathian lungdoa naichang Pathian jak ha an pa anijui.

¹⁴Chong ha miring ahong changa kan karra a om, ama adik le man ritna, a ship, lianpuinaha kan lui mu. Hava lianpuina hako a lungsiat a pasalnai jak ha ani, hava ha apa jiang tenna anphut amu ani.

¹⁵Johon in ama Pathian chung changa a khek a aluiti, “Kei kanuk ahong ama hako kei nek a a lian” tia iri ha a mahi ani, ajarko, “Kei ka hong mak ma aman maton ilui hongrol ani” tia ari Pathian ha hivahi ani.

¹⁶A ma, manritna chung changa a khella manrit naham keini rakip in kan tum jui kan mu jui.

¹⁷Mousi jiang anphut chongjen narang chong apek, tak-ha Jisu Khrista jiang anphut lungsiat manrit nale adik ha alui hong suak ani.

¹⁸Tu khat innom Pathian la mu mau, Pa anga a om, a nai ankhat jak ha Pathian in manjetna ana mannei jui.

¹⁹Jerusalem ma a om Jiwngai, “Nang tumo?” Tia chong dingkel na ranga thiampungai le Levingai anhongtir pha, Johon in ari ha hi ani;

²⁰Johon in a thianga alui ri suak, “Kei Khrista ha ni making.”

²¹“Hanko nang tumo nani? Elija mo nani?” Elija mo nani?” Tia anding kel, han Johon in avasanga, “Nimaking”, han anmanin vei khat anding kelret, “Nang Pathian chongphuang ha nanimo?” A man a sang, “Nimaking” a ti.

²²Anmanin ama jiang anti, ‘Keini ana juangtirngai jiang sangna ranga, nang na binga imo ni kanti? Tumo nani keini jiang na man jetro’.

²³Johon in alui sang, Isaia in aluiti, “Pathian chong ri nuk juia Pathian lam ha mandikru! Tia ramtong na a om mikhat in rasa a shanga ikhek ha kei kani.”

²⁴Anhongtir mingai ha Pharisingain an luini.

²⁵Anmanin Johon jiang an dingkel, ‘Nang Khrista ham, Elija ham, Pathian chongri ham nanimak inko, ijarra mo mingai baptais na man tho?’

²⁶Han Johon in anmani jiang alui sang “Keiko tuija baptais ka tho, anin nom nang nin nan jet lui nan karra a ngir an khat a om.

²⁷A ma nuk a ahong rangke; kei ko ama kekok ruiha kasui tor rang om ka rahui nimak” a ti.

²⁸Hivahin Johon ning baptais amanthona Jordon tuidung va ralla, Bethani hin alui suak omchan ani.

²⁹Khuo ahon var suale, Jisu ni ning Johon a kolla a hongha amu a alui ti, “Enru, ramuol siatna achoi Pathian alungnem belramteha hin a om,”

³⁰kein kalui ri, “Kei kanuk ahongmi ankhat ha kei modona alui omsa ani, ajarko alui omsake ka luiti ha ama ani.”

³¹Kein ama tumo ini rang luijet making, tak-ha Israel mingai ning ama anjet na ranga baptais amantho na ranga kei kahong ani”

³²Johon ning chong ngir shakhi a pek, “Kein thavang ha khunu anga chung vanna anphut a hong chum kamu.

³³Hiangkhan kein lui jet making, tak-ha baptais ka man tho ranga a na hong tir puma han ana ti, nang in thavang ha mi ankhat chunga alui hong chumma a om ni mu rang ke; Ama ning Thavang Thianga baptais namantho nati.”

³⁴Hava “Kein ama chunga ka mujui, hale kein kamanjet rang ke, amahi Pathian nai ani.”

³⁵Khuo ahong var suale Johon atirlon anni le vei khat anlui ngirra,

³⁶Jisu a hongha a mu karra, “Enru Pathian alungnem belram so!” Ati.

³⁷Anukjui anni ngain anri ha an ngai a Jisu anuk anlui jui.

³⁸Jisun a hong kanheia, a mu han anmani jiang ading kel, “Nang nin imo nantok”? Han anmanin anluisang, ‘Rabbi nang hon mo na om?’

³⁹A man alui sang, “Hong innang hong enru, hiva jarra anmanin an chea a omna mun ha an mujui, havani tenna ama le om suam na anlui nei,” ajarko nitaktiang aluini, pung manli tang aluini.

⁴⁰Johon a chong ri an ngaia, Jisu a nuk jui ankhat hako Simon, Pitar a naipangpa Andrew ani.

⁴¹A man a rapa tak a u Simon a mu a, ama jiang alui ri, “Keini Mesaia kan mujui, Mesaia tiko Khrista tina ani.”

⁴²A man Simon ha Jisu jiang alui hong tuanga Jisu ning a en na ati, “Nang ko Johon a pasalnai Simon nani,” na ming “Kephas” tinanti. Tiko Pitar tinanti, hivahi lung tinam ani.

⁴³Khua a hong var Suale Jisu ning Galili tiang che ranga alui ngaidon. A man Philip ha a kan mupuia a ti, “Kei kanuk na juiro.”

⁴⁴Philip ha Pitar le Andrew omna Bethsaida khopuia alui om mi anni.

⁴⁵Philip in Nathanael a mua, ama jiang a luiti, “A ma chunga Mousi dan rabu Pathian chong phuang ngain anluisun miha keinin kanmu jui; a mahi Nazaret Jisu, Josep a nai ha ani.”

⁴⁶Nathanael in ama jiang a ti, “Nazaret asat ankhat suak tor nati mo? Philip in ama jiang a ti, “Hong innang hong enro.”

⁴⁷Jisu ning Nathanael a kolla ihong ha alui mua ama chung changa chong alui ri, “Enru, adik tak Israel ngaimi khatso, a chunga adik lui ite khat om mak.”

⁴⁸Nathanael ning ama jiang a ti, “Ija mo ninajet kei hi?” Jisu ning alui sang, “Philip in ana biakmak ma han thei chang kung thuaia na om lai kein kana luimu.”

⁴⁹Nathanael ning ama jiang alui sang, “Rabbi, nangko Pathian nai, Israelngai Rengpa ha nani!”

⁵⁰Jisun a ti, “Theichang kung thuaia na omlai kana mu kati jarra tak na ngai mo?” Nang in hiva nek a lian chuan ngai nala mu rang ke.

⁵¹A man anmani jiang a ti, “Kein nang ni jiang adik tak ka nari ani, vanram akan longa Pathian thaneithiang ngain Mi Pasalnai chunga ajuangchum, hale ankal anchum ha nang nin nanmu rang ke.