Read Aimol JOHON 10 Bible Online

JOHON 10 - Aimol bible

JOHON 10

¹Jisun a ti, “Kein nang ni jiang a thianga ka na ri ani, tu ang belram kot lutluia a dang pal varal tianga a hong lut ha ko, a ruk le arep ranga a hong ani.

²Belram kot a lut miha ko belram selpuha ani.

³Kot ngakpu ha ning kot longpe nati, belramngai ha anminga akuia a rasa an jet; han a man a ruoia vanga a tuang.

⁴A ma ning avaruoi suak phat han, an madon alon na, belram ngain an jui, ajarko, a rasa an jet.

⁵Amanining midang khat ha juinoniu, ajarko amelle a rasa jet ma u; ama tenna phut an tan rang ani.”

⁶Jisun hiva tetan na hi anmani jiang ari, tak-ha anmanin imo atina lui jet ma u.

⁷Jisun vei khat avatiret, “Kein adik tak kinari ani; belram ranga kot ha ka ni.”

⁸Ka madonna aleihong ngaiha ko a ruk rep anni jarra, belramngain an rasa lui jet ma u.

⁹Kei kot hakani kei jiang a hong rakip ring na mu nanti; hong lut nati suak nati hale khop nati.

¹⁰Aruk ha ning mithat ranga manmang ranga ihongke ani; kein ka hong hiko, nang ni ring na ranga le lungdo tung na ranga ani.

¹¹‘Kei belram asat selle anmani rang athitor ha ka ni.’

¹²Belramsel alopa ha ning asat belramsel animak jarra, ram ui ning a hong pha belramngai ha a mak a tan, han ram ui ha ning belramngai ha anot ankansenverjui.

¹³An niak ani jarra belramngai ha taktelmak.

¹⁴‘Kei asat belramsel ha ka ni’

¹⁵Ka pa ning a na jet kein nom ka jet, ha ang han belramngain nom an na jet, hiva jarra anmani ranga ka ringkhuo ka pek tor.

¹⁶Hijak ni luia a dang belram om an la om, ti ko kei Kabelramngai hiva sunga kan chel lui; Karasa na jet nan ta anmani ha va tuang kata, belramrup khat jak chang nan tau ashelpu om khat jak nirang anni.

¹⁷“Kapan kei alung ana siat, ajarko, ka ringkhuo ha ama ranga ka pek; han kein veikhat kamukhier rang ani.

¹⁸Tu khat innom kei Karingkhuo luitor noni u, ka pa ning cham a na pek nuk juia ka ringkhuo ha ka pek jot le ka pek ka lui khir jot le kaluikhir, hiva ranak hi kei ka nei.”

¹⁹Hiva chongruia anmani masiaha rupni an suak jui.

²⁰Mitam lam ning an hong ti,” iruija mo nanlangai? A ma ko Seitan a choia avet jui ke.

²¹“Aviar in anhongtiret, Seitan choi mi ning hi ang chong ritormau hale a mitdel om mandamtor ma u.”

²²Phabi a hongni pha Jerusalem ma biakinn lut na ut ha an lui tho.

²³Jisun Solomon biakinn tualla aluilon.

²⁴Mingain ama ha an hong dep hale an dingkel, “A thianga na ri pero nang Mesaia mo na ni? I duk sot mo keini jiang nila kanthup rang?”

²⁵Jisun a sang, “Kein a thianga nang ni jiang. Karijui, tak-ha nang nin tak na ngai mak che u; Kein ki tho rakip hi ka pa ranak ani tihi jet thei ani.

²⁶Nang nin tak na ngai mak che u, ajarko nangi kabelram karra kan chel mak che u.

²⁷Karasa belramngain an jet; Kein nom ka jet, hale kanuk ha annajui.

²⁸Anmani ha kumsot ringna ka pek; thichil lai noni u; Kei jiang tenna tu khat jak innom na sut tor noni u.

²⁹Irakip kara ka pa ning a na pek anmani ha khel la satke ani; han tu khat jak innom ka pa kut chung tenna sut tor noni u.

³⁰Kei le ka pa le khat jak kan ni,”

³¹han mingai ha ning ama ha deng na ranga lung anrutjui.

³²Jisun anmani jiang a ti, ka pa tenna chuan a tam kathoha nan mu jui, hava chuanrui jarra homo nan jot lui kei ha lunga na deng rang nanti.

³³Anmanin an hong sang, chuan sat ruia kein in nang ha lunga nadengjot maksing, tak-ha, Pathian ha esella nirijarra hale, nang in miring na ni bak a Pathian nichangjot.

³⁴Jisun a sang, “Nang ni dan Sunga a kan jiak Pathian nin a ti, nang ni pathian nan ni.”

³⁵keinin kan jet chong thiang rabun a ti ha adik ke ani, Pathian chong ha mingai jiang a hong pek, anmani ha pathian antike.

³⁶Kei ko Pathian nai ka ni kati jarra mo ani? A pa ning a lungsiat ramuol la ihongtir ama ha Pathian na esel nan ta amaruia mo nan ri.

³⁷Kein ka pa chuan ha ka tho mak inko kei tak na ngai maru.

³⁸Tak-ha, kein ka tho inko tak nannangai mak in nom ka pa ning kei jiang a om. Kein ama jiang ka om tihi jet a tak nan hong ngai na rang chuan ha takngairu.

³⁹Anmanin Jisu chur na rang an lui tok, tak-ha anmani kutveng tenna aterjui.

⁴⁰Johon ning tuiamanlutna Jordon va ralla Jisun a che ava omjui.

⁴¹Han mitam lammin Jisu jiang an honga an hong ti, “Johon inko jet na chuan hi iom tho mak, tak-ha mihiningko Johon ning alui ri nuk juia a tho.”

⁴²Hava mun han Jisu ha mitam lammin tak an ngai jui.