Read Aimol JOHON 11 Bible Online

JOHON 11 - Aimol bible

JOHON 11

¹Bethani khopuia Lazarus anatpaha alui om han, a u Meri le Martha om an lui om.

²Meri ning puma a ke han, Sariak rimhui anot pea; asamhan anot hulpe han a naipangpa Lazarus alui nat.

³Hiva jarra a u nu ngai ning Jisu jiang chong an pek “Puma na sap lungsiat ha a natjui.”

⁴Jisun hava ha a jet phat han, a ti, “Hiva a nat hi thina rang a nat nimak, tak-ha hiva jarra Mi Pasalnai manpak nale lianpui na mu na ranga ke ani.”

⁵Jisun Meri, Martha le Lazarus a lunga siat.

⁶Jisun Lazarus a nat ti chong a jet tenna phut a om na mun na nini suale a tung jui.

⁷Hava suale a man a thiamruoingai jiang a ti, “keini Judia tiang kirkhir tarei,”

⁸Thiamruoi ngain Puma jiang anti “Oja Jiwngai ning a tun tak lunga nadengrang anti ha, Sontiang nala cheret rang mo?”

⁹Jisun a sang, “Nikhat sunga nidan somlei anni nimak mo? Hiva jarra tu ang mi ning sunna a lon inko kutsuikesui om noning, ajarko a man ramuol la var ha a mu.

¹⁰Tak-ha tu ang mi ning jan na a lon inko kutsuikesui nei nati ajarko, avar ha a man jiang om mak.”

¹¹Jisun hava arisualenle “Lazarus ajaljui, a tun kei chekata va kei thui rang ka ni; a ti.”

¹²Thiamruoingain anti, ‘Puma, ama a jal aninko, a nat damrang ani.’

¹³Tak-ha Jisun ko Lazarus a thi jui a ti na ani; anmani ngaidon na ko ajalla a pong akansak ke anti.

¹⁴Hiva jarra Jisun a thianga anmani jiang Lazarus a thi jui tia a manjet.

¹⁵Tak-ha nang nin tak nanngai na rang. Kein ama jiang lui om making ti a nang ni jiang ka ning asat, keini ama jiang che rei.

¹⁶Deuma anti Thoma ha ning a sap Thiamruoingai jiang a ti, puma le keini thisuam ranga che rei.

¹⁷Han Jisun a hong tungpha, Lazarus ha thanna an phumna nimanli ani jui tiha a jet jui.

¹⁸Bethani ha Jerusalem tenna phut mail kilometar anni anthum a kan lak ani.

¹⁹Jiw mitamtak in Meri le Martha an nai pangpa thijarra lung hui luitak mathem ranga an hong ani.

²⁰Martha ning Jisu a hong ti chong a jet pha, a chea avakan mupui; tak-ha Meri ko inn sunga a om.

²¹Matha ning Jisu jiang a ti, ‘Puma nang na lui om inko kanaipangpa hi thinoning,

²²ha aninom nang in Pathian jiang ama ranga na lam rakip ana pek rang ke tihi ka jet.

²³Jisun ama jiang a ti, na nai pangpai ringkhir rang ani tia a manjet.’

²⁴Marthan a ti, atorna nikhuo han ama hi a hong thui khir rang tihi ka jet.

²⁵Jisun annajiang a ti, “Kei thui khir nale ring na ha ka ni, tu ang mi ning kei hi tak ana ngai inko athi innom aring khir rang ke ani,

²⁶han tu aninom kei tak anangaiha ring khier nati veikhat thilai noning tihi tak nangaimo?”

²⁷Amanu ning a sang, ‘Puma, Pathian nai Pasal ramuol la ahong Mesaia na ni, tihi kein tak ka na ngai.’

²⁸Marthan hi a ti suale anaipangnu Meri jiang a che rukchian a kan biakpui, “Oja ha hin a om ma Nang anatok tia a hong manjet.”

²⁹Meri ning ha a jet pha, a thui ret a rak tak a kanmupui ranga a che jui.

³⁰Tak-ha Jisu ko khuo sunga la hong tung ma, Marthale an kan mu na han ala om ani.

³¹Jiw mingai ning Meri inna lung hui lui tak an om han, Meri in a ngirra a rak tak a che an mu pha a nuk an lui jui; ajarko anmanin Mari ha thanna a che avachap rang mo tia an ngaidon.

³²Meri ning Jisu om na mun a mu pha han, a mai akuna, ‘Puma, nang hin na lui om inko ka naipangpa lui thi noning a ti.’

³³Jisu ama achaple Jiwngai chaplim a mu han, a lung a tam atokjui.

³⁴Jisun a ti, “A ma hon mo nanphum? Han anmani ning anti Puma hongnang enro.”

³⁵Jisu a chap.

³⁶“Jiwngai anti, enru a man i duk a lung isiat amo?”

³⁷Tak-ha anmani mi aviarin anti, “Amitdel ham alui mandam nimak mo? A man thina tenna Lazarus ha manring tornoningmo?”

³⁸Han Jisun alungtok a than tiang a che jui, thankhurha lunga anluising.

³⁹Jisun lung khek ranga chong a pek jui, A thipa a char nu Martha ning a ti, puma kanphumna nimanli ani jui arimsiatrang ani jui.

⁴⁰Jisun Numeinu jiang a ti, “Nang na takngai na a om inko Pathian lianpui na nimurangke ka na ti nimak mo?”

⁴¹Anmanin lung ha an lui suak jui, han Jisun chung tiang a en na a ti, “A pa ka na manpak kanalamna rakip na na jot pe.”

⁴²Kana lam na rakip nang in nanajetpe tile hiva mitamngain Nang in kei na na hong tir tihi tak an ngai na rang ka na lam ani.

⁴³Hiva a ti suale, rasaring tak a hong ti, “Lazarus hongsuakro.”

⁴⁴A thipa ha a kut a ke anchun chunga a hong suak jui, hale a mahi puan na an lui khit “Jisun anmani jiang a ti, ama hi sutnang man che taru.”

⁴⁵Meri inna a hong mitamngai ning om Jisun i tho chuan ha an mua tak an ngaijui.

⁴⁶Mi aviar inko Pharisi ngai jiang ankirra, Jisun itho chuan rakip ha an ripejui.

⁴⁷Thiampulian le Pharisingain kan chun na an nei a anti. Ija mo kalo tarang hiva mi chunga angakpa rakip itho hi ko?

⁴⁸keinin ama hi hingan a thei jak kanmasua inko, mingain ama hi tak ngain nan ta, han Rom mingain hong nanta kan biakinn le kanjat tenna nasutrang anni.

⁴⁹Hava kumma thiampulian kajapha ning a ti, nang nin iom jetmakcheu.

⁵⁰Jat khat in imangver nek inko miring khat ithi lam asat tihi nang nin ngaidon tor mak che u mo?

⁵¹A man hiva arihi a bing rang nimak, hava kumma a man thiampulian khat a chang jarra, Jiwngai rang Jisun a thi rang ha a man tashanthei anga a ri.

⁵²Anmani rang jak ni luia Pathian mingai a kan thechaia omngai ha taksa khat jak chang na rang om ani.

⁵³Hava nikhuo ten han Jiwngai ning Jisu that na ranga an kan siamjui.

⁵⁴Han Jisun Judia ram sunga kandorem lai mak, tak-ha, a man ramtong lianna a om Epraim khuo han a thiamruoingai le alui om.

⁵⁵Jiwngai kan na ut ha a hong nai phat han, mirakip taksa man thiang na ranga, ankhuo tenna phut Jerusalem ma an hong jui.

⁵⁶Han anmanin Jisu ha an lui tok, biakinn sunga an ngirra khat le khat an lui kan dingkel, nang nin imo nan ngaidon? A ma kan na ut hin hongnoning mo?

⁵⁷Thiampulian le Pharisingain mirakip chong an lui pek ha ko, Jisu a om na an jet le chonga na hong peranghan ama churnarang ani.