Read Aimol JOHON 2 Bible Online

JOHON 2 - Aimol bible

JOHON 2

¹Nithum chang na, Galili ramma kana khuo a mui ruai ut ankhat alui om, Jisu a nu le hava han alui kan chel.

²Hale Jisu atirlon ngaihaml hava mui ruai han anlui kuia an kan chel.

³Juha Darkhatui anmanin an neimak phat han, Jisu a nu han Jisu jiang alui ti, ‘Anmani Ju neilai ma u.’

⁴Jisu ning alui sang, “Numei kei ka tho rangha na manjet maro, kei a phat la hong tung mak.”

⁵Jisu a nu han suakngai jiang a ti, “A man nangni jiang ari rakip ha thoru.”

⁶Hava mun na han lungbel somni somthum akengtor bel ka ruk alui om. Jiwngai kan jot na nuk juia kan rasuk thiang na ranga an nek rang ani man kan thiang na ranga an nei manrang ani.

⁷Jisu ning suakngai jiang alui ti, “Hava bel ngaihi tui mangsipru;” han anmanin tui asip khan anhap jui.

⁸Hava phat han, Jisun anmani jiang a ti, “Atun tuiha thir in lang chakthopu jiang choiru.”

⁹Anmanin an choi chakthopu ngain ning tuiha ansit phat han, ju alui hong chang jui, anmani ning hon na anphut an lui hong choi tiha lui jet mau. Tak-ha suak ngainko tuia an phut athirha an lui jet.

¹⁰Hiva jarra a man muipa akuia alui ti, “Mirakip in ama sat Ju atui tak-ha an kan pek, hale mingain lung khop anlui inhan alekko atomdet anlui kan pek jui; tak-ha nang in a tun tunga asat tak Juha nalatet.”

¹¹Hava chuanlian angakpa amasat itho hi Galili ram ma kana khuo a alui tho ani. Hava mun na ama lianpui na aphuanga thimruoingain ama takngai na anlui nei.

¹²Hiva suale Jisu a nu le, hale thimruoingain kapernahumma anlui che. Hava mun na nikhuo a sot anlui om.

¹³Jiwngai Kanna kheng buban ranga a pha ahong nai jarra Jisu Jerusalem ma alui che.

¹⁴A man biak inna serat, belram, innkhunu ajuar ngaile Peisa chuai kaingain tebol la an lui ong ha a mujui.

¹⁵A man ruivok mol a sin na, biakinna anphut Serat, belramngai ha anot chai, hale Peisakai mingai ha’m an tebol ngaiha amalet pe jui.

¹⁶Khunu ajuar ngai jiang aman a ti, “Hinna an phut hiva phur ngaihi choinang suaktaru! Ka pa inn hi phur le pai juarna inn manchang maru.”

¹⁷A ma thiamruaingai ning an lui ngaidon chong thiangin aluikanjiaksa anga, “Kein na inn hi ka lungsiat, O puma, ka lunga akange”.

¹⁸Jiwngain ama jiang an lui ti, “Nang in hiva chuan tho torna ranak ninei jarra keini jiang ho anga chuanlian jetna ranga nina man mu?”

¹⁹Jisu ning alui sang, “Hiva Pathian inn hi manmangru, hale kein nithum sunga sinkhirtor kati.”

²⁰“Hiva biakinn hi an sinna kumhi kum sommanli lei karuk anlut, nangin ni thum sunga nasinkhir tor rang mo?”

²¹Tak-ha Jisun a taksa ha biakinn a man changa alui ri ani.

²²A ma thina tenna anphut a thui khirsua phat han, thiamruoingain hiva iluiri hi an lui ngaidon; hale anmanin chong adik hale a man a luiri chong ha tak an luingai.

²³Kanna ut kheng buban a om lai Jisu Jerusalem ma a om sunga a man angakpa chuan a tam a luitho ha anmanin an mu jarra mitamin ama takngai na an lui nei.

²⁴Tak-ha Jisu a tak tak in anmani jiang tak luiman ngaidon mak, ajarko aman mirakip a jet.

²⁵Jisun mirakip lung sunga imo a om tihi ajetver ani jarra tu khat in num ama jiang mingai omchan manjet rang om mak.