Read Aimol JOHON 3 Bible Online

JOHON 3 - Aimol bible

JOHON 3

¹Jiwngai lam kai pu, Pharisi ngai karra a ming Nikodimas anti mi ankhat alui om.

²A ma jankhat Jisu jiang alui honga a ti, ‘Rabbi, nang Pathian jiang an phut alui hong oja khat nani tihi kein in kan jet, ajarko Pathian in kanruaipui luiako tu khat innom natho chuan angakpa ngaihi tho tor mau.’

³Jisun alui sang, “Adik tak kirike; tu anin nom a tharra nai a chang mak aninko Pathian rengramma lut tor noniu.”

⁴Han Nikodimas ning alui dingkel, “Mi ankhat in atar nuk a ija mo a tharra naite ichang rang? A man veini tunga anu von sunga lut naite anga hong kanjirtor nati mo?”

⁵Jisun a sanga, “Kein nang jiang adik tak ka na ri ke ani, tui le thavang an phut akanjirmak miha tuachang in num Pathian rengram lut tor noniu.

⁶Taksa an phut an nei ha tak sa ani, thavang an phut an nei ha thavanga ani,

⁷Nang a tharra nai nichang rang tia ki na ri hin ngak maro.

⁸Semthining a rang jotna han arang, nang in hava rasa na jet, tak-ha nangin hontiang mo ahong phut hontiangmo a che jet mache, ha ang han thavang phut nai ichang mirakip anitheirang ani.”

⁹Nikodimas ning alui sang, “Hiva ngaihi ija mo ihongnitor rang?”

¹⁰Jisun a ti, “Nang Israelngai oja alian khat nania hivahi jet tor mache mo?

¹¹Kein a thiang ki na ri ani, keinin kan jet ha kan na manjet keinin kanmuha kan na ripe ani, tak-ha nang nin kei ka chong ri ankhat om luijot ma cheu.

¹²Kei hiva ramuol chung changa kirihi nang nin tak nan ngai mak aninko, vanram chong ka ri phat han ijamo nang nin tak nan ngaitorrang?

¹³Chung van tenna anphut a hong chum Mi Pasalnai ama niluia tu khat innom chung vanna ache la om ma cheu.”

¹⁴Mousi ning ramtong mun na rul an khat aluidomma alui makhai anga, Mi Pasalnai ham an ma khai rang ke.

¹⁵Ajarko tu ang mi ning ama takngai rakip in kumsot a ringna nei nati.

¹⁶Ajarko Pathian in hiva ramuol hi a lungsiat jarra a pasalnai ankhatjakha ana pek jui. Tu aninnum ama takngai rakip in amangti om noning, tak-ha kum sot ring na nei nati.

¹⁷Ajarko Pathian in ramuol la chong tanranga a nai a hong tir nimak; tak-ha ramuol hi santhei na ranga ihongtir ani.

¹⁸Tu anin nom Mi Pasalnai takngai rakip ko chongtan na om mak, hale tu a chang innom takngai lui rakip ko chongtansa ani jui.

¹⁹Chongtan chuan ha ani; tiko var ha ramuol a hong tung, tak-ha mingain adik lui chuan an tho jarra, a var ha nek om a jing ha andeijui.

²⁰Chuan dik lui a tho rakip in var ha anmatir, hale a chuan dik lui itho ha nadonati tia a var han hongjotmau.

²¹Tak-ha adik chuan a tho tu angin Pathian jiang chuan kithoke ti ha phuang a dona ranga a var han an hong ani.

²²Hiva suale Jisu a thiamruoingai le Judia ramtiang an lui che. Hava mun han ama phabongkhat aluiompuia, tui alui man lut alui man tho.

²³Johon ning salim a sirra a en na tui atam jarra hava mun han mi an hong ngaiha tuiamanlutjui.

²⁴Hava phat han ko Johon hi ren inn na lasiak ma u.

²⁵Johon a thiamruoi aviar le Jiw an khat le chong kandingkelna, man thiang na chung chang a kan biakna ankanneijui.

²⁶Hiva jarra anmani Johon jiang an lui honga an lui ti, ‘Rabbi, Jordan va ralla nan luiomsuam ama jarra chongir nipeksa mi ha a tun tui amanlut a a om, hale mirakip in ama jiang an che jui;’

²⁷Johon nin a sang, “Chungvanna an phut Pathian in ihongpek ni lui a mi ha ning i om tho tor noning.”

²⁸Kein nang ni jiang ka lui ti, “Kei Khrista ha ni making, tak-ha a man a masat inahongtir ani tihi nang ni nan tak tak in kachongir shakhi nan ni.”

²⁹Muinuha muipata ani, muipa asap ha a sirra angirphahan, muipa rasa ha a jet han a ning asat; hinga hin kei ningsat na ha lung khopna ani lungdo a man tung.

³⁰A mako i hong kan son rang, hale keiko ka hong sinmemen rang a suak.

³¹Chung vanna an phut i hong ama ha ning i rakip karra a lian tak ha ani; ramuol la an phut ani mi ha ramuol ta ani, hava jarra ramuol ranga chong ha a man a ri. Chung vanna an phut i hong a maha irakip karra asangtak ani.

³²A man imusa, i jet sa chong ha a ri, tak-ha tukhatnom a chong lui pe ma u.

³³Tu a chang innom ama chong alui mi han Pathian hi adik ani tia a man dikjui.

³⁴Pathian in ihongtir mi han, Pathian chong a ri, ajarko Pathian in ama chunga arathaha lungdo tunga alui pek.

³⁵Apan a pasalnai ha a lungsiat, an khat om a kut chunga i rakip ranak neinaranga a pek jui.

³⁶Tu a chang innom a pasalnai takngai mi han kum sot ring na nei nati; tu a chang innom a pasalnai takngai lui mihan ring na mu noning, tak-ha Pathian lung nat ha a chunga om nati.