Read Aimol JOHON 5 Bible Online

JOHON 5 - Aimol bible

JOHON 5

¹Hiva suale Jiwngai khengbuban an khat a lui om, Jisu Jerusalem ma alui che.

²Jerusalem ma han belram kotkunga tuikhur chumna lam ranga a kan long a om; hava ha Hebru chonga “Bethazatha” anti.

³Hava tuikhur chumna lam ngai han, a mitdel, akekiak, a tak sa sual, a nat mitam an lui jalla tui kan nok ha an ngak an lui om.

⁴Ajarko Puma chungvan na thaneithiang ankhat in hapkhat hapkhat tuikhur han a hong chumma tuiha sing a mansat; tui ha sing asat lai tak tuang mi ning man a chumma asit aninko, anat naha hava han an phut damna huina an lui nei.

⁵Hava mun han kumsom thum lei kariat tunga a taksa anat mikhat alui om.

⁶Jisun hiva miha a mu phat han, hava miha phasot tak a nat a jet ama jiang alui ti, “Nang nadam jotmo?”

⁷Anat mi han a sanga, “Oja, Tui hi sing sat phat han tui sunga lut na rang karra a na ruai rang tu khat om nei making; kei valutrong tia ka hong karra midang khat inman aleikaia ana lutde ani.”

⁸Han Jisun ama jiang a ti, “Thui innang, na jalna napher lui in lang chetaro.”

⁹Hava lai tak hava anatpa ha a dam ajalna pher a luia ache jui. Hava nikhuo ha sernikhuo alui ni.

¹⁰Hiva jarra Jiwngain mihajiang an lui ti, “Atun hiva sernikhuo hin nang in na jalna pher naluia adik lui dan chuan nitho ani.”

¹¹A man a sanga, Kei anamandam mi han kei jiang a ti, “Najalna pher lui innang chetaro!”

¹²Anmanin an lui dingkel ret, “Nangin na jalna pher lui innang chetaro anati miha tumo ani?”

¹³Tak-ha a nat amandam miha ning Jisu ha tumo ani tia luijetma, ajarko hava mun na han mi antam jarra Jisu ha alui suak jui.

¹⁴Hava suale Jisun ama ha biakinna a mua ama jiang a ti, “Enro, na dam jui; natak chunga akhella asatlui ommak na rang siatna tho lai maro.”

¹⁵Hava phat han mipa han Jiwngai jiang alui chea Jisun imandam ha ahong manjet.

¹⁶Jisun hiva mi alui mandamhi sernikhuo aluini jarra Jiwngain ama tak chunga lung kan nokna an phut jui.

¹⁷Hiva jarra Jisun anmani jiang alui ti, “Ka pa ning anitin nachuan asin jarra kei ning om kasinrang asuak.”

¹⁸Hiva jarra hiva ruia, Jiwngai ama a khella an lui thatjot; Ajarko a man sernikhuo hin dan isetjak niluia, a man Pathian ha apa imanchang, Pathian le ama ikan angpui mo ani.

¹⁹Hiva jarra Jisun anmani jiang alui sang, “Kein adik tak ka ri ani, nai ha ning a binga i om thotormak. A man apa chuan tho ngaiha amujak ha ithotor ani. Apan a tho chuan ha a pasalnai han nom atho ani.”

²⁰Ajarko pa ning a pasalnai a lungsiat an khat om atho chuan rakip ama jiang aman mu; a man hiva nek ithorang chuanliandet ina man muranghi nang nin ngak nanti.

²¹Ajarko apahan athi ngai ha aman ringkhirra amanthui, hava ang han nai han nom aman ringkhirjot, anmani jiang ringna a pek.

²²Pahan tu jiang om chong tanmak, chongtan na rang i rakip a man naichunga ranak a pek jui ani.

²³Hiva jarra mirakip in apa anjak anga anai ham an chit anjak rang, tu achang innom a pasalnai chit le jaklui miha, ajuangtirpu apa ham chitlejak nei lui anni jui.

²⁴Kein adik tak ki na ri ani, “Tuachang innom ka chong ri ajet anahongtirpu tak a ngai miha ning kumsot ringna nei nati, ama ko thina an phut ringna a nei jui, hale chongtan na han kan chel lai noning.

²⁵Kein nang ni jiang adik tak a ki na ri ani,” a thi mingain Pathian nai rasa an jet phat han, a thi ngai ringna rang pha ha a hong tung jui, a tun nom alani.

²⁶A pa abinga ringna kung achang anghan, a pasalnai in num abinga ring na kung achang na rang aman a sin jui.

²⁷An khat om nai ha Mi Pasalnai ani jarra chongtan na ranak achunga a man alui pek.

²⁸Hivahi ngak maru, ajarko a thi rakip in than khurra an phut ama rasa an jet phat han;

²⁹Anthan khurra an phut an hong suak na rang pha ilahongtung rang ke; chuansat atho ngaiha ringkhir ranga thui khir nanti, hale adik lui atho ngaiha chong tannaranga hong thui khir nanti.

³⁰Kein kabing jak i om thotor making; Pathian ana manjet nuk juia chong ka tan, hava jarra kei ka chong tanko adik ani, ajarko kein kideiha tho rang tia kansiat making ngaidon making. Tak-ha kei ana hong tirpu ama adei jak ha kathoke ani.

³¹Kein ka binga kachongngir shakhi kakanpek aninko, ka shakhi chongngirha adik lui ani tia ka lui.

³²Tak-ha midang an khat in kei ka ruia chong ngir a pek khat a om, a man kei ranga chong ngir a pek ha adik tia kein ka jet.

³³Nang nin nan chong choi Johon jiang nantir, hale Johonin adik chong ngir alui pek ani.

³⁴Hivahi mi ankhat chong ngir ranga ngirrong kitina nimak, nang ni na sanring na ranga ka ri ani.

³⁵Johon thaimei mei var ankhat anga, ka suak kavar, nang nin ama varha pha bongkhat jak na man huipui.

³⁶Tak-ha Johon chong ngir itho nek a alian det kachunga chong ngir ankhat kein ka nei; Kapan ki tho rang chuan a na pek ha kein ka tho, ka Pan ijuangtir ham chong ngirna a pek.

³⁷An khat om, kei ana hong tirpu ka pa nom ka ruia chong a ri, nang nin ama rasa lui jet ma cheu.

³⁸Hiva jarra a chong ha nan lung sunga om mak, ajarko ama ahongtirpuha nang nin takngai mak che u.

³⁹Nang nin chong thiang rabu sunga kum sot ringna kan mu rang tia nan jet nan hong, hale hava ngai han ka chunga chong an ri.

⁴⁰Atun tunga ringna muna ranga kei jiang hongjot mak che u.

⁴¹“Miringain an na manpak hi kein dei making.

⁴²Tak-ha kein nang ni kanajet, nan lung sunga Pathian lungsiat na om mak tihi kein kanajet.

⁴³Ka pa chong a nei ranak le kan ruaia kei ka hong jui, tak-ha nang in kei naleilui mak che u. Mi ankhat abinga inei ranak le kan ruaia ahong inko, nang nin ama nanlei lui rang ke.

⁴⁴Nang nin ankhat le ankhat kandomsang rang nan dei, tak-ha Pathian ankhat jak jiang an phut ahong ha domsang rang ko dei mak che u; hiva jarra nang nin ija mo tak nanngaitor rang?

⁴⁵Kein nangni ha ka pa jiang nanlalna ha a pek rangketia ngaidon maru. Mousi ning nang ni lalna ha ana pek ani.

⁴⁶Adik tak nang nin Mousi ha tak nanngai aninko, kei tak nan na ngai rang ani; ajarko a man keichung chang a chong an lui jiak.

⁴⁷Tak-ha nang nin ama alui jiak ha tak nanleingaimak jarra, ija mo kei chong tak ha nan ngaitor rang?”