Read Aimol JOHON 7 Bible Online

JOHON 7 - Aimol bible

JOHON 7

¹Hiva suale Jisu Galili ram ma aluilon, ajarko Jiwngai that na ranga an hong jarra Judia ramtiang luiche jot mak.

²Hava lai han Jiwngai kanna ut Kheng buban pha om na rang alui hong nai.

³Hale Jisu a u anaingain ama jiang an lui ri, “Nachuantho ngaiha na thimruoingain an mu na ranga hiva mun hi mak in lang Judia ramtiang chetaro.

⁴Ajarko a kando rang an dei inko, tu khat innom ruk chuan tho mau. Nang in hiva chuan ngaihi na tho ani jarra ramuolmi rakip in na jet raseu!” Anluiti.

⁵Ajarko a u a naingai tak innom tak leingai mau.

⁶Jisun anmani jiang alui ti, “Kei ranga a pha lahongma, nang ni ranga ko a phat thep ati jui.

⁷Ramuol hin nang ni ha namatirtor noning, tak-ha hiva chuan hi satmak tia kein kati jarra an na matir ani.”

⁸Nang ni khan na ut munna cheru, kei rang ko a pha la nimak, hava jarra kei hong noning a luiti.

⁹Aman hivahi a ri suale a mako Galili mun na a che jui.

¹⁰Au a naingai kholai khangna an che suahan, Jisun nom hava pha han phuang a luichemak, tak-ha mi manjet luia ruk a alui che.

¹¹Jiwngai kholai khangna mun han an en na, “ama hon mo a om?” An lui dingkel.

¹²Mitamngai karra han Jisu ruia mi alek in an luiti, “A mako a satmi ke” hale a dang khat ngain an luiti, “Nimak” a man mitamngai hi adik lui lam tiang aruai jui.

¹³Tak-ha Jiwngai an chit jarra tu khat in num phuang a Jisu a ruia chong ritor laimau.

¹⁴Kholai khang ha tangkhai majai a hongni han, Jisu biak inna aluichea a manjet a phut jui.

¹⁵Jiwngai an luiti, “Hiva mihi ning iom kan chu luia ijamo hi ang hin iching, ivarhi?”

¹⁶Han Jisun avasang, “Kein kina manchuhi kei kata nimak, tak-ha ina hong tirpu an phut kihongke ani.

¹⁷Tu a chang innom Pathian lungdo tho rang mihan kimanchuhi Pathian an phut ahong ani nimak hale ka binga kijek jekmaking tiha nan jet rang ke.

¹⁸A ma a bing a ajek a maha ning a binga lianpui na ranga ahong ani, tak-ha ama ahong tirpu lianpui rang a hong a maha chong ajui. Hale adik lui chuan iom neimak.

¹⁹Mousi dan ha nang nin nan pek nimak mo? Tak-ha tu khat innom dan ha juimak che u, ijarra mo kei nathat na ranga nan kan siam?”

²⁰Mitamngain an lui sang, “Tu ning mo nang nathat rang anti?” Nang nin asatlui Thavang khonam nachoike; an lui ti.

²¹Jisun alui sang, “Kein chuan lian tak kathoa nang nin nan ngaidon na nan om.

²²Ajarko Mousi ning nan naingai vun nantanrang chong ana pek jui. Hava Mousi an phut nimak, nanpu nan pa ngain anluiphut ani. Nang nin sernikhuo hin naipangai vun nan tan.

²³Sernikhuo ning hin na nai pang an khat vun tanhi Mousi dan ha akuimak aninko kein sernikhuo hin mi khat kimandam jarra nang nin ka tak chunga nan lung mo inat?

²⁴Maisua en innang chongtan maru, tak-ha adik tak han chong tanru.”

²⁵Jerusalem ma mi alek in an luiti, “Anmanin that ranga an tok mi ha hiva hi nimak mo?

²⁶Enru; mitam karra phuanga aman chong alui ri, tu khat innom iom lui ri ma u; lam kai ngain ama hi Khrista ani tihi aching athei lamkai pu ngain adik an hong jetrangmo?

²⁷Khrista a hong phale hon na an phut ihong, tu khat innom jet noni cheu. Tak-ha hiva mihiko keininko hon na anphutmo ti a kan jet.

²⁸Jisun biakinna rasa a shanga ilui man chu; “Nang nin kei hi a thianga hon na an phut ihongmo tihi nan jet mo? Kei ka binga ka ranak ka hong chang mak, nang nin nan jet lui adik ama an phut ani jarra ani,

²⁹keiko ka jet ajarko a man inahongtir ani.”

³⁰Hava phat han, anmanin churna rang an lui tok, tak-ha tu khat innom churngam mau. Ajarko ama pha la hong tung mak.

³¹Tak-ha mipui karra atam lamin ama tak an ngai jarra an luiti, “Khrista a hong phale, hiva mihi ning itho chuannek chuanlian tho tor nati mo?”

³²Pharisingain mitam karra Jisu tak chunga chong an ri hi an jet jarra anmani le thiampungain Jisu chur ranga anluitir.

³³Jisun alui ti, “Pha bongkhat jak kein nang ni kana ompuirang a nijui. Hava suale ana hong tirpu ama omna mun han kan le rang kani.

³⁴Nang nin kei natok nanti; tak-ha na mu noni cheu, ajarko ka omna mun han nang ni hongtorno nicheu.”

³⁵Jiwngai anmani karra anluikanti, “Honmo achea keinin ama kan mu tor makrang? Jiwngai om na Grik khopuia a chea ihong manjet rang mo?”

³⁶A man atia, “Nang nin kei nanatok rang ke, tak-ha namu noni cheu, hale ka omna mun han nang ni hongtor noni cheu; iti chong hi imo itina ani?”

³⁷A torna nikhuo han, kholaikhang, Janbukheng ban nikhuopui nihan, Jisun a ngirra rasa shanga a hong ti, “Tu achang innom a tui aral aninko, kei jiang hong sennang hong in rase.

³⁸Chong thiang in ari anga, tu achang innom kei tak ana ngai miha ama lung sunga an phut ring na tuidungha lonnati.”

³⁹Jisun hiva irihi ama tak angai mingain nuk a thavang imunarangha iluiti ani; ajarko ama lianpui na iluimumak jarra, thavang ha hava laitak lui hong pe mak.

⁴⁰Mipui karra mitam tak in hiva chongngai hi an jet phat han, mi alek in an luiti, “Hiva mihi adik tak chong luiriha ani.”

⁴¹Herkhat in anti, “A mahi Khrista ani.” Tak-ha mi alek in anti, “Nimak, ajarko Khrista ha ning Galili anphut Khrista ihonglui rang mo?

⁴²Chong thiang in iri ha ko Khrista ha David phunga anphut aluini, hale David iluiomna Bethlehem khopuia nai a hong chang tia adik chongin itisa nimak mo?”

⁴³Hiva jarra han, mitam karra rupni ankansemna an om jui.

⁴⁴Mi alek in Jisu an lui churjot, tak-ha tu khat innom a chunga an kut sittor ma u.

⁴⁵Thiampulian ngai ha ning thiampulianngai le Pharisingai jiang an honga anmanin an lui dingkel, “Ijarra mo ama nan hong tuang mak?”

⁴⁶Alutir angak pungain anluisang, “A ma chong ri anga tu khat innom chong larichil ma u.”

⁴⁷Pharisingain anluisang, “Nang ni ham adik lui lamtiangmo inaruaijui?”

⁴⁸Aluitirpu ngaile Pharisingai an khat in ama tak an ngai jui mo?

⁴⁹Hiva mitamngai hi ning Mousi dan ha jet ma u; hiva jarra anmani Pathian Lungthak na anmu jui?

⁵⁰Nikodimas ha Pharisingai karra mi ankhat ani; a man Jisu kanmupui ranga jan khat aluiche, a man a luiti.

⁵¹Na dan nuk juia mi ankhat chuan ahong thomakma, achong ri kan jet mak ma keinin dikmak tia nontak pektor masing.

⁵²Anmanin anluisang, “Asatjui nang om Galili mo nini? Chong thiang ha telro, Galili an phut chong phuang mi tu khat om suak ma u tihi na jet rang a suak.”

⁵³Anmani ning an inn ina an che jui.