Read Aimol TIRLON 1 Bible Online

TIRLON 1 - Aimol bible

TIRLON 1

¹O, Thijophila: A ma sat chongthiang rabu sunga han, Jisu ha a phut lai tenna chungvan tung ranga le a chuan tho rang rakip ka na lui ripe ver jui.

²Jisu vanram akalmak kar je a man a thiamruoi chang ranga athang suak mingai ha Thavang Thiang ranak han chong alui pek.

³Jisu a thi suale a ringkhir jui tihi jetna rang le kan ruaia ni som, manli sunga a tirlonngai jiang a mun a dang adanga aluikando han Pathian rengram ruia chong alui ri.

⁴A man anmani le a om suam lai han chong pek na a neia, a ti, “Nang nin Jerusalem hi makmaru ka pa ning kutchoi a na pek mak kar je.

⁵Ajarko Johon ning tuija baptais, tak-ha nikhuo sotchil lui a Thavang Thianga baptais tho rang nani jui.”

⁶Anmani le an omchun pha han ama jiang an hong dingkel, “Puma a tun pha hin Israelngai rengram ha nipek khir rang mo?”

⁷A man anmani jiang a ti; “Ka pa ning achamtak a chong ri na pha a siak ha itik mo ini rang hi nang nin nan jet rang nimak.

⁸Tak-ha Thavang Thiang ning nan chunga a hong pha han nang nin ranak nan nei rang ke, han nang nin Jerusalem ma, Judia pumpuia Samarija le ramuol mongna khan na ka shakhi nan chang rang ani.

⁹A man hiva chong hi ariphat han, anmanin ama ha an lui enna, ama ha chung tiang akaljui, anmani mit en na sumphai ning alia jui.

¹⁰Han anmanin Jisu ha vanram tiang a kal ha an enlaitak han, Enru, puon nguishi pasal anni ning anmani sirra an ngir.

¹¹Hale an hong ti, O, Galili mingai ita mo nan ngirra vanram tiang nan en? Jisu hi nang ni tenna vanram ma a kal nan mu ang hin ama ahong kir ham nan la mu ret rang ke?”

¹²Hava suale anmanin Jerusalem le akandep, sernikhuo nikhat lon na lam Olib tangbung anti mun tenna Jerusalem ma an kanlejui.

¹³Han anmanin inn han an lut, a chunga ka han an om, anmaningai hako; Pitar, Johon, Jems, Andrew, Philip, Thoma, Bartholomew, Mathiu, Alphija a nai Jems, Jelot Simon hale Jems a nai Juda anni.

¹⁴Anmani lim le numei le Jisu a nu Meri le a nai pangngai le lung khat jak changa ani tin lamna ranga an kanchun chak.

¹⁵Hiva nikhuo sung hin Pitar ning ulenaingai karra a ngirra a ti, mitamngai ha riakhat le somni duk anni.

¹⁶“O, u le naingai, Jisu an chur laia lam hongruoi Juda antipa ruia Thavang Thiang ning David abaisua a luiri chong thiang ha tungtheina rang ani.

¹⁷Ajarko ama ha keini kan karra mi khat ani, hale hiva chuan jarra ama a tum ha ani jui.”

¹⁸A man chuan salui a tho jarra lui puk khat a tum, a khup a kan lum ma a von achetverra a ril aphung ater pet jui.

¹⁹Han, Jerusalem ma a om limin an hong jet jui, hiva jarra anmani chonga lui puk ha Akeldama anti, hiva tina ko “Thisen lui puk.”

²⁰Ajarko La, Rabu sunga a kan jiak; ‘ama a ram ha tu khat om om ma rase u, ram char chang rase miring om mak na nirase, hale ama chuan mun ha midangkhat in lui rase u.’

²¹Hiva jarra keini karra Puma Jisu ning a na om pui lai, a pha rakip keini le om jon jet mi khat,

²²“Johon ning Jisu tuija baptais a man tho ama ha keini tenna veikhat a na lui pe khir pha khan na, a jet ama a ringkhir jet chiak shakhi chang rang mi khat ani.”

²³Hava han anmanin miring anni an hong thangjui, havangai hako; Barsabas Justus om anti hale Matthias anni hi anni.

²⁴Han anmanin lam na an neija anti, “Miring lung rakip jetpu O Puma, hivami anningai karra nang in an khat na thang ha na man jetro.

²⁵Ajarko, Juda ning alui tho thiamnai chuan mun ha tho khir na ranga, a mako thiamnai chuan mun ha a rak a lungdo mun na a kan heijui.”

²⁶Han anmanin miring anningai ming ha anluija anravan anenjui. Han Matthias a ming ha an thang suak jui, hale a maha thiamruai somleikhat karra an man kan chel dejui.